Helaga Gaudia Oi Laloa Bada, A?
1 Ta ese ita ia nanadaia helaga gaudia ita laloa bada neganai, haraga herea do ita gwau oibe! Dirava ena helaga gaudia haida, ita laloa bada gaudia unai, be dahaka?
2 Iseda guba Tamana ida ita karaia diba hetura karana ita laloa bada! Ia ese ita ia hagoadaia, bema ‘ia dekenai do ita raka kahirakahira lao, vadaeni ia ese ita dekenai do ia raka kahirakahira mai.’ (Iam. 4:8) Bema Iesu Keriso ena mauri davalaia boubouna be lasi, tau ta lasi ese mauri hanaihanai ia abia diba. (Ioa. 3:16) Dirava amo unai dava bada harihari gauna ita abia dainai, dina ta ta ai mai eda lalo-momokani ida guriguri amo eda tanikiu bada karana ita hahedinaraia.
3 Dirava ena lauma amo ia havaraia Herevana, Buka Helaga unai, be gau helagana ita dekenai, Iehova ena tanobada oreana hegeregerena. Baibel ena hakaua herevadia hegeregerena ita noho, tadikaka lalokau henia karana ita hagoadaia, tiokratik dalana ita badinaia namonamo, bona ita idia hakaua taudia ida ita gaukara hebou amo ita hahedinaraia diba, Iehova ena amo idia mai gaudia ita laloa bada.—1 Pet. 1:22.
4 Hesiai tauna mai ena kamonai bona mai ena kara maoromaoro oreana amo lauma aniani bada herea ita abia. Unai be do ia momokani inai lagani ena “Dirava Ena Hereva Badinaia Taudia” Distrik Hebouheboudia 8 dekenai. Unuseniai, mai anina bada hadibaia herevadia do ita abia bona hebamo namona do ita moalelaia. Unai helaga gauna dainai, edena dala ai mai eda kudouna ibounai ida iseda laloa bada karana ita hahedinaraia?
5 Iehova Ena Ruma Laloaboio Lasi: Nehemia ese Ierusalema ena magu haginia lou totona idia gaukara goada vadaeni taudia ia hagoadaia ‘Dirava ena ruma do idia laloaboio lasi.’ (Neh. 10:39) Hari inai negai, Iehova ena ‘ruma’ be ena tomadiho dalana. Iseda distrik hebouheboudia be unai dala ena kahana ta. Unai dala ita laloaboio lasi totona, namona be hebouhebou dekenai ita noho bona program ita hakala henia namonamo, bena Iehova dekenai ita hahedinaraia ia henia gaudia ita laloa bada. (Heb. 10:24, 25) Dahaka palani be hari ita karaia bena ita hahedinaraia unai hebou helagana ita laloa bada?
6 Dina Toi Oi Lao Henia: Namona be ita ibounai ese dala ita karaia hebouhebou ena dina toi dekenai ita lao totona. Palani ta oi karaia vadaeni, dina ta ta ai do oi ginidae haraga bona do oi noho ela bona Sunday ena guriguri dokona idia haorea, a? Bema unai bamona oi karaia, hahenamo momo do oi abia. Nega haida hebou lao henia be mai ena hekwarahi. Unai dina lalodiai moni gaukara do oi karaia lasi totona, do oi gini goada be namo. Nega haida, hebou dekenai oi lao bona oi mai totona be mai ena hekwarahi. To namo lasi unai gaudia ese emu lalona idia hamanokaia bena hebou do oi lao henia lasi.
7 Inai Haheitalai Namo Hereana Laloa: Lagani gunanai, tuari ia vara Africa tanona ta dekenai, tadikaka haida be distrik hebouhebou dekenai idia lao neganai, dala dekenai tuari oreana ta idia hedavari henia. Tadikaka idia nanadaia “Umui be daidia bona edeseni umui lao?” Tadikaka idia haere: “Ai be Iehova ena Witnes taudia, bona distrik hebouhebouna dekenai ai lao.” Tuari tauna ta ia gwau: “Umui Iehova ena Witnes taudia be gau ta dekenai umui gari lasi. Umui lao sibona, bona emui hebouhebou do umui karaia diba mai hekwakwanai ta lasi. To, namona be umui diba tuari taudia momo do umui hedavari henia. Hanaihanai dala ena huanai dekenai umui raka! Bema umui itaia taunimanima momo idia hebou, dala ena huanai sibona umui raka noho!” Unai bamona idia karaia bona hebouhebou gabuna dekenai idia ginidae namonamo. Unai tadikaka be davana namona idia abia badina idia hahedinaraia helaga gaudia idia laloa bada.
8 Iseda tadikaka Africa dekenai bamona, ita danu ese hekwakwanai momo ita davaria. To edia abidadama ita tohotohoa diba bona iseda lalona ita hadaia distrik hebouhebouna ena kahana ibounai dekenai do ita lao be namo. Bema gau haida ita haidaua be namo, Iehova ena hakaua do ita tahua bona ita diba eda hekwarahi program ibounai lao henia totona, do ia hanamoa.
9 Hahenamo Abia: Dirava ena Hereva ita ura henia, ita diba unai amo hahemauri do ita abia. (1 Pet. 2:2) Distrik hebouhebou ita lao henia bona program ita kamonai henia ese ita ta ta eda abidadama unai Hereva dekenai do ia hagoadaia bona unai dainai do ita hegeregere Satani ena hahetoho idauidau do ita haheaukalaia totona. Unai bamona ita karaia neganai, Iehova bona ita idia itaia taudia ibounai dekenai do ita hahedinaraia helaga gaudia ita laloa bada, bona “ita be boio taudia lasi. Lasi, to ita be abidadama taudia dainai, mauri do ita abia.”—Heb. 10:39; 12:16; Aon. 27:11.
10 Iehova Dirava ese guba ena uindo do ia kehoa bamona bona lauma dalanai hahenamo momo be ita latanai do ia bubua diho. (Mal. 3:10) Namona be emu tahua gauna be “Dirava Ena Hereva Badinaia Taudia” Distrik Hebouhebouna dekenai oi noho, Friday daba ena program ia kehoa ela bona Sunday adorahi guriguri dokona bona “Amen” idia gwauraia murinai! Bema unai bamona oi karaia do oi moale!