Iehova ese Ia Abia Hidi Siahu Taudia Ita Matauraia be Namo
Inai ladadia Kora, Datana bona Abirama oi kamonai neganai, dahaka kara oi laloa? Gwau-edeede! Daidia dekenai idia gwau-edeede? Dirava ese Ia abia hidi siahu taudia idia gwau-edeede henia. Idia badinaia dala dikana ena sivarai be Numera karoa 16 dekenai ia noho, bona Gima Kohorona August 1, 2002 ena kahana ta ladana “Dirava ese Ia Abia Hidi Siahu Taudia Ita Badinaia mai Kamonai Ida” ese ia vara gauna ia herevalaia. Unai oi duahia bona gabeai inai mai anina bada vidio ladana Respect Jehovah’s Authority oi itaia neganai, oi do ia durua. Kora ena kamonai natudia bona edia gwau-edeede tamana, guba bona tanobada ena Lohia Badana ia inai henia tauna, huanai ia vara hepapahuahu do oi itaia. (Num. 26:9-11) Inai sivarai momokanina ese ita ibounai ia hagoadaia be namo Dirava ita badinaia momokani totona.
Vidio oi itaia neganai, Kora bona ena gwau-edeede bamodia be edia badinaia karana dekenai idia moru daladia 6 ia hamomokania gaudia oi tahua: (1) Edena dala ai Dirava ese ia abia hidi siahu taudia idia matauraia lasi? (2) Edena bamona hekokoroku, dagi bada tahua karana bona mama karana ese idia ia hamorua? (3) Iehova ese ia abia hidi taudia edia kerere be edena bamona idia laloa? (4) Dahaka maumau lalohadaina idia hahedinaraia? (5) Dahaka dainai edia hesiai gaukara ena hahenamo idia moalelaia lasi? (6) Edena dala ai edia turadia bona ruma bese taudia idia badinaia to Dirava idia badinaia lasi?
Inai Baibel drama amo ita dibaia gaudia ese dahaka ia hahedinaraia iseda lalohadai Dirava ese ia abia hidi taudia dekenai: (1) Kongrigeisen lalonai elda taudia ese idia abia hidi gaudia dekenai edena bamona ita kara be namo, bona dahaka dainai? (2) Iseda ura dikadia be edena bamona ita koua diba? (3) Kongrigeisen idia hakaua totona idia abia hidi taudia edia kerere dekenai edena bamona ita kara be namo? (4) Bema iseda kudouna dekenai maumau karana ia matamaia, dahaka ita karaia be namo? (5) Ita dekenai idia henia hahenamo idauidau be edena bamona ita lalodia be namo? (6) Daidia ita atoa guna lasi be namo, to Dirava ita badinaia guna, bona unai be edena negai ita dekenai do ia auka?
Kongrigeisen dekenai, inai sivarai umui herevalaia murinai, unai vidio oi itaia lou be namo, ani? Unai amo Dirava ese ia abia hidi siahu taudia ita matauraia be namo ena badina do ita laloa bada momokani!—Sal. 18:25; 37:28.