Lagani 1999 “Dirava Ena Peroveta Herevana” Distrik Hebouheboudia
1 Israela taudia be Gwauhamata Tanona dekenai idia vareai gwauraia neganai, Mose ese ia noidia Iehova ena hadibaia herevadia idia badinaia totona. Ia hamaorodia, ia gwau: “Inai herevadia be gau maragina lasi umui dekenai. Lasi, idia be emui mauri.” (Deut. 32:45-47) Iehova ita tanikiu henia badina ia ese iseda mauri ia laloa bada dainai iena dava bada Herevana amo ita ia hakaua noho, ani? Unai dainai, ita ese dina toi “Dirava Ena Peroveta Herevana” Distrik Hebouhebou bona Iehova ese ita dekenai do ia hadibaia gaudia ita naria noho mai moale ida.
2 Inai lagani ai, Papua New Guinea dekenai distrik hebouhebou be gabu 6 ai do idia karaia. Gabu iboudiai hebouhebou ena program be New Guinea Pidgin gado ai do idia karaia, bona Port Moresby dekenai program ibounai be Hiri Motu gado bona English gado dekenai danu do idia karaia. Alotau bona Kiunga dekenai, New Guinea Pidgin gado program lalonai hereva haida be Hiri Motu gado ai do idia karaia. Danu, Port Moresby dekenai, New Guinea Pidgin gado distrik hebouhebou lalonai, gabu ta ai sign language do idia karaia.
3 Reana oi hegaegae vadaeni unai hebouhebou ena dina iboudiai dekenai oi lao totona, badina oi abia dae Iehova ia ura do oi lao. Namona be oi diba momokani, ia be ena hesiai taudia ta ta edia hekwarahi unai hebouhebou lao henia totona ia itaia, bona unai do ia laloatao mai ena moale ida. (Heb. 6:10) Hebouhebou ena dina ta ta ena ane ginigunana amo ela bona ena guriguri dokona ai ita noho neganai, ita hahedinaraia Iehova ena hereva ita dekenai ita lalodia bada. (Deut. 4:10) Danu, ita hahedinaraia iseda tadikaka momo edia hekwarahi hebouhebou idia hegaegaelaia totona ita laloa bada.
4 Dirava ena taunimanima handred momo ese hebouhebou gabudia ta ta idia lao henia totona, palani bona hegaegae namonamo be gau badana. Namona be mai lalokau ida hebouhebou idia hegaegaelaia karana ese ita do ia hagoadaia ita lalo-tamona totona, bona unai dainai ‘gaukara ibounai ita karaia namonamo, mai dala maorona.’ (1 Kor. 14:40) Henunai idia noho hadibaia herevadia bona ita idia hadibaia lou herevadia dainai, hebouhebou dekenai do oi mai neganai oi hegaegae namonamo vadaeni lauma aniani bona Keristani hebamo do oi moalelaia totona.
Hebouhebou Negana Ia Kahirakahira Lalonai
5 Oiemu Baibel stadi taudia bona kamonai taudia ma haida be hebouhebou idia lao henia totona heduru idia abia be namo, a? Reana unuseniai do idia itaia bona kamonai gaudia dainai, idia be Iehova tomadiho henia taudia ai do idia lao. (1 Kor. 14:25) To, ita naria namonamo bema iseda varavara, lauma gaudia idia laloa bada lasi taudia, ita boridia. Sivarai haida idia hahedinaraia, hebouhebou dekenai idia mai totona idia durua taudia haida edia lalohadai be kerere bona sibona edia namo idia tahua dainai, motuka dekenai idia guia kava bona mahuta gabuna idia abia kava. Namona be elda taudia idia laloa namonamo daidia be mahuta gabudia bona lao dalana idia abia be gau badana, hegeregere kongregesen dekenai idia noho buruka taudia, bona mai lalokau ida idia durua be namo.—Gal. 6:10.
6 Mahuta gabuna oi abia vadaeni, a? Namona be Kongregesen Hesiai Komiti taudia ese idia hamomokania Room Request fom be kongregesen seketere ese hebouhebou ena adres dekenai ia siaia guna. Bema unai dala amo mahuta gabuna ta oi abia to oi noholaia diba lasi, karaharaga hebouhebou ena Mahuta Gabudia ia naria Dipatmen oi hadibaia bena tadikaka ma ta dekenai unai mahuta gabuna do idia henia diba.
