Iehova Ena Ladana Ita Laloa Bada

1-2. Edena bamona ita diba Iesu dekenai Iehova ena ladana be mai anina bada?

IESU dekenai Iehova ena ladana be mai anina bada gauna. Iesu be gau ibounai ia karaia ena Tamana ena ladana ia gwauraia hedinarai totona. Atikol 22 ese ia hahedinaraia bamona, Iesu ia ura hamomokania Iehova ena ladana be helaga bona ena dala ibounai be maoro, unai dainai ia ura ena mauri do ia bouboulaia. (Mar. 14:36; Heb. 10:7-9) Bona Iesu ena Lohia Lagani 1,000 murinai, ia be mai ura ida Iehova amo ia abia siahu ibounai do ia henia lou, unai amo ia ura Iehova ena ladana ia hanamoa. (1 Kor. 15:26-28) Iesu ese Iehova totona ia karaia gaudia ibounai amo ia hamomokania Iehova ia lalokau henia bada.

² Iesu be ena Tamana ena ladana dainai tanobada dekenai ia mai. (Ioa. 5:43; 12:13) Ena murinai idia raka taudia dekenai ena Tamana ena ladana ia gwauraia hedinarai. (Ioa. 17:6, 26) Ia be Iehova ena ladana amo taunimanima ia hadibaia bona hoa karadia ia karaia. (Ioa. 10:25) Danu, Iesu ese Iehova ia noia ‘ena ladana dainai’ ena hahediba taudia do ia naria. (Ioa. 17:11) Unai ese ia hahedinaraia, Iesu dekenai Iehova ena ladana be mai anina bada. Unai dainai bema ta ia gwau ia be Keriso murinai ia raka, namona be ena Tamana ena ladana ia diba bona ia gaukaralaia.

3. Inai atikol ai dahaka do ita herevalaia?

³ Ita be Keristani taudia dainai, ita ura Iesu ita tohotohoa, anina be ena Tamana ena ladana ita laloa bada. (1 Pet. 2:21) Inai atikol ai, do ita itaia edena dala ai Iehova ena ladana be “Basileia ena sivarai namona” idia harorolaia taudia ese idia abia. (Mat. 24:14) Danu, ita ta ta dekenai Iehova ena ladana be mai anina bada do ita herevalaia.

“HAIDA IA ABIA HIDI ENA LADANA IDIA ABIA TOTONA”

4. (a) Iesu be guba dekenai ia do giroa lasi neganai, ena hahediba taudia dekenai dahaka hahegani ia henia? (b) Dahaka henanadai do ita herevalaia?

⁴ Iesu be guba dekenai ia do giroa lasi neganai, ena hahediba taudia ia hamaoroa, ia gwau: “Lauma helaga be umui latanai ia diho neganai, siahu do umui abia. Bena Ierusalema, Iudea ibounai, Samaria, bona tanobada ena daudau momokani gabudia dekenai lau do umui gwauraia hedinarai.” (Kara 1:8) Unai dainai sivarai namona be Israela sibona ai do idia harorolaia lasi, to gabu ibounai ai do idia harorolaia. Anina be, tanobada dekenai idia noho taudia ibounai dekenai dala ia noho Iesu murinai idia raka totona. (Mat. 28:19, 20) To Iesu ia gwau: “Lau do umui gwauraia hedinarai.” Unai hahediba taudia be Iehova ena ladana do idia dibaia eiava Iesu ena ladana sibona do idia gwauraia hedinarai, a? Kara karoa 15 ai ia noho sivarai ese ita do durua unai henanadai ita haerelaia totona.

5. Edena dala ai aposetolo taudia bona tatau badadia ese idia hahedinaraia taunimanima ibounai be Dirava ena ladana idia diba be namo? (Laulau itaia danu.)

