“Edena Bamona Nega Do Lau Davaria Diba?”
1 Unai be ita momo eda maumau herevana, badina iseda mauri lalonai gau idauidau ita karaia. Taunimanima idia gwau nega be iseda dava bada gauna bona ia ore haraga danu. Unai dainai edena bamona nega do ita davaria diba mai anina bada gaudia, hegeregere Dirava ena Hereva ita duahia bona ita stadilaia totona?—Fili. 1:10.
2 Gau badana be, nega ita habadaia lasi, to ita dekenai ia noho negana lalonai ita ura dahaka ita karaia. Ita ibounai iseda hora pura ta lalonai be 168, reana hora 100 be mahuta bona gaukara dekenai ita haorea. Unai dainai edena dala ai hora oredia do ita gaukaralaia namonamo diba? Efeso 5:15-17 ia gwau ‘aonega taudia bamona do ita raka, kavakava taudia bamona lasi, bona harihari iseda nega namona ia noho Dirava ena kara do ita karaia totona.’ Ia hahedinaraia nega namodia iboudiai ita gaukaralaia namonamo Iehova ese ia gwauraia mai anina bada gaudia ita karaia totona.
3 Iesu ese iseda nega be Noa ena nega ida ia hahegeregerea. (Luka 17:26, 27) Taunimanima be dina ta ta iboudiai mauri lalonai idia karaia gaudia dekenai idia bisi bada. To, Noa be nega ia atoa lagatoi do ia karaia bona ia haroro totona. (Heb. 11:7; 2 Pet. 2:5) Edena dala ai nega ia davaria? Dirava ena ura ia atoa guna bona ia badinaia amo, anina be iena ‘hereva ibounai hegeregerena’ ia karaia.—Gen. 6:22.
4 Dahaka Ita Atoa Guna be Namo? Iesu ia gwau: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.” (Mat. 4:4) Pura ta ta ibounai, ita be ‘aniani neganai lauma aniani’ ita abia. (Luka 12:42) Unai ena anina be hanaihanai sibona eda duahiduahi bona stadi amo unai ibounai ita ania namonamo be namo bema ita ura namo bada ita abia. Lauma aniani ita laloa bada dainai, ia be aniani nadua sitoa amo aniani ita abia bamona ita laloa lasi, ita ania haragaharaga lasi, hegeregere ta be aniani korikori ia anina haragaharaga bamona. To, lauma gaudia ita laloa bada dainai nega ita atoa ita stadilaia bona ita moalelaia totona.
5 Lauma aniani amo mauri hanaihanai do ita abia. (Ioa. 17:3) Iseda dina ta ta ena sediual lalonai ia be gau badana. Baibel duahiduahi bona Keristani heboudia ita hegaegaelaidia totona, nega do ita davaria diba, a? Oibe, ita davaria diba. Bena, ita ese Dirava ena ura ita dibaia bona ita karaia amo “noho mauri namona momokani” do ita abia.—Sal. 19:7-11.