Nega Bona Dala Idauidau ai Ita Haroro Neganai, Iehova Ita Hanamoa
1 Dina ta ta ai, Iehova ena kamonai hesiai taudia ese dala idia tahua Iehova idia hanamoa totona. (Sal. 96:2, 3; Heb. 13:15) Unai ita karaia dalana ta be nega bona dala idauidau ai ita haroro. Hari Iehova idia tomadiho henia taudia momo idia moale bada, badina ta ese idia dekenai nega bona dala idauidau ai Basileia sivaraina ia hadibaia.
2 Nega bona dala idauidau ai ta oi haroro henia ese nega momo dala ia kehoa ma haida be Basileia ena sivarai idia kamonai henia totona. Hegeregere, Iakobo ena ranu guri dekenai Iesu ese Samaria hahine ta ia hereva henia, unai amo momo ese sivarai namona idia abia dae. (Ioa. 4:6-30, 39-42) Filipi dekenai Paulo bona Sila be dibura ruma ai idia noho neganai, dibura naria tauna dekenai idia haroro, bona unai tauna ena ruma bese ibounai ese hereva momokani idia abia dae.—Kara 16:25-34.
3 Dala Namodia: Edena dala namodia idia noho nega bona dala idauidau ai oi haroro totona? Haida be sitoa, basi dekenai idia guia, eiava doketa idia naria neganai idia haroro. Haida be gaukara eiava sikuli ena laga-ani negadiai idia haroro. Bema iseda Baibel bukadia be taunimanima ese idia itaia gabuna dekenai idia noho unai ese haida ia veria diba ita abia dae hahediba herevadia idia tahua totona.—1 Pet. 3:15.
4 Karaia Dalana Matamaia: Ia hemarai kekeni maragina ena mauri lagani 7 be hebou dekenai ia kamonai, ibounai ese haroro gaukara idia karaia be gau badana. Unai dainai iena sinana danu sitoa dekenai ia lao neganai, buklet rua be iena baege lalonai ia udaia. Iena sinana be aniani hoia gabunai ia gini noho lalonai, kekeni ese hahine ta dekenai buklet ta ia henia toho, bona unai hahine ese mai moale ida ia abia dae. Unai hemarai kekeni idia nanadaia edena dala ai ia be mai gari lasi ida unai hahine ia hereva henia totona neganai, ia haere: “Sibona dekenai lau gwau, 1, 2, 3, Lao! Bona lau lao!”
5 Nega bona dala idauidau ai ita haroro totona, unai kekeni maragina ena ura bada bamona ita abia be namo. Dahaka ese ita ia durua diba? Ita guriguri mai gari lasi ida ita hereva totona. (1 Tes. 2:2) Taunimanima idia laloa henanadai ta eiava hereva ta oi hegaegaelaia, unai amo do oi gaukaralaia diba hereva oi hamatamaia totona. Bena Iehova oi abidadama henia oi ia durua totona.—Luka 12:11, 12.
6 Dina ta ta ai nega bona dala idauidau ai taunimanima ita haroro henia neganai, unai ese Iehova ia hanamoa bona ita ia hamoalea. Reana unai ese ta ia durua mauri hanaihanai dalana dekenai ia raka totona.