Auka Lasi Hereva be Namo
1 Dahaka dainai pablisa memero kekeni ese Basileia sivaraina idia harorolaia neganai, nega momo taunimanima idia ura kamonai? Unai ena badina ta be edia hereva be ia auka lasi. Pablisa haida be reana idia laloa hereva badadia momo idia gwauraia karana amo anina ia vara. To, momo ese idia itaia auka lasi hereva bona anina ia hedinarai goevagoeva herevana be namo.
2 Iesu ese Dirava ena Basileia be auka lasi, bona anina ia hedinarai goevagoeva dalanai ia harorolaia bona ena hahediba taudia ia hadibaia unai bamona do idia hereva. (Mat. 4:17; 10:5-7; Luka 10:1, 9) Ia ese auka lasi hamatamaia herevadia, henanadai, bona haheitalai ia gaukaralaia kamonai taudia edia lalona ia veria bona edia kudouna ia hamarerea totona. (Ioa. 4:7-14) Iena kara ita tohotohoa bona do idia lalo-pararalaia haraga herevadia ita gwauraia be namo.
3 Ita ese “Basileia ena Sivarai Namona” ita harorolaia. (Mat. 24:14) Basileia be emu hereva kwarana bamona oi gaukaralaia neganai oi do ia durua emu hereva dalana be do ia auka lasi. Kamonai taudia idia laloa momo gaudia oi herevalaia. Nega momo hahine be edia ruma bese idia laloa momo, to politikol gaudia idia laloa momo lasi. Tamana be ena gaukara bona famili ena noho namo ia laloa momo. Matamata taudia be edia vaira negana idia laloa bada; buruka taudia be edia tauanina ena goada bona edia noho namona idia laloa bada. Nega momo taunimanima be edia gabu dekenai idia vara gaudia idia laloa momo, to gabu daudaudia ai idia vara gaudia idia laloa momo lasi. Taunimanima idia laloa bada gaudia umui herevalaia murinai, Dirava ena Basileia ena lohia henunai kamonai taudia ese do idia moalelaia hahenamodia oi herevalaia. Kamonai tauna ena ura do oi habadaia totona auka lasi hereva namodia haida bona Baibel siri ta be namo.
4 Inai bamona hereva amo herevahereva oi hamatamaia diba:
◼ “Oi diba taunimanima be do idia hanamoa diba lasi gorere momo ese idia hametaudia. To oi diba Dirava ia gwauhamata ia ese kahirakahira gorere idauidau bona mase do ia haorea, a?” Haere naria, bena Apokalupo 21:3, 4 duahia.
5 Aiemai ura be anina idia hahedinaraia goevagoeva bona idia auka lasi herevadia amo oiemu teritori dekenai idia noho taudia edia lalona bona edia kudouna oi veria, idia oi durua Iehova bona mauri hanaihanai do idia moalelaia ena helaro idia dibaia.—Ioa. 17:3.