7 Bema hebouhebou gabuna dekenai First Aid Dipatmen idia haginia, ia be hebou lalonai bero eiava gorere idia davaria taudia sibona durua totona. Ai laloa, namona be sibona emu aspirin, toto kumia gaudia, inhailer, bogana muramura, bona unai bamona gaudia oi mailaia hebouhebou gabuna dekenai, bema oi laloa idia be mai anina bada. Bema oi eiava emu lalokau tauna ta be mai ena gorere, hegeregere kudou gorere, suga gorere, eiava seizures ia abia, mani emu kara ruma ai eiava loaloa negadia ai umui karaia bamona, sibona emui muramura umui mailaia hebouhebou dekenai danu. Aonega dalana be iena gorere ia diba ruma bese tauna ta eiava turana namona ta ese ia bamoa, badina ia ese heduru maorona ia henia haraga diba.
8 Hebouhebou lao henia bona giroa lou karana ese reana dala do ia kehoa nega bona dala idauidau ai oi haroro totona. Do oi hegaegae ma haida dekenai hereva momokani gwauraia totona, a? Ita ibounai, matamata taudia danu, ese bensin abia gabuna ai idia gaukara taudia, basi taria taudia, bona ita davaria taudia ibounai dekenai pepapepa ita henia diba. Dala do ia noho kamonai taudia dekenai magasin, buklet, bona ma buka haida do ita hariharilaia totona. Namona be ita hegaegae nega bona dala idauidau ai ita davaria taudia be ita haroro henia totona.
Hebouhebou Dekenai
9 Dina ta ta ai, program be 9:00 dabai do ia matamaia. Emu ruma bese taudia eiava motuka tamona amo umui mai hebou taudia edia namba hegeregerena sibona helai gabudia oi abia be namo. Mani emu kara, dina ta ta ai emu helai gabuna oi rakatania neganai, emu kohu ibounai oi abia totona gabu oi sekea namonamo.
10 Distrik hebouhebou dekenai bapatiso do oi abia, a? Saturday dabai, helai gabudia haida do idia makaia bapatiso idia abia taudia totona, bona atendan taudia ese unai gabu dekenai oi do idia hakaua lao. Mani emu kara, bema hegeregere hebouhebou ena program ia do matamaia lasi neganai, idia makaia gabuna dekenai oi helai be namo. Namona be emu Baibel, ane bukana, tauele, bona hemataurai digudigu dabuana ta, oi mailaia. Unai mai anina bada negana lalonai, idia utua kava piripou, T-siedi mai edia laulau, bona unai bamona dabua ma haida be hegeregere lasi. Elda taudia ese bapatiso gwauraia taudia ida Hesiai Gaukara bukana ena henanadai idia riviulaia neganai, namona be idia itaia idia ta ta ese unai idia lalo-pararalaia be namo. Bapatiso ena anina be ta ese ia amo gwauhamata Iehova dekenai ia hahedinaraia dainai, bapatiso idia abia lalonai bapatiso taudia rua be imana idia dogoatao heheni be maoro lasi.
11 Hebouhebou dekenai kamera, vidio, bona kaset teipi oi gaukaralaia diba. To, namona be oi atoa eiava gaukaralaia dalana ese raka gabuna ia koua lasi, ma haida idia itaia namonamo dalana ia koua lasi, eiava edia program kamonai namonamo karana ia hadikaia lasi. Unai gaudia be hebouhebou ena paua poin eiava saun gaudia dekenai do oi gwadaia kau lasi.
12 Nega halusia kava lasi bona ita durua totona, Society ese ita idia noia hebouhebou dekenai ita sibona eda aniani ita abia lao. Tadikaka momo ese unai hereva idia badinaia bona idia davaria dina tubua ai idia laga-ani neganai, edia ruma bese ida idia helai bona idia mailaia anianina idia ania hebou diba. Momo idia gwau, dina tubu ai idia laga-ani bona nega sisina edia tadikaka bona taihu ida idia kiki hebou dainai idia moale bada. Unai oi karaia diba totona, namona be aniani bona inuinu gaudia be oi do mai lasi neganai oi hoia bona eski eiava baege maragina dekenai oi udaia, namona be helai gabuna henunai unai eski eiava baege oi atoa diba. Unai dainai, umui ta ta ai noia hebouhebou dekenai umui sibona emui aniani bona inuinu gaudia do umui mailaia. Danu, namona be umui idia bamoa kamonai taudia ese edia aniani idia mailaia. Hebouhebou gabuna dekenai kavabu bona kekero muramuradia be taravatu.
