Tiokratik Haroro Sikuli Ena Riviu

Inai henanadai be Tiokratik Haroro Sikuli dekenai do ita herevalaia, October 27, 2003 ia matamaia purana ai. Sikuli naria tauna ese miniti 30 lalonai riviu do ia karaia, unai gaudia be September 1 ia lao October 27, 2003 wiki herevadia dekenai. [Itaia: Bema henanadai edia dokona ai buka ta idia torea lasi, sibona emu tahua karana oi karaia be namo haere oi davaria totona.​—Haroro Sikuli bukana, rau 36-7 itaia.]

HEREVA NAMONAMO KARANA

1. Timoteo Ginigunana 2:9 be “idia kwatua namonamo dabua” ia gwauraia neganai, ena anina be dahaka, bona unai ese edena dala ai platfom amo eiava haroro dekenai ita henia herevana ia hanamoa eiava ia hadikaia diba? [1, be rau 132 par. 4-5] Unai hakaua herevana be tatau bona hahine ese idia badinaia diba, bona ena anina be iseda dabua edia toana idia namo. Keristani tauna ese unai hakaua hereva ia badinaia neganai, haida ese ia bona Iehova ena orea do idia hanamoa. Ma haida ese ita “kwatua namonamo dabua” idia itaia neganai, reana do idia ura ita harorolaia sivaraina idia kamonai totona.

2. Baibel ena hakaua herevadia 1 Ioane 2:​15-17, Efeso 2:​2, bona Roma 15:3 ai be edena dala ai ita idia durua iseda toana ita laloa totona? [2, be rau 133 par. 2-4] Ioane Ginigunana 2:​15-17 ena hereva ita abia dae neganai, unai ese ita do ia durua iseda dabua amo ita hahedinaraia tanobada ita ura henia lasi, tauanina ena ura dikadia ia habadaia lasi, eiava kohu hekokorokulaia karadia ia hahedinaraia lasi totona. Efeso 2:2 ita laloa neganai, ita diba iseda dabua toana ese tanobada ena kamonai lasi karana ia hahedinaraia lasi. Roma 15:3 ese Iesu ena haheitalai, Iehova ena ura ia karaia bona taunimanima ia durua karana ia herevalaia. Unai dainai, ita bona ita haroro henia taudia huanai bema iseda dabua ena sitaelo bona tauanina ena toana be koua gauna ta, unai ita dadaraia.

3. Dahaka dainai gari lasi toana be mai anina bada, bona platfom amo eiava haroro gaukara lalonai ita hereva neganai, edena dala amo gari lasi toana ita hahedinaraia diba? [4, be rau 135 maua; rau 136 par. 5, maua] Gari lasi toana ita hahedinaraia neganai, kamonai taudia ese iseda toana lasi to ita herevalaia gauna do idia laloa namonamo. Gari lasi toana ita abia diba bema Iehova dekenai ita tabekau, ita hegaegae namonamo, bona ita henia hereva ita tohoa neganai, ita gwauraia badabada. (Sal. 55:22) Bona hanaihanai haroro gaukara ita karaia, hebou dekenai ita haere, bona Tiokratik Haroro Sikuli lalonai dala ia kehoa neganai kahana ma haida ita karaia ese iseda gari do ia kokia.

4. Iesu be “Dirava ena hereva ia gwauraia maoromaoro tauna” dainai, haroro lalonai Baibel ita gaukaralaia namonamo totona edena dala ai ia ese haheitalai namona ia hahedinaraia? (Apok. 3:​14) [8, be rau 143 par. 2-3] Iesu ese ma haida ia hadibaia neganai, nega momo ia ese Baibel ena hereva ia gwauraia, sibona ena hereva amo ia gwauraia, eiava edia sivarai ia gwauraia. (Mat. 4:​3-​10; 12:​1-8; Luka 10:​25-​28; 17:32; 24:​27, 44-​47) Momokani ia gwau diba ia hadibaia hereva be ia sibona ena amo lasi. (Ioa. 8:​26; 14:10) Ita danu be Baibel amo henanadai idauidau haere karana ita manadalaia be namo.

