Henanadai Mauana
◼ Edena dala ai kongregesen heboudia edia nega korikori ita badinaia diba?
Hagoadaia hereva namodia be turadia ida ita herevalaia neganai, nega be ia heau haraga. Unai dainai, hebou ena kahana idauidau edia nega korikori ita badinaia totona be ia auka. Dahaka gaudia ese ita idia durua diba?
Nega korikori ai hebou hamatamaia. Kongregesen taudia ibounai idia hebou neganai, heduru gauna be hebou taudia oi noia miniti ta eiava rua ia do noho lalonai edia helai gabudia dekenai idia helai totona, unai amo hebou be nega korikorina ai do ia matamaia namonamo diba. (Had. 3:1) Hebou maragidia, hegeregere haroro gaukara heboudia, edia nega korikori dekenai umui hamatamaia be namo, do idia mai leiti taudia totona umui naria lasi.
Hegaegae namonamo. Nega korikori ai emu kahana oi karaia totona, oi hegaegae guna be gau badana. Oiemu hereva ena badina oi laloa namonamo. Point badadia oi makaia, bona oi gwauraidia hedinarai namonamo. Gau maragidia momo herea oi herevalaia lasi. Auka lasi herevadia oi gaukaralaia. Bema emu kahana be haheitalai bona inteviu idia noho danu, oi karaia toho guna. Bema ia hegeregere, mai gado regena badana ida emu kahana oi tohoa lalonai, emu nega oi itaia danu.
Oiemu kahana oi haria. Ena be hereva do oi henia eiava helai taudia ida do oi kiki, to emu hereva be kahana ta ta dekenai oi haria be heduru gauna. Kahana ta ta be miniti hida lalonai do oi herevalaia oi abia hidi, bona emu pepa dekenai unai kahana ta ta edia badinai oi torea hedinarai. Bena hereva lalonai, emu nega oi sekea. Emu kahana be helai taudia ida do oi kikilaia neganai, namona be hamatamaia kahana dekenai hereva momo oi gwauraia lasi, gabeai do idia hedinarai mai anina bada herevadia do oi gwauraia haraga lasi totona. Namona be Gima Kohorona Stadi naria taudia ese nega idia atoa stadi ena dokona ai riviu mauana idia herevalaia totona. Danu namona be idia naria namonamo, ane bona guriguri edia nega idia gaukaralaia garina.
Nega korikori ai hebou hadokoa. Bema hebou ta lalonai kahana be idauidau, hegeregere Hesiai Hebou, namona be hereva henia taudia ta ta idia diba edena negai edia kahana do idia hamatamaia bona hadokoa. Dahaka idia karaia diba bema hebou ena nega ia hanaia gwauraia? Reana hereva henia tadikaka ta eiava ibounai ese edia kahana ena nega idia hakwadogia, bona point badadia sibona idia gwauraia bona anina lasi gaudia idia herevalaia lasi. Unai bamona idia karaia neganai, idia hahedinaraia idia be hadibaia taudia namodia.
Ita hebou taudia danu ese haere kwadogidia bona point badadia herevalaia karana amo kahana ia karaia tadikakana ita durua diba. Ita ibounai be unai bamona ita karaia diba neganai, hebou do ita “karaia namonamo, mai dala maorona” ida.—1 Kor. 14:40.