Emu Lalo-Parara Oi Habadaia

¹ Hari ita noho negana, lalohisihisi ena nega ena dokona dekenai, Dirava ena taunimanima be gabu ibounai dekenai metau momo bona hahetoho badadia idauidau idia davaria. (2 Tim. 3:​1-5) Abidadama dekenai ita gini goada totona, ita ibounai dekenai lalona hagoadaia karana be mai anina bada. (1 Kor. 16:13) Iehova ena heduru amo unai bamona do ita karaia diba bema hanaihanai ena Hereva ita duahia, ena lauma helaga dekenai ita tabekau, bona ena orea ita badinaia.​​—Sal. 37:28; Roma 8:​38, 39; Apok. 2:10.

² Mai badina namona dainai, inai sinado “Tau Badadia Bamona Dobu Gaudia Umui Lalo-Pararalaia” be ia hanaia hesiai laganina ena dina tamona hebouna dekenai idia henia. Unai hereva be 1 Korinto 14:20 amo idia abia, unuseniai aposetolo Paulo ena hereva ita duahia, ia gwau: “Lauegu varavara taudia e, natuna maragi bamona do umui laloa lasi. Momokani, dika karaia totona natuna maragi bamona do umui laloa karaia. To inai laloa dobu gaudia totona, tau badadia bamona inai gaudia do umui laloa.” Mani program ena hereva badadia haida ita laloa lou.

³ Lalo-Parara Ita Habadaia Totona Diba Maoromaoro be Gau Badana: Hereva ginigunana, “Hari Emu Lalo-Parara Oi Habadaia be Namo” lalonai, inai nega ena hekwakwanai ita hanaia totona, hereva henia tauna ese dahaka mai anina bada gauna ia herevalaia? Diba gaukaralaia siahuna ita habadaia be namo. Namona be iseda lalo-parara Baibel dekenai ita hanamoa bona ita habadaia, kara dika ibounai ese ita ia halusia garina. Inai lalo-parara be Dirava ena heduru amo ia vara gauna. Salamo torea tauna bamona, iseda guriguri amo Iehova ita noia iena taravatu bona hadibaia herevadia ita lalo-pararalaia totona, unai amo mai iseda kudouna ida ia do ita hesiai henia.​​—Sal. 119:​1, 2, 34.

⁴ Hereva ma ta lalonai, sekit naria tauna ese ia hahedinaraia Iehova be ena Hereva bona ena orea amo “Tau Badadia Bamona Baibel Lalo-Pararalaia Totona Heduru Gaudia” ia henia. Lalo-parara ena anina be “lalona ai gau ta oi itaia bena ena kahana ta ta bona idia ibounai idia hakapua dalana oi laloa.” Daika ese ita do ia durua unai diba ita habadaia totona? Iehova be taunimanima dekenai tatau haida harihari gaudia bamona ia henia, ita do idia durua lauma dalanai ita goada totona. (Efe. 4:​11, 12) Iena tanobada oreana ese ita ia hagoadaia Dirava ena Hereva be dina ibounai ita duahia bona kongregesen heboudia ibounai dekenai ita lao hanaihanai totona. (Sal. 1:2) Sibona eda stadi bona ruma bese stadi lalonai Baibel bona Keristani buka bona magasin gaukaralaia dalana bona hebou bona haroro gaukara totona hegaegae daladia idia hadibaia. Idia hegaegaelaia daladia ibounai oi gaukaralaia, a? Sibona emu Baibel duahiduahi karana oi badinaia noho, a? Unai be gau badana bema ita ura tanobada taudia edia kara, idia badinaia daladia, lalohadai, bona lalona veria tarapudia amo ita siri.​​—Kol. 2:​6-8.

⁵ Iseda Lalona Ita Hadibaia be Namo: Hereva ia henia vadivadi tauna ena hereva ginigunana, ena ladana be “Emu Lalona Oi Hadibaia amo Lauma Dalanai Sibona Oi Gimaia” lalonai, ia gwau tanobada taudia be maoro bona kerere edia idau idia diba lasi. (Isa. 5:​20, 21) Unai ia vara badina idia ura lasi Dirava ena kara maoromaoro taravatudia idia abia dae bona idia badinaia. To ita, Iehova ena orea ese lauma dalanai ia hadibaia taudia, be Dirava ena taravatu, iseda gaukara bona kara ia gimaia taravatudia, ita diba. Unai dainai, sibona dekenai ita hamomokania diba Iehova ena matanai dahaka be namo bona maoro bona iena ura goevana hegeregerena.​​—Roma 12:2.

⁶ Tanobada taudia edia laloa daradara bona ia havaraia huahua dikadia ita dadaraia totona, iseda lalona ita hadibaia noho be gau badana. Edena bamona unai ita karaia diba? Heberu 5:​12-​14 ena hereva hegeregerena, aposetolo Paulo ia gwau hereva ena “rata” sibona ita inua be hegeregere lasi. Lauma aniani korikori ita abia be gau badana. Ita dibaia gaudia ita badinaia be namo. Unai ita karaia neganai, ita diba momokani Iehova ena hakaua herevadia bona taravatu be maoro. Unai ese iseda lalona ia hadibaia maoro bona kerere edia idau ita itaia goevagoeva totona.

⁷ To madi, haida be lauma dalanai idia manoka. Dahaka dainai? Idia ese Iehova ena matanai dahaka be namo bona maoro idia tahua goadagoada lasi. Unai dainai, idia be televisen program bona Baibel ese ia taravatua vidio, miusik, eiava Internet amo idia mai gau dikadia ese ia hamorudia. Bema aonega dalanai ita kara, matabodaga, kavakava, eiava kara dika taudia do ita dadaraia.​​—Aon. 13:20; Gal. 5:7; 1 Tim. 6:​20, 21.