5. Edena dala ai Baibel ita gaukaralaia namonamo diba? (Tito 1:9) [9, be rau 144 par. 1, maua] ‘Hereva momokani, ita abidadama henia bona ita hadibaia gauna, do ita badinaia momokani’ totona, Baibel ita duahia bona stadilaia be namo. Hebou dekenai haere ita henia neganai, Baibel siridia ita gwauraia be namo. Henanadai idia gwauraia eiava gau haida idia vara neganai, namona be nega ibounai unai gauna dekenai Baibel ena hereva ita tahua be namo. Bema gau ta dekenai Baibel ena lalohadai ita diba lasi, namona be mai ura ida tahua ma haida ita karaia.

HEREVA NAMBA 1

6. Stadi ena anina be dahaka, bona Dirava ena Hereva stadilaia hanaihanai karana ena namo haida be dahaka? [1 bona 6, be rau 27 par. 3; rau 32 par. 4] Stadi ena anina be iseda lalona do ita gaukaralaia, gau ta do ita laloa namonamo totona. Danu ita duahia gauna ita laloa, ita diba vadaeni gaudia ida ita hahegeregerea, idia gwauraia herevadia edia badina ita laloa, bona namona be ita dekenai idia matamata lalohadai ita laloa dobu. Hanaihanai Baibel ita stadilaia karana ese ita ia durua ita manau bona iseda kudouna lalonai Dirava ena Hereva ia mauri noho totona, kara dika ese ita ia koia garina ita ia gimaia. Unai dainai, ita be ‘Iehova ena ura hegeregerena do ita noho, bona nega ibounai ia do ita hamoalea bona eda mauri ese kara namodia edia anina do ia havaraia.’ (Kol. 1:​10; 3:​5-​10; Deu. 17:​18-​20; Heb. 2:1; 3:​13)

7. Iamesi 1:​5, 6 ena hereva hegeregerena, mai anina bada gaudia ita abia hidi gwauraia neganai, dahaka be gau badana? [4, w01 9/1 rau 28 par. 4] Guriguri be gau badana. Namona be mai lalona goadana ida Iehova ita noia ita ia hakaua, abia hidi maorona ita karaia totona. Nega momo, lauma helaga ena heduru amo Baibel ena hakaua herevadia do ita laloatao, eiava reana ita do ia durua iseda hekwakwanai ia herevalaia sirina ta ita lalo-pararalaia goevagoeva totona.

8. Dina badadia be dahaka, bona dahaka dainai idia be mai anina bada? [5, si Stadi Namba 2 par. 27] Dina badana ta ena anina be histori ena kalenda dekenai, taunimanima be mai edia badina maorona dainai unai dina idia abia dae bona unai nega be Baibel ese ia sivarailaia negana ta ida idia hahegeregerea diba. Unai dina amo, Baibel lalonai idia vara gaudia haida edia sivarai be kalenda dekenai idia makaia diba.

9. Edena dala ai “samania kava hereva ia gwauraia noho tauna” be kavakava? (Aon. 10:18) [7, w01 9/15 rau 25 par. 3] Tau ta ese ta ia badu henia dainai ia samania koikoi neganai, ena hadikaia herevana ese unai tauna ena kara korikorina ia haidaua lasi. Mai aonega ida ia kamonai taudia ese unai badu do idia itaia bona unai hadikaia hereva ia gwauraia tauna do idia matauraia lasi. Unai dala ai ma ta ia samania kava tauna ese sibona ia hadikaia.

