Henanadai Mauana

◼ Edena bamona ita diba bema ta dekenai buka bona magasin do ita rakatania o lasi?

Mai anina bada gauna be inai, namona be ita itaia bema ta ia kamonai o lasi. Bema ia kamonai, reana magasin rua, buklet ta, buka ta, o Baibel buka ta ita henia diba. Ena be ita itaia ia dekenai moni sisina ia noho o moni be lasi, iseda tanobada hegegemadai gaukarana ia durua totona. (Iobu 34:19; Apok. 22:17) To, iseda buka bona magasin idia laloa bada lasi taudia dekenai unai gaudia ita rakatania lasi.​—Mat. 7:6.

Ruma tauna ena ura be edena bamona ia hahedinaraia diba? Mai ena ura bada ida ia herevahereva be toa namona. Emu hereva ia hakala henia namonamo, henanadai ia haerelaidia, bona ena lalohadai ia gwauraia ese ia hahedinaraia herevahereva karana ia laloa bada. Baibel oi duahia neganai, oi ia badinaia karana ese ia hahedinaraia Dirava ena Hereva ia matauraia. Oi nanadaia, bema oi hariharilaia buka o magasin do ia duahia o lasi. Pablisa ese laloa namonamo karana idia gaukaralaia, unai amo idia diba buka o magasin do idia hariharilaia o lasi. Hegeregere, dala haroro ai, raka hanai taudia ibounai dekenai magasin, buklet, o buka ita henia kava lasi. Bema ita diba namonamo lasi kamonai tauna ia ura o lasi, vadaeni pepapepa sibona ita henia be namo.

Unai hegeregerena, pablisa ta ese do ia hariharilaia buka bona magasin sibona ia abia, namo lasi ia laloa buka o magasin momo ia hariharilaia dainai, momo ia abia. Idia henia kontribusen be buka o magasin ena davana lasi, to tanobada hegegemadai haroro gaukarana ia durua. Ena be eda moni be bada o lasi, to Basileia durua karana ita laloa bada neganai, unai ese ita ia doria eda ura hegeregerena ai moni ita henia, to ita dekenai moni bada ia noho dainai ita henia lasi. (Mar. 12:41-44; 2 Kor. 9:7) Namona be do ita ura hariharilaia buka bona magasin sibona ita abia, unai amo unai gaudia ita gaukaralaia kava lasi.

[Blurb on page 3]

Pablisa ese laloa namonamo karana idia gaukaralaia, unai amo idia diba bema ta ia ura kamonai o lasi