Sekit Hebouhebou Ena Program Matamata

Gari ena anina ta be “Dirava matauraia bada karana.” Unai be Baibel lalonai idia gwauraia gari karana maorona ia hahedinaraia, ia be “aonega hamatamaia ena dala.” (Sal. 111:10) To gari ma ta be ia idau, ia be Satani ena tanobada ia biagua gauna. Edena dala ai unai gari kererena ita dadaraia bona mai hemataurai ida Iehova gari henia karana ita habadaia noho? Lagani 2002 hesiai laganina ena sekit hebouhebou program matamatana ese unai henanadai ia haerelaia. Ena sinado be “Dirava Gari Henia Bona Hanamoa Bada.” (Apok. 14:7) Ita ta ta bona ita ibounai orea ta bamona ese Iehova gari henia karana amo namo ita abia daladia momo do ita lalo-pararalaia.

Ena be gari ese reana lalo-hekwarahi eiava boga-auka lasi karana bona hekwakwanai badadia haheaukalaia lasi karana ia hahedinaraia, to Baibel ia gwau: “Lohiabada dekenai idia gari noho taudia ibounai be namo.” (Sal. 128:1) Tomadiho momokani koua gaudia ita haheaukalaia diba dalana be unai hebouhebou ena program ese do ia hahedinaraia. Do ita itaia edena bamona ita ese matamata taudia ita durua diba Dirava gari henia karana idia habadaia totona, unai ese idia ia hagoadaia bena Iehova do idia hesiai henia mai edia kudouna, tauanina, lalona, bona goada ibounai ida. (Mar. 12:30) Dina ginigunana ena hereva dokona be distrik naria tauna ese do ia henia, ena sinado be “Emu Lalokau Taudia Kahirakahira Dekenai Oi Lao Noho.” Do ia hahedinaraia edena bamona ita ese Diabolo amo ita gima noho diba, ia hekwarahi ita be iseda ruma bese, bona Keristani tadikaka amo ia hakaua oho totona.

Dina iharuana ena hereva ta mai ena kahana hani ena sinado be, “Iehova Gari Henia, Taunimanima Gari Henia Lasi.” Do ia hahedinaraia dahaka dainai bona edena dala ai gari mamina do ita haorea, iseda haroro gaukara ia koua lasi eiava sikuli ai bona gaukara gabuna ai iseda abidadama bona lalona ena hemami namona ita dogoatao totona. Pablik tok ena sinado be, “Dirava Oi Gari Henia Bona Iena Oda Oi Badinaia,” bona inai hereva be Apokalupo karoa 14 amo idia abia. Sekit hebouhebou be inai hagoadaia herevana, “Iehova Gari Henia Dalana ai Umui Raka Noho” amo do idia hadokoa.

Tiokratik Haroro Sikuli, Hesiai Hebou, bapatiso herevana, bona Gima Kohorona Stadi ena hereva badadia be program ena hereva badadia ma haida, bona idia oi reaia lasi be namo. Emu Baibel stadi taudia oi boiria oi ida hebou dekenai umui lao hebou. Idia ura bapatiso idia abia taudia be hakaua naria tauna idia hadibaia haraga be namo. Ita ibounai ita ura Iehova ita gari henia bona ia dekenai hairai ita henia dainai unai program namona ena kahana ta do ita reaia lasi!