10. Tanobada matamata lalonai taunimanima be edena dala ai Iehova ena lalohadai nega dekenai do idia lalo-pararalaia? [8, si Stadi Namba 2 par. 32] Tanobada matamata lalonai, gorere, mase, lahedo karana, hesiku mamina, bona anina lasi karadia be do idia ore. Ita ura henia bona moalelaia gaukara do idia noho. Lagani tausen momo idia hanai neganai, tanobada taudia be Iehova ena lalohadai nega dekenai do idia lalo-pararalaia: ‘Badina lagani 1,000 Iehova ena vairanai be dina tamona sibona bamona. Idia ore haraga, varani bamona.’ (Sal. 90:4; Apok. 21:4)

WIKI TA TA ENA BAIBEL DUAHIDUAHI

11. Momokani eiava Koikoi: Korinto Ginigunana 2:9 ai, aposetolo Paulo ese Iehova be iena kamonai taudia totona ia hegaegaelaia gaudia ia herevalaia. Gwauraia hedinarai. [1, ip-2-E rau 366 maua] Koikoi. Unai siri ia hahedinaraia bamona, Paulo be Iehova ena aonega hehunina ia herevalaia, iena ura be tanobada bona guba dekenai maino bona lalo-tamona do ia mailaia. (1 Kor. 2:7) Lauma gaudia dekenai edia diba be bada lasi taudia eiava lauma gaudia idia diba lasi taudia ese unai aonega dobuna idia lalo-pararalaia lasi, to Dirava ena lauma idia abia taudia sibona dekenai ia hahedinaraia. (1 Kor. 2:​10)

12. Korinto Ginigunana 10:14 be edena hedibagani ia herevalaia, bona Iehova ese edena bamona “dala ta do ia kehoa”? [2, w91 10/1 rau 10-​11 par. 11-14] Dirava ena lauma amo idia vara herevadia ese taunimanima dekenai ia vara momo hedibagani ia herevalaia, unai kara ta ese reana ta ia veria diba Dirava ia badinaia lasi totona. (1 Kor. 10:​6-​11) Iehova ese heduru idauidau ia henia lauma dalanai ita ia hagoadaia totona, unai amo dala ia kehoa hedibagani ita hanaia totona. Bema unai heduru gaudia ita gaukaralaia namonamo, hedibagani do ita hanaia bona kara maoromaoro do ita badinaia ela bona mase.

13. Iesu ena hariharibada karana ese Keristani taudia be edena dala ai ia durua? (2 Kor. 8:9) [4, w92 1/15 rau 16 par. 10] Ena be guba dekenai Iesu be taga bada tauna, to mai ura ida iena taga ia negea bona ogogami tauna ai ia lao, iena boubou gauna idia abia dae taudia ia hanamoa bada totona. Ita be Iesu murinai ita raka taudia dainai, unai ese ita ia hagoadaia mai ura ida ita sibona bona iseda kohu ita henia Iehova ena ura ita karaia bona ma haida ita durua mauri idia abia totona.

14. Edena dala ai Taravatu be “naria tauna bamona, ia mai bona Keriso ia ginidae”? (Gal. 3:​24) [5, w02 6/1 rau 23 par. 11] Paulo ena negai, ruma bese badana lalonai unai naria tauna be hesiai eiava igui hesiai tauna bamona, ia ese natudia ia naria bona sikuli dekenai ia hakaudia lao. Unai hegeregerena, Taravatu ese Israela taudia dekenai ia hahedinaraia idia be kara dika taudia, danu Taravatu ese dekena besedia edia tomadiho koikoi karadia bona matabodaga karadia amo Israela taudia ia naria bona Mesia, hahemauri ena dala do ia hadibaia tauna, dekenai idia ia hakaua. (Gal. 3:​19)

15. Dahaka “tanobada ena diba matamaia gaudia” amo ita naria namonamo be namo, unai amo ita do idia hakaua kerere lasi? (Kol. 2:​8, NW ) Unai gaudia be Keristani lasi taudia edia mauri ia biagua lalohadai koikoi, tanobada ena aonega, bona tanobada ena lalohadai. Unai bamona gaudia ese iseda lauma dalana ia hadikaia bona Keristani lalohadai momokanina ia hadikaia. [7, w94 12/15 rau 16 par. 12-​13]