Dirava Ena Ladana Gwauraia Hedinarai Noho
1 Nega ginigunana ai Dirava ena ladana oi dibaia neganai, edena bamona oi kara? Momo edia kara be hahine ta ena bamona, ia gwau: “Nega ginigunana Baibel lalonai Dirava ena ladana lau itaia neganai, lau taitai. Dirava ena ladana lau dibaia diba bona lau gaukaralaia diba herevana ese egu lalona ia hamarerea.” Ia dekenai, Dirava ena ladana ia diba be mai anina bada dalana ta Iehova ia dibaia namonamo bona ia tura henia totona.
2 Dahaka Dainai Ita Gwauraia Hedinarai? Dirava ena ladana ita dibaia neganai, iena kara, palani, bona ia karaia karadia ita diba danu. Bona hahemauri do ita abia danu. Aposetolo Paulo ia gwau: “Dirava ena ladana idia noinoi henia taudia ibounai, be mauri do idia davaria.” To, Paulo ia gwau, “edena bamona Lohiabada do idia noinoi henia diba,” bema taunimanima ese Iehova idia dibaia bona idia abidadama henia lasi? Unai dainai, Keristani taudia ese ma haida dekenai Dirava ena ladana bona ia laulaulaia gaudia idia hadibaia be gau badana. (Roma 10:13, 14) To, badina badana ta ia noho Dirava ena ladana ita gwauraia hedinarai totona.
3 Lagani 1920 ia lao 1929 lalonai, Dirava ena taunimanima be Baibel amo Dirava ena lohia siahuna ena maoro hamomokania karana bona iena ladana hahelagaia karana ena hepapahuahu badana idia dibaia. Iehova ese kara dika taudia do ia hadikaia iena ladana hadikaia karana kokia totona, to unai ia do karaia lasi neganai, inai hereva momokani be ‘tanobada taudia ibounai dekenai, do idia gwauraia loaloa.’ (Isa. 12:4, 5; Ese. 38:23) Unai dainai, ita haroro ena badina badana be Iehova ita hanamoa bona taunimanima ibounai vairanai ena ladana ita hahelagaia. (Heb. 13:15) Dirava bona dekena taudia lalokau henia karana ese ita do ia veria Dirava ia henia gaukarana ita karaia goadagoada totona.
4 “Iena Bese Taudia Ia Halaodia”: Lagani 1931 ai inai ladana Iehova ena Witnes taudia ita abia. (Isa. 43:10) Unai nega amo, Dirava ena taunimanima ese ena ladana be taunimanima dekenai idia hadibaia, Proclaimers bukana, rau 124, ia gwau: “Tanobada ibounai ai, bema ta ese inai ladana Iehova ia gaukaralaia, maoromaoro do idia gwau ia be Iehova ena Witnes tauna.” Oi be unai bamona idia gwauraia, a? Iehova ena namo laloa bada karana ese ita do ia veria ‘iena ladana do ita abia isi’ totona, nega bona dala ibounai ia ita herevalaia.—Sal. 20:7; 145:1, 2, 7.
5 Ita be “iena bese taudia ia halaoa” dainai, iena taravatu ita badinaia be namo. (Kara 15:14; 2 Tim. 2:19) Nega momo taunimanima ese idia itaia guna gauna be Iehova ena Witnes taudia edia kara namona. (1 Pet. 2:12) Ita ura lasi Dirava ena hakaua herevadia ita utua eiava iseda mauri lalonai ia tomadiho henia karana ita atoa guna lasi amo iena ladana ita hadikaia. (Lev. 22:31, 32; Mal. 1:6-8, 12-14) To, namona be iseda mauri dalana lalonai ita hahedinaraia Dirava ena ladana loalaia taudia ena hahenamo ita laloa bada.
6 Hari, Iehova ia gwauraia gauna ia guguru dalana ita itaia, ia gwau: “Tanobada ena kahana ibounai dekena amo taunimanima ese lauegu ladana idia hanamoa noho.” (Mal. 1:11) Namona be Iehova ena hereva momokani ita gwauraia hedinarai noho bona ‘iena ladana helagana do ita hanamoa ela bona hanaihanai.’—Sal. 145:21.
[Study Questions]
1. Dirava ena ladana dibaia karana be taunimanima dekenai dahaka namo ia havaraia diba?
2. Dahaka dainai ma haida dekenai Iehova ena ladana ita hadibaia be gau badana?
3. Iseda haroro gaukara ena badina badana be dahaka?
4. Iehova ena Witnes taudia be edena dala ai Dirava ena ladana ida idia gwauraia?
5. Iseda kara be edena dala ai Dirava ena ladana ia abia isi?
6. Dahaka hahenamo do ita moalelaia hari bona ela bona hanaihanai?