“Umui Sibona Emui Kara Do Umui Tahua”

“Umui sibona emui kara do umui tahua, bona emui mauri do umui tohoa, umui be abidadama korikori taudia o lasi.”​—⁠2 KORINTO 13:⁠5.

1, 2. (a) Ita abia dae herevadia ita daradaralaia dainai, dahaka ia vara diba ita dekenai? (b) Korinto kongrigeisen ginigunana ai dahaka ia vara dainai, haida idia diba lasi edena dala do idia badinaia?

TAU ta be hanua ta dekenai ia lao lalonai, ia badinaia dala be dala rua ai ia lao. Ia diba lasi edena dala be dala maorona unai hanua dekenai ia lao totona, unai dainai dala ai idia raka taudia ia nanadaia edena be dala maorona, to hereva idauidau idia gwauraia. Ia daradara dainai, ena laolao ia haorea lasi. Unai bamona ia vara diba ita dekenai, bema ita abia dae herevadia ita daradaralaia. Unai daradara karana dainai abia hidi maorona do ita karaia lasi, bena ita diba lasi edena dala do ita badinaia.

² Greece ai, Korinto kongrigeisen ginigunana lalonai ia vara hekwakwanai ta dainai, kongrigeisen taudia haida be idia daradara. “Aposetolo namo herea” ese aposetolo Paulo ena dagi idia hepapahuahulaia, idia gwau: “Paulo ena revareva be mai metau bona mai siahu danu, to ia sibona ita dekenai ia ginidae, bona iena tauanina ita itaia neganai, ia be manoka bona iena hereva be mamina lasi.” (2 Korinto 10:​7-12; 11:​5, 6) Unai bamona lalohadai dainai Korinto kongrigeisen taudia haida idia diba lasi edena dala do idia badinaia.

3, 4. Dahaka dainai Paulo ena sisiba Korinto taudia dekenai ita laloa bada be namo?

³ Lagani 50 C.E. ai, Paulo be Korinto ia vadivadi henia neganai, kongrigeisen ta ia hamatamaia. Paulo be Korinto ai “lagani ta bona hua 6 unuseni ia noho, Dirava ena hereva ia hadibaia.” Oibe, “Korinto taudia momo danu ese Paulo ena haroro idia kamonai, idia abia dae danu, bona bapatiso idia abia.” (Kara 18:​5-11) Paulo ese ena Korinto tadikaka edia lauma dalana ia laloa bada. Danu, Korinto taudia be Paulo idia tore henia, iena sisiba gau haida dekenai idia abia totona. (1 Korinto 7:⁠1) Unai dainai idia dekenai sisiba namodia ia henia.

⁴ Paulo ia gwau: “Umui sibona emui kara do umui tahua, bona emui mauri do umui tohoa, umui be abidadama korikori taudia o lasi.” (2 Korinto 13:⁠5) Bema Korinto tadikaka ese unai sisiba idia badinaia, do idia daradara lasi edena dala dekenai do idia raka. Hari inai negai danu, Paulo ena sisiba be mai anina bada ita dekenai. Paulo ena sisiba be edena bamona ita badinaia diba? Edena bamona iseda kara ita tohoa diba bema ita be abidadama taudia eiava lasi? Bona edena bamona iseda kara ita tahua diba?

‘Umui Sibona Umui Tohoa Noho, Umui be Abidadama Korikori Taudia Eiava Lasi’

5, 6. Dahaka hahetohoa gauna amo iseda kara ita tohoa, bema ita be abidadama korikori taudia eiava lasi, bona dahaka dainai unai be hahetohoa gauna namona?

