Lauma Dalanai Oi Aniani Namonamo Eiava Lasi?
1 Hereva ta ia gwau, ‘iseda tauanina ena goada be iseda aniani dalana ese ia hahedinaraia.’ Momokani, iseda tauanina ena goada bona namo be iseda aniani dalana ese ia haidaua diba. Iesu ia gwau: “Aniani sibona dekena amo taunimanima do idia mauri lasi, to Iehova ena uduna dekena amo idia mai hereva ibounai ese mauri ia henia,” unai dainai iseda lauma aniani ania dalana ese ita do ia hanamoa eiava hadikaia diba. (Mat. 4:4) Unai dainai, lauma dalanai oi aniani namonamo eiava lasi? Oi ura henia gauna sibona oi ania, a? Oi aniani haragaharaga, a? Eiava nega oi atoa, hanaihanai oi do ia hagoadaia lauma aniani namona oi moalelaia totona, a?
2 Emu Aniani Oi Laloa Namonamo: Iehova be “hesiai tauna mai ena kamonai, bona mai ena kara maoromaoro” amo ‘aniani neganai’ “aniani namodia momokani” ia henia. (Mat. 24:45; Isa. 25:6) Iehova ese mai lalokau ida ia henia gaudia amo namo ita abia totona, namona be lauma dalanai ita aniani namonamo.
3 Reana sibona oi nanadaia: ‘Dina ena siri bona ena hereva be dina ta ta ibounai lalonai lau duahia, a? Baibel be dina ta ta lau duahia bona lau laloa dobu, a? Kongregesen heboudia do ai stadilaia gaudia lau hegaegaelaidia, a? Iseda buka bona magasin matamatadia lau duahia, a?’
4 Iesu ia gwauhamata ia gwau: “Idia diba lauma gaudia idia tahua be namo taudia idia moale,” bona “Dirava ena kara maoromaoro idia ura dikadika idia karaia taudia be idia namo, badina be Dirava ese boga kunu do ia henidia.” (Mat. 5:3, 6; NW) Unai dainai lauma dalanai oi aniani namonamo, emu lalona bona kudouna be Dirava ena diba amo oi hahonua.