Mauri Durua Gaudia Idia Noho Neganai Oi Laloa Idia Hegeregere
1 Baibel ese ita ia hagoadaia tauanina dalanai iseda ruma bese taudia do ita naria, to namo lasi iseda mauri lalonai unai sibona ita laloa bada. Namona be lauma gaudia ita atoa guna. (Mat. 6:33; 1 Tim. 5:8) Unai ruaosi ita karaia namonamo be reana ia auka badina hari inai “nega ena dokona dekenai, metau dikadia momo” idia vara. (2 Tim. 3:1) Dahaka ese ita ia durua unai ita karaia totona?
2 Baibel Ena Lalohadai Oi Abia: Dirava ena Hereva ese ita ia hadibaia, kohu tahua karana ese lauma dalanai dika ia havaraia diba. (Had. 5:10; Mat. 13:22; 1 Tim. 6:9, 10) Inai nega dikana lalonai, bema ita ese moni gaukara eiava moni ita laloa bada dainai lauma gaudia—hebou, stadi, bona haroro gaukara—be iseda mauri lalonai ita laloa maragi, unai ese dika do ia havaraia diba. (Luka 21:34-36) To, Baibel ese ita ia sisiba henia, ia gwau: “Bema ita be mai iseda aniani bona dabua neganai, moni dekenai ita laloa momo lasi be namo.”—1 Tim. 6:7, 8.
3 Ita gwau lasi unai ena anina be Keristani taudia ese ogogami mauri dalana idia abia hidi be namo. To iseda mauri durua gaudia—aniani, dabua, bona iseda noho gabuna ai ia hegeregere ruma—be edena bamona ita diba totona, ita ia durua. Bema ita be mai iseda mauri durua gaudia vadaeni, namo lasi iseda noho dalana ita hanamoa toho hanaihanai. Gau ta ita ura hoia eiava ma gaukara ta ita abia gwauraia neganai, namona be ita sibona ita nanadaia, ‘Momokani inai be mai anina bada, a?’ Unai ese ita do ia durua Dirava ena lauma amo ia vara sisiba ita badinaia totona, ia gwau: “Moni do umui ura henia dikadika lasi. To umui dekenai ia noho gauna, be inai bamona do umui laloalaia, ‘Lau dekenai noho gauna be namo, ia hegeregere vadaeni.’ ”—Heb. 13:5.
4 Bema Iehova ita abidadama henia, ia ese ita do ia durua. (Aon. 3:5, 6) Ena be dina ta ta ai, mauri durua gaudia ita abia totona ita hekwarahi, to unai gaudia sibona ita laloa bada lasi. Herevana gau momo eiava gau haida sibona ita abia, to Iehova dekenai ita tabekau iseda dabu gaudia ia henia totona. (Fili. 4:11-13) Unai dala ai, Dirava amo ia mai lalo-moale bona hahenamo ma haida ita moalelaia.
This article is repeated in km 4/04 entitled “Oi Dekenai Idia Noho Vadaeni Gaudia be Hegeregere.”