Dina Tamona Hebouhebou Ena Program Matamata

Hari inai negai, iseda kudouna korikori ita naria namonamo herevadia momo idia noho, unai amo mauri ita moalelaia bona ita noho daudau diba. Iseda kudouna ese ia laulaulaia gauna ia gaukara namonamo be gau badana. Unai dainai, lagani 2004 ena dina tamona hebouhebou ena sinado maorona be: “Iehova Hesiai Henia mai Kudouna Ibounai Ida.” (1 Siv. 28:9) Ita ura dikadika dahaka gaudia do ita dibaia?

Sekit naria tauna ese “Ma Haida Durua mai Moale ida Iehova Idia Hesiai Henia Totona” do ia herevalaia. Inteviu kahana ese do ia hahedinaraia idia ura Iehova idia hesiai taudia edia ura ita habadaia bona Baibel stadi ita karaia karana ese moale ia havaraia. Ibounai idia diba vadivadi tauna ena hereva ginigunana, “Tanobada Dikana Lalonai Eda Kudouna Ita Gimaia Namonamo” amo heduru bona hagoadaia herevadia do idia abia. Daba kahana ena program be bapatiso ena hereva amo do ia ore.

Adorahi ai, inai kahana “Heduru Ita Henia” ese ma haida ita durua diba dalana do ia hahedinaraia. Tama sina ese dahaka idia karaia diba edia natudia be lalo-ani kara kereredia amo idia gimaia bona idia durua Iehova kahirakahira idia lao totona? Inai kahana “Emui Natudia Umui Durua Iehova Dekenai Moale Idia Tahua Totona” ese heduru hereva namodia do ia henia bona unai karaia dalana do ia haheitalaia.

Iehova ese ia henia gaudia ibounai ita gaukaralaia namonamo iseda kudouna ia laulaulaia gauna ia gorere lasi bona ia goada totona, a? Vadivadi tauna ena hereva ginigabena, “Mai Iseda Kudouna Ibounai ida Iehova Ita Hesiai Henia Noho” be lauma dalanai ita goada noho totona mai anina bada gaudia foa do ia herevalaia. Mai momokani ida ita guriguri, Dirava ena Hereva ita stadilaia, ita haroro goadagoada, bona Keristani taudia haida ida ita hebamo neganai, iseda nega bona goada ena bada be edena bamona? Unai gaudia haida ita hanamoa diba be namo, a?

Iehova ese ita ia boiria, ia gwau: “Mai oiemu kudouna danu, hadibaia hereva do oi tahua, bona aonega hereva dekenai do oi kamonai namonamo.” (Aon. 23:12) Hari, palani oi karaia unai dina namona, Baibel ena hadibaia herevadia do idia henia dinana oi lao henia totona. Unai bamona oi karaia neganai, unai ese oi do ia hagoadaia mai kudouna ibounai bona mai moale ida Iehova oi hesiai henia totona.