“Lau Gini Goada! Lau Gini Goada! Lau Gini Goada!”
1 Unai hereva, Holocaust amo ia roho mauri abidadama Keristani tauna ta ena hereva, ese idia mauri noho bona idia mase vadaeni Witnes taudia tausen momo edia lalo-goada karana ia hahedinaraia, ena be Nazi taudia ese idia dagedage henidia, to idia abia dae herevadia idia badinaia. (Efe. 6:11, 13) Edia gari lasi karana bona moale bada bona hoa sivaraina be inai kudouna hamarerea vidio Jehovah’s Witnesses Stand Firm Against Nazi Assault amo idia gwauraia. Kongregesen taudia ibounai ai hagoadaia inai vidio idia itaia bona edia lalona ia veria gaudia bona edia hemami amo idia ta ta idia hagoadaia heheni.
2 Inai henanadai ese emu laloa dalana do idia hagoadaia be namo: (1) Dahaka dainai Iehova ena Witnes taudia be Nazi taudia vairanai idia gini goada? (2a) Ta ta hanamoa herevana gwauraia neganai Nazi taudia be dahaka idia karaia bona Witnes taudia be dahaka idia karaia, bona dahaka dainai? (2b) Witnes ruma besedia be unai kara dainai dahaka idia davaria? (3) Witnes taudia hida be dibura kamepadia dekenai idia siaia lao, unuseniai edena maka idia abia, bona Gestapo taudia ese edena bamona idia kara henidia? (4) Iseda tadikaka be dibura amo idia ruhaia totona dahaka idia karaia lasi? (5a) Iehova ena Witnes taudia be edena negai bona dahaka dala ai Hitler ena kara dikadia dainai idia hereva? (5b) Hitler be edena bamona ia kara? (6) Edena dala ai Iehova ena taunimanima edia lalo-tamona karana ese tauanina bona lauma dalanai, idia bona ma haida ia hamauria? (7) Edena Basileia anena be dibura kamepa dekenai idia torea? (8) Edena haheitalai, kamonai tatau, hahine, bona memero edia, ese oi idia hagoadaia Iehova oi badinaia totona, herevana dahaka ia vara? (Mani lagani 1999 Yearbook, rau 144-7 itaia.) (9) Oi be Iehova ena Witnes tauna ta dainai, bona inai vidio oi itaia dainai, oi be inai tanobada ena lasi be edena bamona oi laloa?
3 Inai Stand Firm vidio lalonai, Iehova ena Witnes taudia edia haheitalai namodia ese matamata taudia, Witnes lasi taudia danu, do idia durua diba, bena idia ese taunimanima idauidau abia dae lasi karana, bamodia edia lalo-ani karadia, bona lalona ena mamina hadikaia diba gaudia idia davaria neganai idia gini goada diba. Bema oi be haisikuli eiava sikuli badadia oi lao henia, emu tisa taudia dekenai dala do oi kehoa diba, bona inai vidio be klas dekenai do umui itaia, a? Reana idia dekenai vidio oi henia neganai oi gwau, ia ese momo idia diba lasi sivaraina eiava kara maorona ia hahedinaraia.
4 Inai Stand Firm vidio be tulu namona bona ia hahedinaraia Dirava ena hahediba herevadia amo lauma dalanai goada ita abia bena Dirava do ia hamoalea dalana maorona ai do ita goada noho diba. (1 Kor. 16:13) Hereva momokani idia ura henia taudia ibounai dekenai inai vidio umui hahedinaraia be namo.