⁵ Nega momo test dekenai, tau ta ena diba eiava gau ta idia tohoa neganai, idia tahua ia be unai test ena maka ia abia eiava lasi. Iniseniai, ita be iseda abidadama​—⁠ita abia dae gaudia unai​—⁠ita tohoa karana ita herevalaia lasi. To ita tohoa gauna be ita sibona iseda kara. Unai ita karaia totona, maka hereadaena ta amo iseda kara ita tohoa, ia be unai maka ida ia hegeregere eiava lasi. Salamo torea tauna Davida ia gwau: “Lohiabada ena Taravatu be ia namo momokani. Ia ese taunimanima edia lauma ia hamauria lou. Lohiabada ena hadibaia hereva be momokani vadaeni. Idia ese aonega lasi taudia dekenai, aonega idia henia. Lohiabada ena Taravatu be idia maoromaoro vadaeni. Unai Taravatu idia badinaia taudia ese, moale idia davaria noho. Lohiabada ena oda be diari hegeregerena. Idia ese taunimanima edia laloa idia hadiaria.” (Salamo 19:​7, 8) Baibel lalonai Iehova ena taravatu goevadaedia, oda maoromaorodia, hadibaia herevadia, bona hahegani idia noho. Unai hereva be maka hereadaena iseda kara ita tohoa totona.

⁶ Aposetolo Paulo ese Dirava ena lauma amo ia vara herevana ia herevalaia neganai, ia gwau: “Dirava ena hereva be ia mauri noho, bona ia be mai ena siahu. Ia be mai ena matana momokani. Iena matana ese kaia mai ena kahana ruaosi ena matana ia hereaia momokani. Ia ese tau ta ia gwadaia neganai, unai tau ena lalona momokani dekenai ia vareai. Ia vareai ela bona lalona bona lauma ruaosi ia hapararaia. Bona ia ese iseda lalona bona iseda kudouna ena ura ibounai ia tahua diba.” (Heberu 4:12) Oibe, Dirava ena hereva amo iseda kudouna eiava iseda lalohadai korikori ita tohoa diba. Edena bamona unai hereva mai ena siahu bada ita gaukaralaia diba? Dirava ena hereva amo iseda kudouna ita tohoa dalana be salamo torea tauna ese ia hahedinaraia goevagoeva. Ane ia abia, ia gwau: “Inai bamona taudia be idia moale momokani: . . . Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai.” (Salamo 1:​1, 2) Iehova “ena taravatu” be Dirava ena Hereva, Baibel lalonai ia noho. Namona be Iehova ena Hereva duahia karana ita moalelaia. Oibe, nega ita atoa ita sibona dekenai ita duahia eiava ita duahia gaudia ita lalohadailaia. Unai bamona ita karaia neganai, namona be ita duahia herevadia amo iseda kara ita tohoa.

7. Edena dala badana amo iseda kara ita tohoa diba, bema ita be abidadama korikori taudia eiava lasi?

⁷ Bema ita ura diba ita be abidadama taudia eiava lasi, sibona eda kara ita tahua dala badana be, Dirava ena Hereva ita duahia bona laloa dobu, bona ita tahua bema ita dibaia gaudia be iseda kara amo ita hahedinaraia eiava lasi. Bona ita moale badina gau momo ese ita idia durua Dirava ena Hereva ita lalopararalaia totona.

8. Edena dala ai “hesiai tauna mai ena kamonai, bona mai ena kara maoromaoro” ese ita idia durua iseda kara ita tohoa totona, bema ita be abidadama korikori taudia eiava lasi?

⁸ Iehova ese “hesiai tauna mai ena kamonai, bona mai ena kara maoromaoro” edia buka amo hadibaia herevadia bona Baibel siri edia anina ia gwauraia hedinarai. (Mataio 24:45) Hegeregere, Iehova Kahirakahira Oi Laoa bukana ena karoa momo edia dokonai, maua ladana “Oi Laloa Dobu Gaudia” ia noho. Unai buka ese dala ia kehoa idia noho henanadai ita laloa dobu totona! Gima Kohorona bona Awake! magasin be gau momo idia herevalaia, ita idia durua iseda kara ita tahua totona, ita be abidadama korikori taudia eiava lasi. Vanegai idia halasia Gima Kohorona lalonai Aonega Herevadia bukana ia herevalaia, Keristani hahine ta ese unai ia herevalaia neganai, ia gwau: “Lau davaria unai atikol edia hereva be namo herea. Lau idia durua bena lau itaia bema egu hereva, kara, bona laloa dalana be Iehova ena kara maoromaoro taravatudia ida idia hegeregere.”

