Hanaihanai Ia Idau Noho Tanobadana ai Ita Haroro Noho
1 Gau momo idia idau haraga diba! Karaharaga ia vara dika badana ta, moni ena hekwakwanai, politikol ena hepapahuahu, eiava nius ai sivarai badana ta be taunimanima ese do idia herevalaia momo gauna. To taunimanima ese edia lalohadai idia haidaua haraga diba bena ma gau ta do idia herevalaia. (Kara 17:21; 1 Kor. 7:31) Hanaihanai ia idau noho tanobadana ai, edena bamona taunimanima edia lalona ita veria diba Basileia ena sivarai be idia ida ita herevalaia totona?
2 Ma Haida Idia Laloa Momo Gaudia Oi Lalo-Pararalaia: Taunimanima edia lalona veria dalana ta be hari idia vara gaudia oi herevalaia. Nega ta ai, Iesu ese ena kamonai taudia dekenai idia diba bona ia vara sivaraina ta ia herevalaia, unai amo ia hagoadaia Dirava vairanai idia gini karana idia laloa bada totona. (Luka 13:1-5) Unai hegeregerena, sivarai namona ita harorolaia neganai, iseda teritori ai idia noho taudia ese idia laloa bada nius ena sivarai ta eiava sivarai badana ta ita herevalaia be namo. To, unai gaudia ita herevalaia neganai, namona be ita naria namonamo, politikol eiava taunimanima edia hepapahuahu lalonai kahana ta ita durua garina.—Ioa. 17:16.
3 Taunimanima ese hari idia laloa gauna be edena dala ai ita dibaia diba? Reana dala namona be henanadai ta ita henia bena ita kamonai. (Mat. 12:34) Taunimanima ita laloa bada karana ese ita do ia hagoadaia ma haida edia lalohadai ita diba totona bona dala namona ai ita henanadai henia totona. Ruma tauna ese do ia herevalaia gauna ese reana unai gabu ai idia noho taudia momo idia laloa bada gauna do ia hahedinaraia, bona reana dala ia kehoa ita haroro henia totona.
4 Kiki Herevana Hegaegaelaia: Hanaihanai ia idau noho tanobadana ai haroro gaukara totona ita hegaegae neganai, Herevalaia bukana ita gaukaralaia diba. Rau 13 bona 15 ai, “Hari Inai Negai Idia Vara Karadia” bona “Taravatu Utua Karadia/Noho Namo” henunai heduru herevadia idia noho, iseda kiki herevana ai hari idia vara gaudia ita herevalaia totona. Unai bamona hereva haida be September 2000 Iseda Basileia Gaukara ena rau 6 ai oi davaria diba. Kiki herevana oi hegaegaelaia neganai, namona be siri maorona ta oi gaukaralaia.
5 Iseda teritori ai idia noho taudia idia laloa momo gaudia be hanaihanai idia idau noho bona ita laloa bada dainai, namona be iseda sivarai namona ena kiki herevana ita hanamoa. Unai dala amo, taunimanima idia laloa bada gaudia ita herevalaia. Unai dainai, momo herea ita durua iena kara bona taravatu ia haidaua diba lasi Diravana idia dibaia totona.—Iam. 1:17.