Baibel Herevalaia Momo!
1 October 1, 1919 ai, The Golden Age magasin ginigunana idia halasia. Ia be tulu hereadaena haroro gaukara dekenai. Dahaka dainai? Badina ia be taunimanima ibounai totona idia karaia. To Gima Kohorona be idau, badina lagani momo lalodiai ia be idia gwauraia “orea maragi” taudia totona idia karaia. (Luka 12:32) Basileia harorolaia taudia ese The Golden Age idia laloa bada dainai, lagani momo lalodiai unai magasin momo herea idia hariharilaia, Gima Kohorona ena namba ia hanaia danu.
2 The Golden Age magasin ese taunimanima dekenai ia hahedinaraia Keriso ena Lagani 1,000 Lohia Negana be taunimanima edia hekwakwanai do ia kokia negana korikorina, taunimanima edia mauri do ia hanamoa momokani negana unai. Gabeai, nega ia idau ia lao dainai, The Golden Age dekenai gau haida idia haidaua danu. Lagani 1937 ai, iena ladana idia haidaua bena idia gwauraia Consolation. Lagani 1946 ai, ena ladana be Awake! idia gwauraia, hari ita gaukaralaia ladana unai.
3 Idia halasia matamaia negana amo, unai magasin be lagani 1919 amo ia hamatamaia haroro gaukara badana ia durua badabada. (Mat. 24:14) To, nega ia kwadogi dainai, toana be Awake! karaia dalana ai haidaua sisina be namo.
4 Taunimanima milioni momo be Awake! duahia karana idia moalelaia, badina ia ese gau idauidau be lalona veria dalanai ia herevalaia. Ita daradara lasi, lagani ta ta ai Memorial idia lao taudia momo be Awake! idia duahia hanaihanai taudia. To, bema ta ia ura Iehova ena “badu dinana” dekenai Iehova ese ia hunia, vadaeni eda buka ia duahidia hanaihanai sibona be hegeregere lasi.—Sep. 2:3; Apok. 14:6, 7.
5 Unai dainai, January 2006 amo, Awake! be Dirava ena Basileia do ia herevalaia momo. Unai magasin ese duahiduahi taudia do ia hagoadaia edia hekwakwanai hamaoromaoroa daladia be Baibel dekenai idia tahua totona, bona hari idia vara gaudia edia anina be Baibel amo do ia herevalaia namonamo. Unai dala amo, duahiduahi taudia be hari idia vara gaudia edia anina do idia lalopararalaia namonamo, bona reana idia duahia gaudia dainai idia ura Iehova idia dibaia noho.—Sek. 8:23.
6 Awake! lalonai be hereva idauidau do idia hahedinaraia noho. To, ia ese Baibel do ia herevalaia momo. (1 Tes. 2:13) Gima Kohorona lalonai be Baibel ena hereva dobudia idia noho, bona Awake! lalonai be Baibel ena hereva badadia haida do ia herevalaia momo dainai, toana be hua tamona ena Awake! rua idia halasia noho be anina lasi. Unai dainai, January 2006 murinai, Awake! tamona be hua ta ta lalonai do idia halasia. Unai amo iseda buka hegaegaelaia, hahanaia, bona siaia bona abia gaukarana be do ia haraga sisina.
7 Awake! idia hahanaia gadodia 40 pesen dekenai danu be unai bamona do ai haidaua. Gado ma haida dekenai, Awake! tamona be hua ta ta ai eiava lagani tamona lalonai nega foa do idia halasia noho. Kirap! magasin danu be lagani tamona lalonai nega foa do idia halasia noho. Gima Kohorona magasin dekenai be gau ta do ai haidaua lasi.
8 Inai magasin ena ladana The Golden Age, Consolation, bona hari Awake! ena kopi ginigunana be lagani 1919 ai idia halasia neganai, ia be haroro gaukara dekenai anina namona ia havaraia noho. Ai guriguri Iehova ese Awake!, hua tamona gauna, hariharilaia karana do Ia hanamoa noho, unai ese “bese idauidau, iduhu idauidau, kopina idauidau, bona gado idauidau” taudia momo do ia durua Dirava ena Basileia sibona dekenai idia tabekau totona.—Apok. 7:9.
[Study Questions]
1. Matamanai Gima Kohorona be daidia totona idia karaia, bona The Golden Age be daidia totona idia karaia?
2. Hari The Golden Age ena ladana be dahaka, bona dahaka dainai idia karaia?
3. Awake! be tulu mai siahuna edena peroveta herevana hagugurua karana dekenai?
4. (a) Bema ta ia ura Iehova ena “badu dinana” dekenai Iehova ese ia hunia, vadaeni dahaka ia karaia be namo? (b) Apokalupo 14:6, 7 hegeregerena, “guba ena ataiai ia roho lao” aneruna ese taunimanima ibounai ia hadibaia dahaka idia karaia totona?
5. (a) January 2006 amo, Awake! be dahaka do ia herevalaia momo? (b) Momo do idia ura dahaka idia karaia be namo, bona edena peroveta herevana do idia hagugurua?
6, 7. (a) Edena bamona Awake! ese momo do ia durua 1 Tesalonika 2:13 ena hereva idia badinaia totona? (b) Edena dala ai Awake! magasin do idia halasia, bona gado hida dekenai be unai bamona do idia haidaua?
8. Awake! be dahaka do ia karaia noho?