9, 10. Iehova ese ita dekenai dahaka ia henia, unai ese ita idia durua sibona eda kara ita tohoa totona, ita be abidadama korikori taudia eiava lasi?

⁹ Danu, kongrigeisen heboudia, sekit bona distrik hebouhebou dekenai hakaua hereva namodia momo ita abia. Isaia ese Dirava ena amo unai lauma aniani idia abia taudia ia herevalaia neganai, ia gwau: “Nega gabeai be inai bamona do ia vara: Lohiabada ena Dubu Helaga ia gini ororona, be ataiai momokani ororona do ia lao. Inai ororo be ia ese, ororo ibounai do ia hereaia. Bese ibounai ese ia dekenai do idia haboua lao. Bona edia taunimanima do idia gwau, ‘Umui mai, Lohiabada ena ororo dekenai do ita daekau, . . . Ia ese iena kara ita dekenai do ia hadibaia, bona ita ese unai Dirava ena dala dekenai do ita raka.’ ” (Isaia 2:​2, 3) Iehova ena kara idauidau dekenai unai bamona hadibaia herevadia ita abia be hahenamo badana.

¹⁰ Iseda kara ita tohoa dalana ta be, bema lauma dalanai idia goada taudia, hegeregere elda taudia be sisiba idia henia, ita abia dae be namo. Baibel ese idia be inai bamona ia gwauraia: “Lauegu varavara taudia e, bema Keristani tauna ta ia kerere neganai, umui Lauma Helaga umui kamonai henia taudia ese unai tau do umui hakaua lou, mai manau danu. To umui naria namonamo, dibagani ese umui danu do ia koia garina.” (Galatia 6:⁠1) Ita moale bada diba, badina unai tadikaka idia noho iseda kara idia hamaoromaoroa totona!

11. Bema ita ura diba ita be abidadama korikori taudia eiava lasi, dahaka ita karaia be namo?

¹¹ Iseda buka bona magasin, Keristani heboudia, idia abia hidi taudia​—⁠idia ibounai be Iehova ese ia henia harihari gaudia. Bema ita ura diba ita be abidadama korikori taudia eiava lasi, namona be sibona iseda kara ita tahua namonamo. Unai dainai, buka o magasin ita duahia eiava Baibel ena sisiba ita kamonai neganai, gau badana be ita sibona ita nanadaia: ‘Inai be egu kara ia herevalaia, a? Unai gaudia lau karaia, a? Lau be Keristani hadibaia herevadia ibounai lau badinaia noho, a?’ Unai dala amo ita abia herevadia ita laloa karana ese do ia hahedinaraia, lauma dalanai ita be edena bamona. Baibel ia gwau: “Tauanina ia abidadama henia tauna ese Dirava ena Lauma gaudia ia abia dae diba lasi, badina be ia dekenai idia be kavakava bamona. . . . Lauma Helaga ia abia vadaeni tauna ese gau ibounai edia anina ia diba.” (1 Korinto 2:​14, 15) Namona be ita hekwarahi iseda buka, magasin, bona buka ma haida amo ita duahia gaudia, bona hebou bona elda taudia amo ita kamonai herevadia be lauma dalanai ita lalodia maoromaoro totona, ani?

‘Umui Sibona Emui Kara Do Umui Tahua Noho’

12. Iseda kara ita tahua ena anina be dahaka?

¹² Sibona iseda kara ita tahua totona, namona be sekea gaukarana ita karaia. Oibe, ena be ita be hereva momokani lalonai ita noho, to hereva momokani ita badinaia goevagoeva, a? Danu, iseda kara ita tahua ena anina be ita hamomokania ita be lauma dalanai ita lo bona lauma gaudia ita laloa bada.

