Iseda Buka Bona Magasin Ita Gaukaralaia mai Aonega Ida
1 Iseda buka bona magasin gaukaralaia gaukarana ia hamatamaia, July 1, 1879 ena Watchtower ena kopi 6,000 idia hariharilaia neganai. Unai murinai, buka bona magasin idauidau momo herea idia printaia bona idia hariharilaia.
KONTRIBUSEN DALANA
2 June 1999 lalonai, idia gwauraia hedinarai vadaeni buka bona magasin be kontribusen dalanai pablisa bona kamonai taudia dekenai do ita henia, ena anina be, edia davana do ita noia lasi eiava ita gwau lasi kontribusen do idia henia murinai buka o magasin idia abia. Bema buka eiava magasin ita hariharilaia, taunimanima edia ura hegeregerena idia henia kontribusen monina do ita abia tanobada ibounai sivarai namona halasia gaukarana durua totona. Ita abia dae momokani, Iehova ese unai dala do ia hanamoa.—Mataio 6:33 itaia.
HARORO GAUKARA DEKENAI ITA GWAURAIA DIBA GAUDIA
3 Taunimanima edia lalona veria totona, namona be ita ura henia herevana ita gwauraia—sibona eda eiava Iseda Basileia Gaukara pepana lalonai idia hahedinaraia herevana ta. Bema ta ese kamonai lasi toana ia hahedinaraia, ia dekenai buka o magasin ta do ita rakatania lasi. Ita ura lasi kamonai lasi taudia dekenai iseda buka o magasin do ita henia kava. To, bema ta ia kamonai bona ia ura bada buka o magasin ia duahia, ta ita rakatania diba. Ita ura iseda buka bona magasin ita gaukaralaia.
4 Henunai dekenai idia noho heduru herevadia haida oi gaukaralaia diba buka o magasin oi hahedinaraia neganai: “Bema inai magasin oi ura duahia, mai egu moale ida do lau rakatania diba.” Bema ruma tauna ia henanadai: “Ena davana be hida?” Reana inai bamona oi haere: “Ai be moni abia totona ai gaukara lasi. Inai magasin ai hoihoilaia lasi. Hari dina emu gabu dekenai ai karaia gaukarana be tano 233 dekenai idia karaia volantia gaukarana, taunimanima ese mauri hanaihanai ena dala idia dibaia totona. Bema unai gaukara durua totona kontribusen oi ura henia, mai moale ida do lau abia dae.”
5 Bema magasin oi hariharilaidia, reana ena hereva badana ta amo henanadai ta oi henia bena oi gwau: “Lau ura inai magasin lalonai idia torea herevadia oi itaia. Bema oi ura inai magasin oi duahia, mai egu moale ida oi dekenai do lau rakatania diba.” Bema ia abia, reana ma oi gwau: “Lau moale unai hereva be oi dekenai lau mailaia diba dainai. Lau laloa hereva namodia do oi davaria. Momokani, lau ura pura vairai do lau giroa lou oiemu lalohadai kamonaia totona. Namona be oi diba, inai Gima Kohorona magasin be gado 131 dekenai idia halasia bona kopi 22,000,000 mai kahana be tanobada ibounai dekenai idia siaia lao. Inai gaukara be taunimanima edia ura hegeregerena idia henia kontribusen monina amo idia durua. Bema oi danu oi ura kontribusen maragina oi henia inai hadibaia gaukarana durua totona, mai moale ida do ai abia dae.”
6 Nega haida, reana iseda gaukara tanobada ibounai dekenai durua herevana do ita gwauraia be auka. Hegeregere, reana kamonai ruma tauna do ia gwau: “Ia be henia kava gauna, a?” Reana ita haere henia: “Bema oi ura inai magasin oi duahia bona abia, oibe, inai be oiemu. Lau ura pura vairai do lau mai, hari ita herevalaia gauna bona emai gaukara tanobada ibounai dekenai do ita herevalaia totona.” Unai ruma tauna oi lou henia neganai, reana ia dekenai iseda gaukara durua dalana oi hadibaia diba.
7 Eiava ruma tauna be reana maoromaoro magasin do ia abia bona ia gwau, “Tanikiu.” Reana inai bamona oi haere henia diba: “Namo. Lau diba do oi moalelaia. Momo idia ura diba inai gaukara be edena bamona ai haheaua, badina tanobada ibounai dekenai ai karaia. Aiemai buka bona magasin idia abia dae taudia momo ese do idia dibaia gaudia idia moalelaia dainai idia ura heduru monina maragina idia henia, inai gaukara ai karaia noho totona. Bema taunimanima be unai bamona idia karaia, mai moale ida unai ai abia dae.”
MOMOKANI IDIA URA KAMONAI, A?
8 Ita ura lasi iseda buka o magasin ita henia kava sibona. Ita ura buka o magasin ese badina namona idia hagugurua, anina be, idia ese lalo-momokani taudia idia durua, Iehova ena ura hereadaena idia dibaia totona. Lauma gaudia ia laloa bada lasi taudia dekenai buka o magasin ita rakatania kava be namo lasi. (Heb. 12:16) Buka bona magasin hariharilaia gaukarana amo anina namona havaraia totona, namona be oi laloa namonamo ruma tauna be momokani ia ura kamonai eiava lasi. Edena dala amo unai bamona ura ia hedinarai? Mai ena ura bada ida oi danu ia herevahereva be toa namona. Eiava emu hereva ia hakala henia namonamo, henanadai edia haere ia henia, bona lalohadai ta ia gwauraia ese ia hahedinaraia herevahereva lalonai ia vareai. Oi ia hereva henia mai ena hemataurai bona lalo-manau ida ese ia hahedinaraia ia be manau tauna. Baibel oi duahia neganai, oi ia badinaia karana ese ia hahedinaraia Dirava ena Hereva ia matauraia. Nega momo, heduru gauna be oi nanadaia, bema oi hariharilaia buka o magasin do ia duahia momokani eiava lasi. Bona danu, lou henia dalana oi herevalaia be namo umui herevahereva lou totona. Bema unai ia abia dae ia ese ena lalona ena ura do ia hahedinaraia. Bema unai daladia ai oi abia dae momokani ia ura kamonai, momokani ia ese ia abia magasin o buka do ia gaukaralaia namonamo.
9 Unai bamona iseda gaukara dalana ita haidaua ese ia hahedinaraia ita be ‘Dirava ena hereva ita hoihoilaia lasi.’ (2 Kor. 2:17) Bona danu ia hamomokania, ita be tanobada ena amo ita idau.—Ioa. 17:14.
10 Babulonia Badana ena ore negana ia kahirakahira dainai, tomadiho iboudiai dadaraia lalohadai ia bada ia lao. Ita laloa bada gauna be inai tanobada ibounai dekenai Basileia harorolaia gaukarana ita karaia noho, momo ita veridia mai hahemauri idia abia totona.—Mat. 24:14; Roma 10:13, 14.
This article is repeated in km 7/03 and 5/06.