Tiokratik Dalanai Ita Abia mai Davana Gaudia Laloa Bada
1 Dubu do idia hanamoa totona King Iosaia be dala ia hegaegaelaia neganai, gaukara idia karaia taudia ia hanamoa, ia gwau: “Unai gaukara biagudia taudia be kara maoromaoro taudia momokani. Unai dainai inai moni idia henia bona gaukaralaia dalana, be do oi nanadailaia lasi.” (2 Kin. 22:3-7) Unai tatau ese helaga gaudia idia laloa bada be idia abia mai davana gaudia idia gaukaralaia dalana amo ia hedinarai. Hari inai negai, ita ese Dirava ena sivarai namona ena gaukara helagana ita karaia neganai, namona be ita danu ese ita abia mai davana gaudia be mai kara maoromaoro ida ita gaukaralaia.
2 Haroro Gaukara Lalonai: Bema ita lalo-parara iseda buka lalodiai ia noho sivaraina be mai anina bada bona unai buka idia karaia be mai davana, idia do ita laloa bada. Iseda buka bona magasin be Baibel ena hereva idia laloa lasi taudia dekenai ita henia kava lasi. Bema ta ese sivarai namona ia laloa bada lasi, reana ia dekenai buka eiava magasin ita henia lasi to pepapepa ta ita henia.
3 Namona be buka bona magasin oi hariharilaia dalana ese ia hahedinaraia idia oi laloa bada. Taunimanima idia noho gabudia dekenai oi rakatania kava lasi, do idia negea kava garina. Buka bona magasin oi gaukaralaia namonamo totona, matamatadia oi do abia lasi neganai, ruma dekenai idia noho gaudia oi itaia guna. Bema hanaihanai oi abia magasin oi hariharilaia diba lasi to ruma dekenai idia noho, namona be emu oda oi hamaragia.
4 Oi Sibona Oi Gaukaralaia Bukadia: Do ita gaukaralaia bukadia sibona dekenai oda ita atoa. Deluxe Baibel, Reference Bible, bona buka badadia ma haida, hegeregere Concordance, Index, Insight, bona Proclaimers bukadia, ita oda neganai ita laloa namonamo, badina moni bada amo idia karaia.
5 Emu buka lalonai emu ladana bona adres oi torea, a? Unai ese ita ia durua, ita haboioa bukadia edia gabu ai buka ma haida do ita abia lasi. Bema ane buka, Baibel, eiava stadi bukana ta oi haboioa, reana Kingdom Hall eiava hebouhebou gabuna dekenai idia boio gaudia idia atoa gabuna dekenai do oi davaria.—Luka 15:8, 9.
6 Namona be aonega dalanai iseda buka bona magasin do oi hariharilaia. Unai dala amo ita hahedinaraia Iehova ese ita dekenai ia henia Basileia gaudia mai davana be mai kara maoromaoro ida ita gaukaralaia.—Luka 16:10.