Emu Stiuden Tauna Ena Kudouna Oi Hamarerea
1 Iesu be guba dekenai ia do lao lasi neganai, ena hahediba taudia ia hamaorodia idia dekenai ia henia hereva ibounai be ma haida dekenai idia hadibaia, do idia “badinaia” totona. (Mat. 28:19, 20) Tau ta be Keriso ena hahegani ia “badinaia” totona unai hereva ese ena kudouna ia hamarerea be namo. (Aon. 4:4) Edena dala ai, oiemu Baibel stiuden tauna ena kudouna do oi hamarerea?
2 Dirava Ena Heduru Totona Oi Guriguri: Hahediba taudia halaoa gaukarana be Dirava ena gaukara. Ita kwalimu totona, iseda diba lasi to Iena hahenamo be mai anina bada. (Kara 16:14; 1 Kor. 3:7) Unai dainai, ma haida dekenai hereva momokani oi hadibaia totona guriguri amo Iehova ena heduru oi noia be gau badana.—Isa. 50:4.
3 Stiuden Tauna ese Guna Ia Abia Dae Herevadia Oi Diba: Taunimanima ese idia abia dae herevadia bona dahaka dainai idia abia dae ita diba neganai, edia kudouna hamarerea herevadia do ita abia hidi diba. Dahaka dainai hadibaia herevana ta ese stiuden tauna ena lalona ia veria? Dahaka dainai ia abia dae momokani, unai hereva ia abidadama henia diba? Unai bamona diba ese ita do ia durua bona mai laloa kehoa ida do ita hereva diba.—Kara 17:22, 23.
4 Ia Abia Dae Haraga Diba Dalanai Baibel Siridia Oi Herevalaia: Stiuden tauna ese hereva momokani ia lalo-pararalaia be namo. (Kara 17:24-31) Iseda helaro ena badina ita hahedinaraia be namo. (1 Pet. 3:15) To mai hebogahisi bona haheauka ida do oi kara henidia hanaihanai.
5 Emu Hadibaia Karana be Haheitalai amo Oi Durua: Haheitalai ese stiuden tauna dekenai lalo-parara sibona do ia henia haraga lasi to ena kudouna idia hamarerea danu. Haheitalai be lalona bona kudouna idia veria. Iesu be nega momo haheitalai ia gaukaralaia. (Mar. 4:33, 34) Momokani, ia oi durua namonamo totona, umui herevalaia herevana ida bona stiuden tauna ena mauri ida ia hegeregere be namo.
6 Hereva Momokani Abia Dae Karana Ena Namo Oi Hahedinaraia: Taunimanima idia ura idia dibaia gaudia idia badinaia karana amo ia vara namo idia diba. Emu stiuden tauna oi durua, Paulo ena hereva 2 Timoteo 3:14-17 dekenai ena aonega ia itaia totona.
7 Oi lalo-manoka lasi bema haida ese oi hadibaia herevadia idia abia dae lasi. Taunimanima iboudiai edia kudouna ita hamarerea diba lasi. (Mat. 13:15) To, taunimanima haida be abidadama taudia ai idia lao. (Kara 17:32-34) Namona be sivarai namona amo taunimanima edia kudouna oi hamarerea toho karana ese ma momo herea do ia durua, Iesu ena hahegani idia abia dae bona idia “badinaia” totona.