Heduru Idia Henia Nega Korikorina Ai
1 Aposetolo Petero ia itaia ena tadikaka ia hagoadaia be namo, unai ese ia doria idia dekenai hadibaia bona hagoadaia herevadia ia henia totona. (2 Pet. 1:12, 13; 3:1) Ia ese ‘abidadama idia davaria vadaeni taudia’ ia hagoadaia lauma dalanai kara namodia dekenai do idia tubu daekau noho, unai amo ‘Iesu Keriso iseda Lohiabada idia diba dainai, do idia noho kava lasi, to edia kara be mai anina.’ (2 Pet. 1:1, 5-8) Dirava ese unai taudia ia boiria ena taunimanima ai idia lao, unai dainai Petero ia ura idia ia durua Dirava ena taunimanima momokani ai idia noho totona, unai amo ‘mai goevagoeva bona kerere lasi danu Dirava ena vairanai bona Dirava danu mai maino danu do idia noho.’ (2 Pet. 1:10, 11; 3:14) Unai taudia momo dekenai, Petero ena hagoadaia herevadia be heduru namona nega korikori ai.
2 Hari inai negai, Keristani naria taudia ese Dirava ena taunimanima be unai bamona idia laloa bada danu. Inai “metau dikadia momo do idia vara” negana ai, Iehova ena hesiai taudia momo ese hekwakwanai idauidau idia haheaukalaia. (2 Tim. 3:1) Moni ena hekwakwanai, ruma bese eiava sibona edia hekwakwanai dainai, reana haida edia hemami be Davida ena bamona, ia gwau: “Dika momo herea be lau dekenai idia ginidae vadaeni, duahia diba lasi. Lauegu kara dika ese unai dika idia havaraia vadaeni. Unai dainai lauegu matana ese, gau idia itaia namonamo lasi. Unai dika be momo herea, lauegu kwarana ena huina edia momo idia hanaia. Lauegu kudouna ia manoka lao noho, bona egu goada ia ore.” (Sal. 40:12) Unai hekwakwanai idauidau be metau bada gaudia ai idia lao diba, bena unai hekwakwanai idia davaria taudia ese mai anina bada lauma gaudia idia reaia bona Keristani hesiai gaukara idia rakatania. To, ena be unai metau idia davaria, to ‘idia ese Iehova ena taravatu idia laloaboio lasi.’ (Sal. 119:176) Hari be nega maorona elda taudia ese unai bamona taudia idia durua totona.—Isa. 32:1, 2.
3 Unai heduru idia henia totona, elda taudia idia hagoadaia do idia hekwarahi bada hari haroro gaukara idia karaia noho lasi taudia idia hagoadaia totona. Unai idia karaia totona elda taudia be hari idia gaukara goada noho bona unai do idia karaia ela bona April ena hua lalonai. Buka stadi naria taudia idia noia idia haroro lasi pablisa idia vadivadi henia bona lauma dalanai idia durua totona, unai amo kongregesen ida ma idia gaukara lou diba. Bema idia vadivadi henia tauna be heduru ia abia be namo, dala idia karaia ta ese ia ida Baibel stadi do ia karaia. Pablisa ma haida idia noia diba unai gaukara idia durua totona. Bema oi idia noia unai gaukara durua totona, emu hekwarahi be mai anina bada, bema hebogahisi bona lalo-parara dalanai idia oi hagoadaia.
4 Ta ese kongregesen ida ma ia gaukara lou neganai, unai ese ibounai ia hamoalea bada. (Luka 15:6) Ita hekwarahi idia haroro lasi pablisa hagoadaia totona be reana ‘nega korikori ai ita gwauraia herevana’ ta.—Aon. 25:11, NW.