December bona January ai Gabu Idauidau ai bona Nega Idauidau ai Haroro Gaukara Do Oi Karaia, A?
1 Iseda dina ta ta maurina lalonai iseda kara badana ta be taunimanima dekenai Iehova ita herevalaia. Nega ita atoa ruma ta ruma ta gaukara, lou-henia bona Bible stadi gaukara ita karaia totona. To ma nega haida danu taunimanima dekenai hereva momokani ita harorolaia diba. Unai ita gwauraia gabu idauidau ai bona nega idauidau ai haroro gaukarana.
2 Pablisa haida be nega momo unai bamona haroro gaukarana idia karaia. Namona be hebouhebou gabuna ita lao henia bona ita giroa neganai, holide ita abia neganai ita haroro, eiava iseda varavara ita vadivadi henidia neganai, dala ita tahua ita haroro henidia toho totona. Unai nega lalonai dala do oi tahua gabu idauidau ai bona nega idauidau ai haroro gaukara do oi karaia totona, a?
3 Vaira Negana Ena Palani Oi Hegaegaelaia: Bema ita hegaegae namonamo bona ita laloa namonamo neganai unai ese ita do idia durua gabu idauidau ai bona nega idauidau ai do ita haroro namonamo totona. Iseda buka idauidau bona magasin idauidau ese ita do ia durua unai gaukara ita hagugurua totona. Bona iseda Gima Kohorona bona Noga! magasin sibodia lasi, to pepapepa dekenai taunimanima edia lalona veria hereva haida idia noho. Edia mauri idauidau taudia bona edia tomadiho idauidau taudia ese idia ura henia buklet idauidau idia noho danu. Bona buka maragidia haida idia noho, unai buka dekenai harihari taunimanima ese idia ura henia herevadia idia noho danu. Edena buka, magasin eiava buklet oi ura gaukaralaia? Emui ruma bese lalonai unai umui laloa namonamo. Bona namona be unai umui hegaegaelaia bona gabeai do umui gaukaralaia diba.
4 Emu Holide Negana Ai: Gabu idauidau bona nega idauidau ai haroro gaukara ena nega namona be oi holide neganai. Peleini, bouti, eiava basi dekenai do oi lao emu holide gabuna dekenai, a? Bema unai bamona oi karaia neganai, namona be Bible bona atai dekenai ai gwauraia buka ta eiava magasin haida oi abia lao danu. Bema taunimanima vairanai unai buka bona magasin oi duahia neganai do idia henanadailaia bona unai amo oi haroro henidia hamatamaia diba. Bema motuka dekenai oi heau lao neganai, namona be bensini abia gabuna ai eiava aniani hoia gabuna ai eiava hotel dekenai oi mahuta, dahaka do oi gwauraia diba herevadia oi laloa namonamo. Pepapepa haida oi dogoatao unai bamona gabudia dekenai kamonai taudia dekenai do oi hariharilaia totona. Bema haiwei dekenai basi ia stopu bona umui lao gabu mai hairaina ta umui itaia totona, reana ta oi haroro henia hamatamaia diba, oi henanadai henia, oi gwau: “Bema tanobada ibounai ena toana be inai gabu ena toana bamona neganai, be namo herea, ani? Bema kone mai hairaina ta eiava gabu mai hairaina ta dekenai oi noho neganai, unai bamona hereva oi gwauraia diba.
5 Distrik Hebouhebou Dekenai: Distrik hebouhebou negadia ai danu dala ita tahua diba gabu idauidau bona nega idauidau ai haroro gaukara ita karaia totona. Tadikaka momo be hotel bona motel dekenai idia gaukara taudia idia hereva henidia neganai unai taudia idia kamonai, eiava dala ai eiava basi stopu gabudia ai taunimanima idia hereva henia neganai kamonai taudia haida idia davaria. Hebouhebou dekenai namona be emu lapel kadi oi atoa emu dabua dekenai. Reana unuseniai idia noho sitoa eiava aniani hoia rumana dekenai oi vareai bona taunimanima ese do idia itaia bona do idia henanadailaia. Unai amo haroro namona do oi henidia diba.
6 Siahu nega ena hua lalodiai laga-ani namona ita abia diba, to namona be gabu idauidau bona nega idauidau ai haroro gaukara ita laloaboio lasi. Unai bamona haroro dalana ese huahua momo ia havaraia, bona namona be Iehova ena hesiai taudia ibounai ese unai gaukara idia karaia. Iesu bamona, namona be taunimanima ita lalokau henidia dainai dala ita davaria neganai ita hereva henidia!—Mat. 5:14-16.