13 Dina ta ta ena hereva ginigabena murinai gabu hagoevaia gaukarana oi durua diba, a? Eiava, hebouhebou ena dipatmen ma ta dekenai oi gaukara diba, a? Bema gaukara oi durua diba, mani emu kara hebouhebou gabuna dekenai ia noho Volantia Gaukara Dipatmen dekenai oi lao. Mauri lagani 16 idia do abia lasi natudia ese heduru idia henia diba bema edia tama sina eiava tadikaka eiava taihu badana ta ida idia gaukara hebou. Oibe, ita ibounai ese heduru ita henia diba, momoru ita gogoa bona gabu korikori dekenai ita atoa.
14 Sisiba namodia ita abia vadaeni, edena dabua bona tauanina ena toana be hegeregere iseda hebouhebou totona. Hegeregere: Iseda Basileia Gaukara lalonai idia udaia pepadia edia hakaua herevadia, iseda buka bona magasin lalonai idia noho laulaudia, bona gau hereadaena, Iehova ena hereva Baibel lalonai ese ita idia hakaua. (Roma 12:2; 1 Tim. 2:9, 10) Taunimanima idia diba ita be daidia bona dahaka dainai edia siti dekenai ita hebou. Unai dainai, iseda dabua bona tauanina ena toana ese haroro namona ia henia diba. Unai gauna dekenai Iehova ena taunimanima momo herea be haheitalaia namodia. To, nega haida, iseda hebouhebou dekenai idia mai taudia haida be edia dabua bona tauanina ena toana amo inai tanobada ena lauma idia hahedinaraia. Tauanina ena toana ia hahedinaraia goevagoeva dabuana ia hahedokilaia tauna ese ia hahedinaraia ia ese lauma gaudia ia laloa bada lasi. Hemataurai karana ia hahedinaraia toana be namo herea. Unai dainai, namona be ruma bese kwaradia ese edia ruma bese taudia edia dabua idia laloa namonamo. Hebouhebou gabuna murimurinai danu, unai ita laloaboio lasi be namo. Hebouhebou dinadia ai program ia do matamaia lasi bona ia ore murinai, iseda lapel kadi ita atoa, unai amo taunimanima do idia diba ita be Iehova ena taunimanima goevadia.—Mareko 8:38 itaia.
15 Aonega bada King Solomona be Dirava ena lauma ese ia hasiahua dainai ia itaia “natuna maragidia ibounai ese kavakava idia karaia noho” bona “sibona ena ura ia karaia noho merona ese, iena sinana do ia hahemaraia.” (Aon. 22:15; 29:15) Nega haida, hebouhebou lalonai, Witness natudia ese tadikaka bona taihu edia program kamonai karana idia hadikaia. Tama sina ese Iehova dekenai edia natuna ena kara ena badina do idia gwauraia dainai, edia natudia idia helai namonamo bona Iehova ena hadibaia herevana idia kamonai eiava lasi idia diba namonamo dalana tamona be natudia be tama sina ida idia helai. Oibe, Witness lo taudia ese haheitalai namona idia karaia be namo, namona be hebou ena program lalonai, motuka atoa gabuna eiava hebouhebou gabuna dekenai idia helai hebou kava lasi. Atendan taudia ese regerege ia karaia tauna do idia sisiba henia bona do idia hamaoroa regerege ia karaia lasi, to mai ena hemataurai ida do idia hadibaia program ena hereva ia hakala henia totona.
16 Iseda hebouhebou dekenai taunimanima idauidau ita boiria dainai, aonega karana be iseda natudia bona kohu ita naria namonamo. Iseda natudia be harihari gaudia namodia Iehova amo. To ita diba tanobada be Satani ena kara dika ia hahedinaraia. Unai dainai, mani emui kara nega ibounai emui natudia idia noho gabuna umui diba be namo. Danu, nega iboudiai kamera, paosi, bona mai edia davana bada gaudia be oi dekenai idia noho bona emu helai gabuna dekenai oi rakatania lasi. Namona be emu motuka oi lokaia namonamo, bona buti dekenai emui kohu umui lokaia eiava umui abia lao. Ta do ia dibagania lasi emu motuka ia makohia totona.
17 Buka gabuna dekenai buka bona magasin momo do idia atoa lasi to bema buka matamatadia idia halasia, unai be sisina momo do idia noho. Bema hebouhebou gabuna dekenai kongregesen ta ena buka be momo, haroro gaukara ai ita gaukaralaia gaudia ma haida danu do idia atoa diba kamonai taudia eiava pablisa taudia ese do idia abia totona. Buka gabuna dekenai, mai edia taravatu gaudia be do idia atoa lasi.