⁵ Lagani 49 C.E. ai, Ierusalema ai idia noho aposetolo taudia bona tatau badadia be hebou ta idia karaia. Idia ese kopina utua lasi Idau Bese taudia be Keristani taudia ai idia lao totona gau haida idia herevalaia. Unai hebou ena dokona ai, Iamesi, Iesu ena tadina, ia gwau: “[Petero] ese ita ia hamaoroa goevagoeva vadaeni, edena bamona nega ginigunana ai Dirava ese idau bese taudia ia laloa, bona idia huanai haida ia abia hidi ena ladana idia abia totona.” Iamesi be daika ena ladana ia herevalaia? Ia ese peroveta tauna Amosa ena hereva amo ia gwau: “Unai amo inai bese taudia oredia, bona egu ladana idia abia bese idauidau taudia ibounai be mai edia ura bada ida Iehova do idia tahua. Unai be Iehova ena hereva.” (Kara 15:14-18) Unai hahediba taudia matamata be Iehova do idia diba sibona lasi, to ‘ena ladana do idia abia.’ Unai ena anina be idia ese Dirava ena ladana do idia gwauraia hedinarai bona taunimanima do idia gwau idia be Iehova ena taunimanima.

6-7. (a) Iesu be dahaka dainai tanobada dekenai ia mai? (b) Bona unai ena badina badana ma ta be dahaka?

⁶ Iesu ena ladana ena anina be “Iehova be Hamauria Tauna,” bona Iehova ese Iesu ia gaukaralaia abidadama taudia ibounai ia hamauria totona. Iesu ia mai tanobada dekenai taunimanima totona ena mauri ia henia. (Mat. 20:28) Unai mauri davana dainai taunimanima be mauri hanaihanai idia abia diba.—Ioa. 3:16.

⁷ To dahaka dainai taunimanima be unai mauri davana ena hahenamo idia abia be namo? Badina Eden umana ai dika ia vara. Atikol 22 ai ita herevalaia bamona, iseda tama sina ginigunadia, Adamu bona Heva, be Iehova dekenai idia gwau-edeede, unai dainai mauri hanaihanai abia dalana idia haboioa. (Gen. 3:6, 24) To, Iesu be badina badana ma ta totona ia mai. Satani ese Iehova dekenai koikoi herevadia ia gwauraia. (Gen. 3:4, 5) Unai dainai namona be taunimanima ibounai idia diba, Iehova be kerere ta ia karaia lasi bona ia be lalokau Tamana. Bona Iesu be tau maorona Iehova ena ladana ia hahelagaia totona, badina ia be Iehova ena ladana dainai ia mai bona Iehova ena ura hegeregerena gau ibounai ia karaia.

8. Iesu idia badinaia taudia ibounai be dahaka idia lalopararalaia be namo?

⁸ Iesu idia abidadama henia Iuda taudia bona Idau Bese taudia idia laloparara be namo, Iesu ena Tamana, Iehova Dirava be hahemauri ena Badina. (Ioa. 17:3) Bona danu, taunimanima ese idia do idia gwauraia Iehova ena taunimanima, Iesu hegeregerena. Danu, namona be idia diba unai ladana idia hahelagaia be mai anina bada. Unai dala amo mauri hanaihanai idia abia diba. (Kara 2:21, 22) Unai dainai Iesu idia badinaia taudia ibounai be Iehova bona Iesu idia dibaia be namo. Iesu be Ioane 17 ai ia noho guriguri ia hadokoa neganai, ia gwau: “Lau ese emu ladana be idia dekenai lau gwauraia hedinarai vadaeni, bona do lau gwauraia hedinarai noho, unai amo lau dekenai oi hahedinaraia lalokauna be idia ese do idia hahedinaraia, bona lau be idia ida do lau lalotamona.”—Ioa. 17:26.

“UMUI BE EGU HEREVA HAMOMOKANIA TAUDIA”

9. Edena dala ai ita hahedinaraia diba ita dekenai Iehova ena ladana be mai anina bada?

⁹ Iesu murinai idia raka taudia ibounai ese Iehova ena ladana hahelagaia karana idia laloa bada be namo. (Mat. 6:9, 10) Namona be edia mauri ai idia hahedinaraia Iehova ena ladana be mai anina bada gauna. Bona iseda kara amo ita hahedinaraia unai ladana ita laloa bada. To edena dala ai Iehova ena ladana ita hahelagaia diba? Eiava edena dala ai ita hamomokania diba Satani ia gwauraia herevadia be koikoi?

10. Isaia bukana ena karoa 42 ia lao 44 ese dahaka ia herevalaia? (Isaia 43:9; 44:7-9) (Laulau itaia danu.)

¹⁰ Isaia bukana ena karoa 42 ia lao 44 ese ia hahedinaraia Iehova ena ladana ita hahelagaia totona ita karaia gaudia be mai anina bada. Unai karoa lalodiai, Iehova be ia idia tomadiho henia lasi taudia ia noia, do idia hamomokania bema edia dirava be momokani. To ta be unai ia hamomokania diba lasi!—Isaia 43:9; 44:7-9 duahia.

