Hebouhebou​—Moale Negadia!

¹ Iehova ena Witnes taudia edia hebouhebou be moale bada negadia. Lagani handred mai kahana lalodiai, inai hebouhebou ese iseda orea ia bada ia lao karana ia durua. Matamanai orea ia maragi, to ita itaia vadaeni Iehova ese eda tanobada hegegemadai gaukarana ia hanamoa bada. Lagani 1893 ai, hebouhebou ginigunana be Chicago, Illinois, dekenai idia karaia neganai, idia mai taudia 360 amo 70 be bapatiso amo edia gwauhamata Iehova dekenai idia hahedinaraia. Lagani gunanai ita karaia “Dirava Ena Hereva Badinaia Taudia” Distrik Hebouhebouna dekenai, tanobada hegegemadai unai hebou dekenai idia lao taudia ibounai be 9,454,055, bona 129,367 idia bapatiso. Unai be moale bada gauna!

² Baibel negadia amo ema bona hari, Dirava ena taunimanima edia hebouhebou ese dala ia kehoa Iehova amo ia mai hadibaia herevadia idia gwauraia totona. Esera bona Nehemia edia nega lalonai, Taravatu idia duahia neganai, taunimanima be “daba rere negana ela bona dina tubu” ai idia kamonai. (Neh. 8:2, 3) Unai nega lalonai, taunimanima ese Taravatu idia lalo-pararalaia goevagoeva dainai, idia “moale” bada herea. (Neh. 8:​8, 12) Ita danu ita moale badina hebouhebou ese dala idia kehoa Iehova ese “hesiai tauna mai ena kamonai, bona mai ena kara maoromaoro” amo nega korikori ai ia henia hadibaia hereva namodia bona lauma aniani ita abia totona. (Mat. 24:45) Badina Iesu ia gwau taunimanima ese “Dirava ena uduna dekena amo idia mai hereva ibounai” amo mauri do idia abia, unai dainai lauma dalanai ita noho namo totona hebouhebou be mai anina bada.​—Mat. 4:4.

³ Ita Lao Totona Ita Hekwarahi be mai Ena Namo: Namona be ita ta ta ibounai eda tahua gauna be inai lagani ena dina toi “Dirava Ena Hereva Hadibaia Taudia” Distrik Hebouhebouna ita reaia lasi. Namona be dina ta ta ai ita ginidae haraga bona ita noho ela bona hebou koua gurigurina dekenai “Amen!” ita gwauraia. Unai ita karaia totona, reana iseda sediual dekenai gau haida do ita haidaua. Hebouhebou lao henia totona iseda moni gaukara do ita reaia be reana mai ena hekwarahi haida. Namona be ita gini goada, bona gau haida ita karaia. Bema noho gabudia bona motuka ita ura, namona be nega bada lalonai dala ita karaia. Iseda hekwarahi, herevana ena bada be edena bamona, be anina namona do ia havaraia!

⁴ Iehova ena taunimanima ese hebouhebou lao henia karana amo idia abia hahenamo be moni ida idia hahegeregerea diba lasi. Lagani 1958 ai, New York City dekenai, Iehova ena Witnes taudia edia Divine Will Intenesenel Hebouhebouna dekenai idia lao taudia haida edia haheitalai mani oi laloa. Tadikaka ta be ena heduru ia henia totona bona hebouhebou dekenai ia lao totona, wiki rua lalonai ena bisinesi ia koua. Tadikaka ma ta Virgin Islands amo be tano 2 hectares bamona ia hoihoilaia, unai amo ena ruma bese taudia ibounai 6 be hebouhebou dekenai idia lao diba. Tau ta bona ena adavana be edia bouti idia hoihoilaia, unai amo edia natudia ibounai toi, edia mauri laganidia be hua rua amo ela bona lagani 7, be hebouhebou dekenai idia abia lao diba. Boga tamona tadikakadia toi California amo be edia biaguna ese ia hamaorodia bema gaukara totona idia mai lasi, edia gaukara do idia haboioa. To, unai ese idia ia koudia lasi, idia laloaboio diba lasi hebouhebouna dekenai idia lao totona.

⁵ Iehova ese Iseda Hekwarahi Ena Davana Ia Henia: Iehova ese ena taunimanima ia itadia bona edia hekwarahi ia hanamodia. (Heb. 6:​10) Hegeregere, lagani 1950 ena Theocracy’s Increase Assembly ai, hebouhebou dekenai idia mai taudia ese inai hereva badana “New Systems of Things” idia kamonaia. Tadikaka Frederick Franz ese ibounai edia ura ia habadaia totona, ia gini bona ia nanadaidia: “Inai intenesenel hebouhebou ena hanuaboi ai, tanobada matamata ai idia lohia diba taudia haida be iseda huanai idia noho, unai umui moalelaia, a?” Lagani 50 mai kahana idia ore murinai, Salamo 45:16 dekenai iseda lalo-parara ita habadaia dainai ita do moale noho.

⁶ Ruma bese ena kwarana ta be lagani gunana ena distrik hebouhebou dekenai ia lao murinai, inai hereva ia torea: “Tadikaka e, unai hebouhebou ese ai ia durua bada herea. Lau be egu ruma bese ida gaukara totona taoni dekenai ai lao, to ai davaria lauma dalanai ai manoka ai lao. . . . Emai Keristani maduna idauidau ai karaia lasi. Hebou lao henia karana bona haroro gaukara ai rakatania momokani. . . . Unai hebouhebou ese ai ia hagoadaia lou bona lauma dalanai emai tahua gaudia ai atoa lou bona ai hegaegae unai gaudia ai hagugurua totona.”

⁷ Ita abia be namo lauma aniani be Iehova ese ita dekenai ia henia noho. Hebouhebou negadiai lauma aniani momo be teibolo dekenai ia atodia. Unai lauma gaudia ita laloa bada karana ese ita ia doria Korenelio bamona ita hereva, aposetolo Petero ese ia vadivadi henia neganai ia gwau: “Hari ai ibounai be Dirava ena vairanai iniseni ai hebou, gau ibounai Dirava ia hadibaia oi dekenai, do ai kamonai totona.” (Kara 10:33) Namona be iseda tahua gauna be “Dirava ena vairanai” ita noho, unai dainai inai lagani ena “Dirava Ena Hereva Hadibaia Taudia” Distrik Hebouhebouna ena hereva ibounai ita kamonai bona moalelaia!