Dina Tamona Hebouhebou Ena Program Matamatana

Matana be hoa gauna ta. (Sal. 139:14) To, ia be gau tamona sibona ia raraia diba. Unai be momokani tauanina bona lauma dalanai. Iseda lauma matana ia diari bona gau tamona ia raraia noho totona, gau badana be Dirava ena ura ita karaia noho. Satani ena tanobada lalonai matana veria gaudia be momo dainai, lagani 2006 ena dina tamona hebouhebou ena sinado be namo herea, unai be “Vaira Kahana Sibona Raraia Noho.”​​—Mat. 6:​22.

Edena dala ai iseda kara ita naria namonamo bena Iehova ena hahenamo ita abia diba? (Aon. 10:22) Unai henanadai be inai kahana ladana, “Vaira Kahana Sibona Raraia Noho Ena Hahenamo” ese do ia haerelaia. Inteviu haida ese Baibel ena hakaua herevadia badinaia karana ena namo do idia hahedinaraia. Hereva ginigunana be vadivadi tauna ese do ia henia, ena ladana be “Tanobada Dikana Lalonai, Vaira Kahana Sibona Raraia Noho.” Unai hereva ese ita ia sisiba henia iseda mauri idia hadikaia bona lauma dalanai ita idia hamanokaia gaudia ita dadaraia totona. Danu, do ita diba dahaka ita karaia be namo “gau namona” ita abia totona.​​—Luka 10:42.

Edena dala ai tama sina bona ma haida ese matamata taudia idia durua diba lauma gaudia idia tahua totona? Unai mai anina bada henanadai be inai hereva rua, “Dala Maorona ai Edia Natudia Idia Hakaua Tama Sina” bona “Lauma Gaudia Idia Tahua Matamata Taudia” ese do ia haerelaia. Bona unai hereva rua lalonai tama sina bona matamata taudia do idia inteviu henia. (Sal. 127:4) Vadivadi tauna ese do ia henia hereva dokona ai do ia hahedinaraia edena bamona ita ta ta, ruma bese, bona kongrigeisen be Iehova ena orea ida ita raka hebou diba.

Herevana ita be hereva momokani lalonai, vanegai sibona ita vareai eiava lagani momo lalonai Iehova ita hesiai henia vadaeni, to gau badana be vaira kahana sibona ita raraia noho. Unai ita karaia totona, dina tamona hebouhebou ese ita do ia durua.