⁸ Matamata Taudia be “Dika Karaia Totona Natuna Maragi Bamona” Idia Laloa be Namo: Inai program ena kahana rua ai, matamata taudia ia hagoadaia edia lalo-parara idia habadaia be namo. Hereva henia tauna ese ia hahedinaraia “kara dika dekenai ita be natuna maragina bamona” ena anina be Iehova ena matanai idia miro gaudia dekenai aonega ita tahua lasi, eiava kerere lasi natuna bamona ita noho. (1 Kor. 14:20) Ita ibounai idia hagoadaia iseda nega ita gaukaralaia dalana ita naria namonamo be gau badana, unai amo kara dika idauidau do ita dadaraia bona ita do idia hamiroa lasi. (Efe. 5:​15-17) Ita idia hagoadaia lauma dalana ai iseda goada bona lalo-parara idia habadaia lasi herevadia ita duahia ena nega mani ita tahua. Unai oi karaia vadaeni, a? Dahaka ia hahedinaraia? Namona be Baibel oi duahia, bona oi hekwarahi bada iseda orea ese ia halasia bukadia bona magasin oi duahia. Bema unai ita karaia neganai ita ibounai do ia durua, bona matamata taudia be “laloa kehoa” do idia abia danu.​​—Aon. 4:​7-9.

⁹ “Mai Lalo-Parara ida Baibel Ena Hakaua Herevadia Badinaia amo Namo Oi Abia”: Unai be dina tamona ena program ena koua herevana ena sinado. Ia vadivadi hereva henia tauna ia gwau Iehova be mauri havaraia lalo-parara ena Badina, taunimanima ibounai dekenai unai be namo herea. Inai oi laloa, dala ia kehoa Iehova ena lalo-parara oi abia totona! Ia ese mai momokani ida idia tahua bona mai abidadama ida idia noia taudia dekenai do ia henia. (Aon. 2:​3-5, 9; 28:5) Ia henia gaudia ibounai oi gaukaralaia, a?

¹⁰ Ita idia hagoadaia, Baibel ita duahia neganai hakaua herevadia ita dibaia be namo. (2 Tim. 3:​16, 17) Iehova ese ia gwauraia herevadia oi stadilaia namonamo, lalo-parara maorona oi abia totona. Nega oi atoa unai hakaua herevadia oi laloa dobu bona emu lalona bona kudouna dekenai oi atoa. Unai ese emu lalona do ia durua emu mauri lalonai abia hidi maorodia oi karaia totona. (Ios. 1:8) Momo ese idia davaria hekwakwanai haida ita laloa bona Baibel ena hakaua herevadia badinaia karana ena heduru amo do ita hanaia dalana ita itaia.

¹¹ ‘Dabua bona tauanina ena toana idauna lau abia dae be namo, a?’ Nega momo tanobada ena dabua mai sitailo idauna bona tauanina ena toana ese gwau-edeede urana ia hahedinaraia. Unai ura ese taunimanima ia doria dabua idia karaia namonamo lasi bona edia toana be namo lasi eiava tauanina ena toana idia hahedinaraia. Edena Baibel ena hakaua herevadia ese ita do ia durua unai ura ita dadaraia totona? Bema iseda lalona ita hadibaia, ita ese 1 Timoteo 2:​9, 10 ia hahedinaraia hakaua hereva do ita badinaia, dabua do ita karaia “mai manau bona mai mataurai danu . . . , Dirava idia matauraia [taudia] edia kara korikori” hegeregerena. Unai kara dekenai, hakaua hereva ma haida be 2 Korinto 6:3 (NW ) bona Kolose 3:​18, 20 ese idia gwauraia.

¹² ‘Egu ruma bese ia goada totona dahaka do lau karaia?’ Ruma bese lalonai herevahereva karana namona be gau badana. Iamesi 1:19 ia gwau: “Umui ta ta ibounai ese hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi.” Ruma bese lalonai herevahereva karana be mai ena kahana rua dainai, ruma bese idia hereva heheni bona kamonai heheni be namo. Ena be ita gwauraia herevana be maoro, to bema mai eda dagedage, hekokoroku, eiava hebogahisi lasi ida ita gwauraia, namo do ia havaraia lasi, to reana dika bada do ia havaraia. Herevana ita be tau o hahine, tama sina o natu, namona be “mai laloa namona bona mai gado namo” ida ita hereva.​​—Kol. 4:6.

¹³ ‘Kohu ura henia karana ese lau ia hametaua, a?’ Kohu ura henia karana ese ta ena mauri lalonai hekwarahi ia habadaia. Ta ia durua lasi moale korikori ia abia totona. (Had. 5:10; Luka 12:15; 1 Tim. 6:​9, 10) Kohu ura henia karana ita dadaraia totona, Iesu ese inai mai anina bada hakaua herevana ita ia hadibaia, ia gwau: Oiemu matana do ia namo noho. Mauri dala maorona, hekwarahi bada lasi maurina, be Basileia gaukarana ita atoa guna, gau oredia ibounai be gabeai.​​—Mat. 6:​22, 23, 33.

¹⁴ Iseda Tahua Gauna: Dirava ena Hereva lalonai hakaua hereva maorodia idia noho, ita idia durua abia hidi ita karaia totona. Unai hakaua herevadia ita dibaia, laloa dobu, bona iseda mauri lalonai do ita badinaia dalana ita lalo-pararalaia be namo. Bema iseda ‘lalona ita hadibaia lou, maoro bona kerere edia toana ita diba namonamo’ totona, namo bada do ita davaria bona Iehova do ita hanamoa bada.​​—Heb. 5:14.