Dina Tamona Hebouhebou Ena Program Matamata

Inai hesiai laganina ena dina tamona hebouhebou program ena sinado be Baibel amo: “Dirava Ena Ura Do Umui Karaia​​—Satani Do Umui Tuari Henia.” (Iam. 4:7) Inai nega aukadia lalonai unai be hakaua hereva namona! Dirava ena taravatu ita badinaia dainai Satani ese ita ia tuari henia. Unai program ese ita do ia hadibaia edena bamona ita gini goada diba bona Diabolo ena abidadama hadikaia palani idauidau ita koua. Unai dina tamona hebouhebou ai, lauma dalanai dahaka gau namodia do ita abia?

Sekit naria tauna ese do ia hahedinaraia edena bamona “Ruma Bese Taudia Ta Ta ese Dirava Ena Siahu Henunai Idia Noho Idia Hahedinaraia,” be ruma bese do ia durua tanobada ena metau idauidau idia haheaukalaia totona. Ia vadivadi tauna ena hereva ginigunana, “Diabolo Tuari Henia Ena Anina,” ese do ia hahedinaraia dahaka dainai bona edena dala ai ita gaukara goada be namo Satani ese iseda lauma dalanai ia hadikaia toho karadia ita dadaraia totona. Kahana rua be matamata taudia totona idia hegaegaelaia, idia danu be Diabolo ena koikoi daladia dekenai idia gima be namo. Hari idia bada vadaeni Keristani taudia be guna idia matamata neganai, idia ese tanobada ena ura idauidau idia dadaraia. Mai moale ida edia ekspiriens haida do ita kamonai.

Tanobada taudia ibounai ese siahu taudia idia kamonai henia be maoro. Hereva ia henia vadivadi tauna ese do ia hahedinaraia dala hani dekenai Dirava ita kamonai henia be namo: (1) gavamani taudia dekenai, (2) kongregesen lalonai, (3) moni gaukara gabudiai, bona (4) ruma bese lalonai. Program namona unai!

Unai dina tamona hebouhebou dekenai bapatiso idia ura abia taudia ese hakaua naria tauna idia itaia haraga. Namona be unai deit be iseda kalenda dekenai ita makaia bona unai hebouhebou ena program ibounai lalonai ita noho. Hanaihanai Iehova ita kamonai henia neganai, do ita abia hahenamo idauidau be do idia noho hanaihanai.