18 Bema oi be mai emu hekwakwanai emu mahuta gabuna dekenai, Mahuta Gabudia ia naria Dipatmen be maoromaoro oi do idia durua diba. Mani emu kara hebouhebou dekenai oi do noho neganai, Mahuta Gabudia ia naria Dipatmen dekenai emu hekwakwanai oi gwauraia. Tadikaka be mai edia moale ida oi do idia durua diba unai hekwakwanai oi hamaoromaoroa totona, unai amo hebouhebou do oi moalelaia diba.
19 Tadikaka bona taihu ese hebouhebou ena hereva idia torea karana be hagoadaia gauna momokanina. Hereva kwadogidia torea karana ese oiemu kamonai karana do idia durua bona hereva badadia do oi laloatao lou. Emu ruma bese taudia eiava turadia ida umui torea herevadia umui herevalaia hebou neganai, unai ese oi ia durua hebouhebou ena hereva oi laloaboio lasi totona.
20 Natudia maragidia be mei rumana dekenai idia lao neganai, tama sina eiava taunimanima badana ma ta ese ia bamodia be namo. Namona be natudia oi hadibaia mei rumana idia gaukaralaia namonamo, edia imana idia huria, bona unai gabu ena goeva karana idia laloa bada totona.
21 Hanaihanai, Iehova ena taunimanima ese edia kontribusen amo tiokratik gaukarana idia durua bada. (Eso. 36:5-7; 2 Siv. 31:10; Roma 15:26, 27) Tanobada ibounai gaukarana durua totona oi henia kontribusen monina be idia gaukaralaia hebouhebou gabudia dekenai idia gaukaralaia gaudia edia davana karaia totona. Mani emu kara, bema seke amo kontribusen monina oi henia, namona be inai ladana “International Bible Students Association Convention” oi torea.
22 Amosa 3:7 dekenai, Iehova ia gwau ‘kara ibounai ia ura karaia neganai, ia ese iena hesiai taudia, peroveta taudia ia hamaorodia guna.’ Iehova be “hunia gaudia ia hedinaraia” tauna dainai, ia ese taunimanima ia hasiahua Baibel ena peroveta herevadia, edia anina idia vara momokani herevadia momo idia torea. (Dan. 2:28, 47) Gwauhamata badadia edia anina be do idia guguru. Lagani 1999 “Dirava Ena Peroveta Herevana” Distrik Hebouheboudia ese oiemu abidadama Dirava ena gwauhamata dekenai do ia hagoadaia momokani. Namona be Iehova ena hereva oi totona be oi kamonai namonamo. Do oi itaia bona kamonai gaudia oi badinaia be namo—haroro gaukara lalonai, kongregesen lalonai, bona oiemu mauri lalonai. Ai guriguri, Iehova ese oiemu hegaegae karadia ibounai do ia hanamoa lauma dalanai aniani bada ia henia hebouhebouna ena dina ta oi reaia lasi totona!
[Blurp on page 3]
Palani oi karaia Friday, Saturday, bona Sunday ai, dina ibounai do oi noho totona!
Lagani 1999 Distrik Hebouhebou Gabudia
NOVEMBER 12-14, 1999
PORT MORESBY (English gado), Gerehu Assembly Grounds (Sekit: 2C Boroko Kongregesen; 2E Daru Kongregesen)
NOVEMBER 19-21, 1999
PORT MORESBY (Hiri Motu gado), Gerehu Assembly Grounds (Sekit: 1A NCD Motu kongregesen iboudiai, Central Province; 2D Gulf Province)
NOVEMBER 26-28, 1999
PORT MORESBY (New Guinea Pidgin gado), Gerehu Assembly Grounds (Sekit 2A NCD Pidgin kongregesen iboudiai)
DECEMBER 3-5, 1999
LAE (New Guinea Pidgin gado), Sir Ignatius Kilage Sports Hall (Sekit: 2B Northern Province; 3A/B Highlands provinsi iboudiai; 4A Morobe Province; 5D Manus Province; 6C Madang Province)
DECEMBER 10-12, 1999
WEWAK (New Guinea Pidgin gado), Wewak Kingdom Hall, Boram Road (Sekit 6A/B Sepik provinsi iboudiai)
DECEMBER 17-19, 1999
KIMBE (New Guinea Pidgin gado), Kimbe High School (Sekit: 5A West New Britain Province; 5B New Ireland Province; 5C East New Britain Province, Tasman Islands, North Solomons)
ALOTAU (New Guinea Pidgin gado, Hiri Motu gado), Cameron High School (Sekit: 1B/C Milne Bay Province)
DECEMBER 24-26, 1999
KIUNGA (New Guinea Pidgin gado, Hiri Motu gado), Kiunga High School (Sekit: 3C Lake Murray kongregesen iboudiai; 3D Kiunga bona Tabubil kongregesen)