Idia Vara Gaudia Edia Sivarai Gaukaralaia Taunimanima Edia Lalona Veria Totona
1 Oi ura hanaihanai lalohadai namodia oi abia noho, oiemu haroro oi moalelaia bona taunimanima edia lalona Baibel ena sivarai dekenai oi veria totona, a? Bena tanobada dekenai bona oiemu gabu dekenai idia vara gaudia edia sivarai oi gaukaralaia herevahereva oi hamatamaia totona. Reana vanegai sibona emu gabu dekenai bona P.N.G. lalonai idia vara gaudia eiava tanobada hegegemadai idia halasia nius oi gaukaralaia diba. Unai gaudia be hanaihanai idia idau. (1 Kor. 7:31, NW ) Mani inai haheitalai idauidau oi laloa.
2 Moni ena hekwarahi bona mauri durua gaudia edia davana bada dainai taunimanima idia laloa momo. Unai dainai, reana oi gwau diba:
◼ “Niusi dekenai oi kamonai [gau ta oi gwauraia] ena davana idia habadaia lou, a?” Eiava gaukara lasi karana oi gwauraia diba bema kampani badana ta ese gaukara taudia momo ia hadokoa. Bena oi ura hereva dalana hegeregerena, reana oi henanadai “Nega ta oi laloa, dahaka dainai mauri durua gaudia ita abia dalana be ia auka?” eiava “Oi laloa, hanaihanai moni dainai do ita hekwarahi, a?”
3 Dagedage karadia edia sivarai, hegeregere ruma bese lalodiai idia vara gaudia eiava emu gabu ai “raskol” taudia ese idia karaia gaudia be herevahereva ma ta lalonai oi herevalaia diba. Oi henanadai diba:
◼ “Niuspepa dekenai oi duahia [emui gabu dekenai ia vara dika ta gwauraia], a?” Bena do oi henanadai “Dahaka oi laloa, tanobada dekenai dagedage karadia be momo ena badina be dahaka?” eiava “Oi laloa, nega ta noho namo ena mamina do ita abia diba, a?”
4 Dika bada idia havaraia abata, tano mareremarere, eiava tanobada ena tano idauidau lalonai idia vara tuaridia edia sivarai ese nega momo taunimanima edia lalona idia veria. Hegeregere, reana oi henanadai:
◼ “[Ia vara kava dika ta oi gwauraia] be Dirava ese ia havaraia, a?” Eiava hari sibona tano ta dekenai ia vara tuari oi gwauraia bena oi gwau: “Bema taunimanima ibounai idia ura maino, dahaka dainai maino ita abia be auka?”
5 Idia vara gaudia edia sivarai, oiemu haroro herevana hamatamaia totona oi gaukaralaia diba gaudia, oi laloa namonamo. Herevalaia bukana ena rau 13-14 ai ia noho sinado “Hari Inai Negai Idia Vara Karadia” henunai hereva namodia oi davaria diba. To, oi naria namonamo politikol hepapahuahu eiava taunimanima edia noho dalana dainai idia vara hepapahuahu lalonai kahana ta oi durua lasi. To, namona be oi hahedinaraia Baibel bona Dirava ena Basileia sibona ese taunimanima edia hekwakwanai idia hamaoromaoroa momokani diba.