11. Isaia 43:10-12 hegeregerena, Iehova be ena taunimanima dekenai dahaka hereva ia gwauraia?

¹¹ Isaia 43:10-12 duahia. Iehova be ena taunimanima ia herevalaia neganai, ia gwau: “Umui be egu hereva hamomokania taudia, . . . bona lau be Dirava.” Iehova ese idia ia noia inai henanadai idia haerelaia totona: “Dirava ma ta be lasi, lau hegeregerena, ani?” (Isa. 44:8) Unai henanadai ita haerelaia karana be hahenamo badana. Iseda hereva bona kara amo ita hamomokania Dirava ta be lasi, Iehova sibona be Dirava momokanina. Iena ladana ese ladana ibounai ia hereaia. Ena be Satani ese dala idauidau ai ita ia tohoa, to iseda mauri dalana amo ita hahedinaraia ita be Iehova ita lalokau henia momokani bona ita ura ia ita badinaia. Unai amo ita ese Iehova ena ladana ita hahelagaia.

12. Isaia 40:3, 5 ai ia noho peroveta herevana be edena dala ai ia guguru?

¹² Iehova ena ladana totona ita gaukara neganai, ita be Iesu Keriso ita tohotohoa noho. Isaia ia peroveta danu tau ta ese ‘Iehova ena dala do ia hegaegaelaia.’ (Isa. 40:3) Edena dala ai unai ia guguru? Ioane Bapatiso ese Iesu ena dala ia hegaegaelaia, Iesu be Iehova ena ladana dainai ia mai bona Iehova ena ladana ai ia hereva. (Mat. 3:3; Mar. 1:2-4; Luka 3:3-6) Unai peroveta herevana ma ia gwau: “Iehova ena hairai do ia hedinarai.” (Isa. 40:5) Edena dala ai unai ia vara? Iesu be tanobada dekenai ia mai neganai, ia ese Iehova ena kara bona hereva ia hahedinaraia goevagoeva, unai be hegeregere Iehova be tanobada dekenai ia mai.—Ioa. 12:45.

13. Edena dala ai Iesu ita tohotohoa diba?

¹³ Iesu bamona, ita be Iehova ena hereva hamomokania taudia. Ita ese Iehova ena ladana ita abia bona ita hereva henia taudia ibounai dekenai ena kara namodia ita herevalaia. To, unai ita karaia namonamo totona, Iehova ena ladana hahelagaia karana dekenai Iesu ena gaukara badana ita gwauraia hedinarai danu. (Kara 1:8) Iesu be Iehova ena hereva ia hamomokania tauna badana, bona ita be ena hakaua dalana ita badinaia. (Apok. 1:5) To ita ta ta dekenai Iehova ena ladana ena anina be dahaka?

IEHOVA ENA LADANA ITA LALOA BADA DALADIA

14. Salamo 105:3 hegeregerena, Iehova ena ladana be edena bamona ita laloa?

¹⁴ Iehova ena ladana dainai ita heagi. (Salamo 105:3 duahia.) Iehova ena ladana dainai ita heagi neganai, Iehova ia moale bada. (Ier. 9:23, 24; 1 Kor. 1:31; 2 Kor. 10:17) “Iehova dainai ia heagi,” unai hereva ena anina be ta ia moale badina ia diba Iehova be ena Dirava. Ita ese ma haida ita hamaoroa Iehova be helaga bona ia karaia gaudia ibounai be maoro, unai be hahenamo badana. Namona be ita hemarai lasi iseda gaukara turadia, sikuli turadia, neiba taudia, bona ma haida dekenai ita hahedinaraia ita be Iehova ena Witnes taudia! Diabolo ia ura haida dekenai Iehova ena ladana do ita gwauraia lasi. (Ier. 11:21; Apok. 12:17) Satani bona ena koikoi peroveta taudia idia ura taunimanima ese Dirava ena ladana do idia laloaboio. (Ier. 23:26, 27) To Iehova ena ladana ita laloa bada dainai, “dina ibounai lalonai” ita ura ia ita hanamoa.—Sal. 5:11; 89:16.