13. Heberu 5:14 ena hereva hegeregerena, dahaka ese ia hamomokania ita be lo taudia?

¹³ Ita sibona eda kara ita tahua neganai, dahaka ese ia hamomokania ita be lo Keristani taudia? Aposetolo Paulo ia gwau: “Aniani korikori be tau badadia idia ania diba. Idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.” (Heberu 5:14) Iseda lalona ita hadibaia loulou karana amo ita hahedinaraia ita be lo taudia. Gadara tauna be spot ta dekenai ia kwalimu totona, treinini lalonai ena tauanina ena masolo ia gaukaralaia loulou be namo, unai hegeregerena ita danu ese Baibel ena hakaua herevadia be iseda mauri lalonai ita gaukaralaia, unai amo iseda lalona ita hadibaia loulou diba.

14, 15. Dahaka dainai ita hekwarahi be namo Baibel ena hereva dobudia ita stadilaia totona?

¹⁴ To, iseda lalona ita hadibaia totona, gau badana be diba ita abia. Hanaihanai sibona eda stadi ita karaia, bona Baibel lalonai idia noho dobu gaudia ita stadilaia neganai, iseda laloparara ita habadaia. Idia hanaia laganidia lalonai, hereva dobudia momo be Gima Kohorona lalonai idia herevalaia. Bema Gima Kohorona lalonai hereva dobudia ita itaia, edena bamona ita kara? Edia ‘anina be idia auka’ bona ita lalopararalaia lasi dainai, ita duahidia lasi, a? (2 Petero 3:16) Namona be ita hekwarahi unai hereva dobudia ita lalopararalaia totona.​—⁠Efeso 3:⁠18.

¹⁵ To edena bamona bema sibona eda stadi ita karaia be auka? Gau badana be ita hekwarahi stadi ura henia karana ita habadaia totona.b (1 Petero 2:⁠2) Lo taudia ai ita lao totona, namona be aniani korikori ita ania, anina be Baibel ena hereva momokani dobudia ita stadilaia. Bema unai bamona ita karaia lasi, lalohadai namona do ita abia lasi. To, lo taudia ai ita lao totona, lalohadai namona ita abia sibona be hegeregere lasi. Namona be sibona eda stadi amo ita dibaia gaudia be iseda dina ta ta maurina lalonai ita badinaia.

16, 17. Hahediba tauna Iamesi ese ‘hereva badinaia’ karana dekenai dahaka sisiba ia henia?

¹⁶ Sibona eda kara ita tahua dalana ta be, iseda kara​—⁠abidadama karadia unai​—⁠amo ita hahedinaraia hereva momokani ita laloa bada. Hahediba tauna Iamesi ese sibona eda kara tahua karana ia herevalaia neganai, mai anina bada haheitalai ta ia gaukaralaia, ia gwau: “Dirava ena hereva do umui kamonai kava lasi, to umui badinaia danu. Bema umui kamonai kava, umui sibona umui koia noho. Bema tau ta be hereva ia kamonai sibona, to ia badinaia lasi, ia be sibona ena vairana ena toana hevarivari lalonai ia itaia bamona. Iena vairana ena toana korikori ia itaia, vadaeni ia raka siri, bona maoromaoro iena vairana ena toana ia laloaboio momokani. To taravatu namona bona goevagoeva momokani ia noho, ia ese kara dika ena siahu dekena amo ita ia ruhaia vadaeni. Tau ta bema inai taravatu ia itaia namonamo noho, bona ia badinaia noho, bona ia kamonai kava lasi, to ia karaia momokani neganai, unai tau be namo. Dirava ese unai tau, iena kara ibounai lalonai, do ia hanamoa.”​—⁠Iamesi 1:​22-25.

¹⁷ Iamesi ena hereva ena anina be: ‘Dirava ena hereva, hevarivari bamona gauna, lalonai oi sibona oi itaia namonamo. Unai bamona oi karaia noho, bona Dirava ena hereva ena diari amo emu kara oi tahua namonamo. Bena, oi itaia gauna oi laloaboio haraga lasi. Bema oi itaia gau haida oi hamaoromaoroa be namo, vadaeni oi karaia.’ Nega haida unai sisiba ita badinaia be auka.

