Dina Tamona Hebouhebou Ena Program Matamatana

Bema ita idia hadibaia eiava ita itaia gau dikana ta be do ia vara to kara ta ita karaia lasi, dika bada ita davaria diba. Iehova ese lauma dalanai ia henia hakaua dalana ita badinaia be mai anina bada. Lagani 2005 ena dina tamona hebouhebou dekenai unai do idia gwauraia hedinarai. Iena sinado be “ ‘Emui Kamonai Karana Do Umui Naria Namonamo.’ ”—Luka 8:18.

Vadivadi tauna ese ena hereva ginigunana lalonai do ia herevalaia gauna be inai: Edena bamona Paulo ese Dirava ena lauma amo ena revareva ena karoa ginigunadia ia torea bona idia be mai anina bada hari ita dekenai. Hereva dokona, “Dirava Ena Hadibaia Herevana Kamonai Namonamo Noho” ai, ia ese ibounai do ia durua bena idia tahua idia be momokani Iehova, iena Natuna, bona “hesiai tauna mai ena kamonai, bona mai ena kara maoromaoro” idia kamonai henia noho eiava lasi.—Mat. 24:45.

Program ena kahana haida be ruma bese taudia dekenai namo bada do ia havaraia. “Dirava Ena Hereva Idia Kamonai Bona Gau ta ese Ia Koua Lasi Ruma Besedia” ese ita do ia durua tanobada gaudia ese iseda lauma dalana idia koua lasi totona. Unai hereva lalonai, lauma gaudia idia atoa guna totona edia noho dalana idia haidaua taudia do idia inteviu henia. “Dirava Ena Hereva Kamonai Namonamo Karana ese Matamata Taudia Ia Gimaia Dalana” lalonai matamata taudia do idia inteviu henia, idia be sikuli dekenai, edia turadia ida, eiava haroro gaukara lalonai hereva momokani idia badinaia. “Dirava Idia Kamonai Henia Bona Diba Idia Abia Natu Maragidia” ese ita ia durua natu maragidia edia diba ita laloa maragi lasi totona. Maragidia bona edia tama sina idia inteviu henia neganai, unai ese ita do ia durua natudia idia maragi lalonai ita hadibaia ena namo ita itaia totona.

Satani be “tanobada taudia ibounai ia koia noho” lalonai, Iehova be ena abidadama hesiai taudia dekenai raka dalana namona ia hahedinaraia noho. (Apok. 12:9; Isa. 30:21) Iena sisiba herevadia ita kamonai namonamo bona iseda mauri lalonai ita badinaia neganai, ita be do ita aonega, moale do ita davaria, bona mauri hanaihanai ena dala dekenai ita do ia hakaua lao.—Aon. 8:32-35.