“Manoka Bona Hesiku Taudia be Lohiabada ese Ia Hagoadaia Noho”
1 Ita ibounai be nega haida ita hesiku. Reana gaukara idauidau bona hari “metau dikadia momo” negana lalonai hekwakwanai momo ita davaria dainai, ita hesiku. (2 Tim. 3:1) Ita be Iehova ena hesiai taudia dainai, edena dala ai goada ita abia, iseda haroro gaukara dekenai ita hesiku lasi totona? Iehova dekenai ita tabekau, badina “Iena siahu be bada herea.” (Isa. 40:26) Iehova be iseda ura gaudia ia diba bona Ia ura bada ita ia durua.—1 Pet. 5:7.
2 Iehova Ena Heduru Daladia: Iehova be ena lauma helaga eiava gaukara siahuna ia henia ita goada totona—unai gaukara siahuna be goada momokani, bona Dirava be unai siahu tamona amo guba, tanobada, bona gau ibounai ia karaia. Bema iseda goada ia manoka ia lao, Dirava ena lauma helaga be ita ia durua ‘eda goada do ita hamatamataia lou’ totona. (Isa. 40:31) Oi sibona oi nanadaia, ‘Edena negai Iehova lau noia lauma helaga ia henia, unai amo goada lau abia egu Keristani maduna lau hagugurua totona?’—Luka 11:11-13.
3 Dina ta ta ai Baibel ita duahia bona laloa dobu, bona nega ibounai iseda buka bona magasin idauidau ita stadilaia neganai, ita be “sinavai badinai idia hadoa audia bamona, edia huahua atoa neganai, idia ese anina idia atoa bada herea. Edia raurau danu do idia kakoro lasi.”—Sal. 1:2, 3.
4 Danu, Iehova be tadikaka bona taihu ia gaukaralaia ita “idia durua bada herea” totona. (Kol. 4:10, 11) Kongrigeisen heboudia dekenai tadikaka taihu edia hereva, haere, bona tok amo ita idia hagoadaia. (Kara 15:32) Danu, Iehova be elda taudia amo heduru bona hagoadaia herevadia ia henia.—Isa. 32:1, 2.
5 Haroro Gaukara: Bema lalomanoka o hesiku mamina oi abia, haroro gaukara oi rakatania lasi! Haroro be gaukara hereadaena—hanaihanai haroro gaukara ita karaia neganai, goada ita abia. (Mat. 11:28-30, NW ) Sivarai namona harorolaia gaukarana ese ita ia durua Dirava ena Basileia, mauri hanaihanai, bona do idia vara hahenamo hereadaedia ita lalodia noho totona.
6 Iehova ese inai nega dikana ia do haorea lasi lalonai, gaukara bada ia do noho. Unai dainai, “Dirava ese ia henia goadana” amo iseda hesiai gaukara ita goadalaia noho be namo. (1 Pet. 4:11; BHğ) “Manoka bona hesiku taudia be [Iehova] ese ia hagoadaia noho” dainai, Iena heduru amo iseda hesiai gaukara do ita hagugurua.—Isa. 40:29.