15. Iehova ena ladana dekenai ita boiboi ena anina be dahaka?

¹⁵ Iehova ena ladana ai ita boiboi noho. (Ioe. 2:32; Roma 10:13, 14) Iehova ena ladana ai ita boiboi anina be Dirava ena ladana ita dibaia bona gaukaralaia. To unai sibona lasi, namona be ita abia dae ia be Dirava momokanina, ia ita abidadama henia, bona ia ita noia ita do ia durua bona hakaua totona. (Sal. 20:7; 99:6; 116:4; 145:18) Danu ena ladana bona kara namodia be ma haida dekenai ita gwauraia, idia ita hagoadaia idia helalo-kerehai bona kara ta idia karaia Iehova ena lalonamo idia abia totona.—Isa. 12:4; Kara 2:21, 38.

16. Edena dala ai ita hamomokania diba Satani be koikoi tauna?

¹⁶ Iehova ena ladana dainai hisihisi ita haheaukalaia. (Iam. 5:10, 11) Hisihisi negadia ai Iehova ita badinaia noho neganai, ita hamomokania Satani be koikoi tauna. Iobu ena nega ai, Satani ese Iehova idia hesiai henia taudia dekenai inai koikoi herevana ia gwauraia, ia gwau: “Tau ta be ena gau ibounai do ia henia ena mauri ia dogoatao totona.” (Iobu 2:4) Satani ia gwau taunimanima ese nega namodia sibona ai Iehova do idia hesiai henia, bema nega aukadia idia davaria, Iehova do idia rakatania. Abidadama tauna Iobu ese unai hereva ia hakoikoia. Ita danu unai bamona ita karaia diba. Ena be Satani be hahetoho idauidau ia henia, to ita ese Iehova do ita rakatania lasi. Ita abia dae momokani Iehova be ena ladana dainai ita do ia naria.—Ioa. 17:11.

17. Petero Ginigunana 2:12 hegeregerena, edena dala ma ta ai Iehova ena ladana ita hanamoa diba?

¹⁷ Ita ese Iehova ena ladana ita matauraia. (Aon. 30:9; Ier. 7:8-11) Ita be Iehova ena Witnes taudia dainai, ita karaia gaudia ese ena ladana do ia hanamoa eiava hadikaia. (1 Petero 2:12 duahia.) Unai dainai, ita ura iseda hereva bona kara amo Iehova ena ladana ita hanamoa. Unai dala amo gau ibounai ita karaia diba ena ladana ita hanamoa totona, ena be ita be goevadae lasi taudia.

18. Edena dala ma ta ai ita hahedinaraia Iehova ena ladana be mai anina bada? (Futnout itaia danu.)

¹⁸ Ita be Iehova ena ladana ita laloa bada, to iseda ladana ita laloa lasi. (Sal. 138:2) Dahaka dainai unai be mai anina bada? Badina Iehova ita hamoalea totona gau haida ita karaia neganai, nega momo taunimanima be ita do idia ura henia lasi eiava ita do idia gwauraia dika.a Iesu ia mase neganai, taunimanima ese ia be kara dika tauna bamona idia laloa bona ia idia gwauraia dika. To Iesu ia abia dae unai dala ai ia mase neganai, Iehova ena ladana ia hanamoa. Ia abia hemarai ia laloa lasi, bona ia laloa lasi haida be ia dekenai dahaka idia laloa. (Heb. 12:2-4) To ia laloa bada gauna be Dirava ena ura do ia karaia.—Mat. 26:39.

19. Iehova ena ladana be edena bamona oi laloa, bona dahaka dainai?

¹⁹ Ita ese Iehova ena ladana ita laloa bada bona ita moale ita idia gwauraia Iehova ena Witnes taudia. Unai dainai herevana taunimanima ese ita idia gwauraia dika, to ita ura Dirava ita badinaia noho. Ita dekenai Iehova ena ladana be mai anina bada, to iseda ladana lasi. Unai dainai, ena be Satani ese dahaka ia karaia ita ia koua totona, to namona be iseda lalona ita hadaia Iehova ena ladana ita hanamoa noho totona. Unai dala amo, do ita hamomokania Iehova ena ladana be mai anina bada gauna, Iesu Keriso ese ia laloa hegeregerena.