18. Dahaka dainai Iamesi ena sisiba ita badinaia be mai ena hekwarahi?

¹⁸ Hegeregere, Basileia ena sivarai namona harorolaia gaukarana ena hahegani, mani ita laloa. Paulo ia gwau: “Iseda kudouna ena abidadama dekena amo Dirava ena vairanai do ita maoromaoro, bona inai abidadama be iseda uduna dekenai ita gwauraia hedinarai, be mauri do ita davaria.” (Roma 10:10) Iseda uduna amo eda abidadama ita gwauraia hedinarai totona, iseda kara haida ita haidaua be namo. Ita haida be ita hekwarahi haroro gaukara ita karaia totona. Unai gaukara ita karaia goadagoada bona iseda mauri lalonai ita atoa guna totona, gau badana be iseda kara ita haidaua bona iseda ura gaudia haida ita dadaraia. (Mataio 6:33) To unai gaukara ita karaia matamaia neganai, do ita moale badina unai gaukara amo Iehova ena ladana ita hanamoa. Vadaeni, ita be Basileia harorolaia goadagoada taudia, a?

19. Iseda abidadama karadia be dahaka dahaka?

¹⁹ Iseda abidadama karadia be dahaka dahaka? Paulo ia gwau: “Lau dekena amo umui davaria gaudia, egu hadibaia hereva bona egu kara danu, inai sibona do umui karaia. Bona maino ia henia Dirava be umui danu do ia noho.” (Filipi 4:⁠9) Keristani gwauhamata bona hahediba gaukarana dekenai ita dibaia, abia dae, kamonai, bona itaia gaudia ita badinaia neganai, ita hahedinaraia ita be edena bamona taudia. Iehova ese peroveta tauna Isaia amo ita ia hadibaia: “Dala be inai, ia dekenai do umui raka lao.”​—⁠Isaia 30:⁠21.

20. Edena bamona taudia be hahenamo badana kongrigeisen dekenai?

²⁰ Baibel idia stadilaia, sivarai namona idia harorolaia goadagoada, Dirava idia badinaia momokani, bona Basileia gaukarana idia durua tatau bona hahine be hahenamo badana kongrigeisen dekenai. Idia ese idia bamoa kongrigeisen idia hagoadaia diba. Kongrigeisen idia durua momokani diba, badina kamonai matamata taudia momo idia noho. Paulo ena sisiba ‘sibona eda kara ita tahua bona eda mauri ita tohoa, ita be abidadama korikori taudia o lasi,’ ita laloa bada neganai, ita danu ese ma haida ita durua diba.

Mai Moale ida Dirava Ena Ura Karaia

21, 22. Edena bamona mai moale ida Dirava ena ura ita karaia diba?

²¹ Idaunegai Pavapava Davida be ane amo ia gwau: “Lauegu Dirava e, lau ura dikadika [“moale,” NW ] oiemu ura do lau karaia. Oiemu taravatu be lauegu kudouna lalonai ia noho.” (Salamo 40:⁠8) Davida be mai moale ida Iehova ena ura ia karaia. Dahaka dainai? Badina Iehova ena taravatu be Davida ena kudouna lalonai ia noho. Davida ia daradara lasi edena dala ai do ia raka.

²² Dirava ena taravatu be iseda lalona dekenai idia noho neganai, do ita daradara lasi edena dala ai do ita raka. Mai moale ida Dirava ena ura ita karaia. Vadaeni, mai iseda kudouna ibounai ida Iehova ita hesiai henia lalonai, namona be ita “raka goada” noho.​—⁠Luka 13:⁠24.

[Footnotes]

Oi Laloatao, A?

• Edena bamona iseda kara ita tohoa diba, bema ita be abidadama korikori taudia eiava lasi?

• Iseda kara ita tahua totona, dahaka ita karaia be namo?

• Edena dala ai ita hamomokania diba ita be lo Keristani taudia?

• Iseda abidadama karadia ese edena bamona ita idia durua iseda kara ita sekea totona?

[Picture on page 9]

Edena dala badana amo oi tahua diba oi be abidadama korikori tauna eiava lasi?

[Picture on page 10]

Iseda lalona ita hadibaia loulou karana amo ita hamomokania ita be lo Keristani taudia

[Pictures on page 11]

Iseda kara korikori do ita hahedinaraia bema ‘hereva ita kamonai kava lasi to ita badinaia’