Hereva Momokani ese Ita Ia Ruhaia Dalana
1 Nega ta, Iesu ese ia idia badinaia Iuda taudia dekenai ia gwau: “Hereva momokani be do umui diba, bona hereva momokani ese umui do ia ruhaia.” (Ioa. 8:32) Ia herevalaia ruhaia karana ese taunimanima edia maoro gau idauidau abia hidi karana ia hereaia, unai be ita ibounai—taga taudia eiava ogogami taudia, idia sikuli taudia eiava idia sikuli lasi taudia—dekenai ia hedinarai. Iesu ia hadibaia hereva momokanina ese kara dika bona mase amo ita do ia ruhaia. Iesu ia gwau, “kara dika taudia be dika ese ia guia, vadaeni idia be dika ena hesiai gaukara idia karaia.” (Ioa. 8:34) Ita be mai iseda ura bada ida kamonai taudia ibounai “be do ia ruhaia, dika ena bodaga dekena amo, vadaeni Dirava ena natuna edia hairaina bamona do idia abia, ma Dirava ese edia dala do ia kehoa, vadaeni kwalimu momokani do idia abia” negana ita naria!—Roma 8:21.
2 Iesu ese Dirava ena ura ia hagugurua hereva momokanina ese unai ruhaia karana ia havaraia. Anina be ita diba, iena mauri davalaia boubouna be ita totona ia gaukaralaia. (Roma 3:24) Hari danu, Baibel ena hereva momokani ita abia dae bona ita badinaia neganai, unai ese gari, lalohisihisi, bona hadikaia karadia idauidau amo ita ia ruhaia karana ita moalelaia.
3 Gari Bona Lalohisihisi amo Ita Ia Ruhaia: Tanobada dekenai idia vara karadia ita lalohisihisilaia be namo lasi, badina gwau-edeede kara dikadia idia vara noho ena badina ita lalo-pararalaia bona ita diba kahirakahira idia be tanobada amo do idia ore. (Sal. 37:10, 11; 2 Tim. 3:1; Apok. 12:12) Danu, hereva momokani ese mase taudia dekenai dahaka ia vara ena hahediba koikoidia amo ita ia ruhaia. Ita diba mase taudia ese ita idia hahisia diba lasi, idia be hisihisi idia abia hanaihanai lasi, bona Dirava ese mase ai taunimanima ia abidia daekau lasi guba ai ia ida idia noho hebou totona.—Had. 9:5; Kara 24:15.
4 Unai bamona hereva momokani ese tama ta bona sina ta edia natuna be aksiden ai ia mase neganai, idia ia hagoadaia. Sinana ia gwau: “Aiemai mauri lalonai gau ta ia boio vadaeni bona emai mauri do ia hegeregere lou lasi ela bona toreisi lou amo emai natuna do ai itaia lou. To ai diba emai hisihisi be do ia noho hanaihanai lasi.”
5 Tauanina Hadikaia Karadia amo Ita Ia Ruhaia: Baibel ena hereva momokani ese tau ta ena lalohadai bona kara ia haidaua diba, anina be ia dadaraia diba hekwakwanaidia amo ia ruhaia. (Efe. 4:20-24) Kara maoromaoro badinaia bona gaukara goada karana ese ogogami karana ia hamaragia diba. (Aon.13:4) Ita sibona eda ura ita dadaraia lalokauna ita hahedinaraia neganai, unai ese ma haida hetura henia karana ia hanamoa. (Kol. 3:13, 14) Keristani kwara dagidia matauraia karana ese ruma bese ena metau idauidau ia hamaragia. (Efe. 5:33–6:1) Inuinu kekero karana, matabodaga, bona tauanina ia biagua drag dikadia ita dadaraia neganai, iseda tauanina do ita hadikaia lasi.—Aon. 7:21-23; 23:29, 30; 2 Kor. 7:1.
6 Tau matamata ta be lagani 9 lalonai ia manadalaia drag gaukaralaia karana ia dadaraia be auka. Nega ta, dala ai haroro gaukara ia karaia pablisa ta ia davaria. Ia ese magasin ia abia, bona dala idia karaia iena ruma dekenai ia do idia lou henia totona. Baibel stadi idia hamatamaia. Hua rua murinai, unai tau ese drag dikadia gaukaralaia karana ia hadokoa momokani, bona hua 8 lalonai idia stadi murinai, bapatiso ia abia. Iena kakana bona nakimi idia itaia ia ese unai drag dikadia ia rakatania neganai, unai ese idia danu ia hagoadaia Baibel idia stadilaia matamaia.
7 Ma Haida Ruhaia Totona Ita Durudia: Nega daudau lalonai hahediba koikoidia ese ia guia taudia ese reana Dirava ena Hereva ena ruhaia karana idia lalo-pararalaia be auka. Idia edia kudouna hamarerea totona, gau badana be hadibaia tauna ia gaukara goada bona ia hegaegae namonamo. (2 Tim. 4:2, 5) Hari, ‘idia guia vadaeni taudia do ita ruhaia’ gaukarana dekenai ita hesiku totona nega be lasi. (Isa. 61:1) Keristani ruhaia karana be mai anina bada. Unai ruhaia karana ita abia neganai, mauri hanaihanai do ita abia.—1 Tim. 4:16.