Hesiai Hebou Hegaegaelaia Dalana
1. Hesiai Hebou idia karaia ena badina be dahaka, bona edena dala ai unai ese ita ia durua bada?
1 Hesiai Hebou idia karaia ena badina be ita ia durua haroro gaukara ita karaia namonamo totona. Hesiai hebou ese ia herevalaia momo gaudia be inai: Basileia ena sivarai namona ita harorolaia, taunimanima be hahediba taudia ai ita halaoa, bona Dirava ena hahemaoro negana ita harorolaia. (Mat. 28:20; Mar. 13:10; 2 Pet. 3:7) Bema unai hebou totona ita hegaegae namonamo bona haere ita henia, unai ese ita do ia durua bada.
2. Edena dala ai ita hegaegae tok ta ita kamonai henia totona?
2 Tok: Tadikaka ese do ia henia tok dekenai do ia gaukaralaia buka ena ladana be sediual ai ia noho. Namona be unai kahana oi riviulaia, idia noho siridia oi itaia, bona emu haroro gaukara ai unai kahana oi gaukaralaia dalana do oi laloa.
3. Henanadai bona haere kahana ita hegaegaelaia totona, dahaka ita karaia be namo?
3 Henanadai Bona Haere: Tadikaka ese inai kahana be Gima Kohorona Stadi bamona do ia karaia, to namona be ena hamatamaia herevana bona hereva dokona ia hakwadogia. Paragraf ta ta ai point badadia oi makaia, bona oi hegaegae unai point idia hahedinaraia haere kwadogidia oi henia totona.
4. Helai taudia ida kikilaia ena kahana be edena bamona ita hegaegaelaia?
4 Helai Taudia ida Kikilaia: Tadikaka ese inai kahana be tok ta bamona do ia henia, to henanadai haida ia henia bona helai taudia idia haere diba. Bema point badadia oi makaia bona idia noho Baibel siridia oi itaia, vadaeni tadikaka be henanadai ia henia neganai, oi haere diba. Namona be inai kahana ia naria tadikaka ese helai taudia ia hagoadaia point badadia idia hahedinaraia totona.
5. Dahaka ese ita ia durua haheitalai amo namo ita davaria totona?
5 Haheitalai: Kahana haida be mai edia haheitalai, bona iseda teritori ai unai kahana do ita gaukaralaia daladia idia hahedinaraia. Inai kahana ia naria tadikaka ese elda taudia, o idia manada pablisa o painia taudia ia noia haheitalai idia karaia totona. Unai kahana oi hegaegaelaia neganai, namona be tadikaka ese do ia herevalaia dalana oi laloa. Bema Basileia Gaukara pepana ai magasin hariharilaia dalana oi haheitalaia, namona be do oi herevalaia dalana bona ruma taudia dekenai oi gaukaralaia dalana do oi laloa. Haheitalai lalonai do idia gaukaralaia buka o magasin oi abia mai be namo. Ruma Bese Ena Tomadiho negana ai, unai haheitalai haida umui karaia toho be namo.
6. Hesiai Hebou totona ita hegaegae ena badina haida be dahaka?
6 Bema ita hegaegae namonamo bona do idia henia kahana ta ta ita lalohadailaia, Hesiai Hebou do ita moalelaia bada. Unai bamona ita karaia neganai, ta ta ita hagoadaia diba. (Roma 1:11, 12) Bema nega ita atoa Hesiai Hebou totona ita hegaegae, vadaeni do ita hegeregere haroro gaukara ita hagugurua totona.—2 Tim. 3:17.