Nega Bona Gabu Idauidau ai Haroro Totona Oi Hegaegae, A?
1 Nega bona gabu idauidau ai ita haroro neganai, kamonai taudia momo ita davaria diba. Baibel lalonai nega bona gabu idauidau ai haroro sivarai namodia momo idia noho. (Ioa. 4:7-15) Edena dala ai ita hegaegae diba, unai bamona haroro gaukarana ita karaia totona?
2 Iseda Dabua Bona Toana: Bema nega ibounai iseda dabua bona toana idia goeva, do ita hemarai lasi ma haida ita haroro henia totona. (1 Tim. 2:9, 10) Bema iseda hegoeva dalana be ia namo lasi, reana do ita hemarai ma haida ita haroro henia totona. To, iseda dabua bona toana ia goeva neganai, taunimanima do idia ura diba dahaka dainai iseda toana be unai bamona. Hegeregere, edia dabua idia goeva Witnes tau bona adavana be basi lalonai Muslim tauna ta badinai idia helai. Edia toana ia itaia dainai, ia henanadai bema idia be Keristani taudia. Unai amo idia be hora toi lalonai unai tauna idia haroro henia.
3 Haroro Hamatamaia Dalana: Iesu ese Samaria hahine be Iakobo ena ranu guri badinai ia davaria neganai, hahine ia noia ranu sisina do ia henia, unai amo ia haroro henia matamaia. Unai hegeregerena, henanadai ta eiava hereva ta amo, ma haida haroro henia dalana ita hamatamaia diba. Reana nega haida do ita gari, to Iehova ena heduru dekenai ita tabekau neganai, ia ese goada do ia henia ma haida ita haroro henia totona.—1 Tes. 2:2.
4 Dala Idauidau Tahua: Pablisa momo be haroro daladia idauidau idia davaria. Dina ta ta ai oi hereva henia taudia idauidau oi laloa. Pepapepa, magasin bona Baibel ta oi abia loaloa be namo. Oi davaria taudia oi hereva henia bona idia laloa bada gaudia oi tahua. Dina ta ta ai do oi hereva henia taudia oi laloa guna neganai, do oi hegaegae oi haroro henidia namonamo totona.—Fili. 1:12-14; 1 Pet. 3:15.
5 Dirava ita lalokau henia bona dekena taudia ita lalokau henia dainai, nega bona gabu idauidau ai ita haroro. (Mat. 22:37-39) Haroro gaukara be mai anina bada dainai, namona be nega bona gabu idauidau ai haroro dalana ita palanilaia namonamo. Namona be nega ia do noho lalonai, ita hegaegae dala idauidau ai Basileia ena sivarai namona be ma haida dekenai ita harorolaia totona.—Roma 10:13, 14; 2 Tim. 4:2.
[Study Questions]
1. Edena haheitalai ese ia hamomokania nega bona gabu idauidau ai ita haroro neganai, kamonai taudia momo ita davaria diba?
2. Dahaka dainai iseda dabua bona toana idia goeva karana ese ita ia durua ma haida ita haroro henia totona?
3. Iesu ena haheitalai oi tohotohoa dainai, edena dala ai emu haroro herevana oi hamatamaia?
4. Edena bamona ita hegaegae diba nega bona gabu idauidau ai ita haroro totona?
5. Dahaka dainai palani ita karaia be namo nega bona gabu idauidau ai ita haroro totona?