Umui Durua Heheni Noho
1 Aposetolo Paulo ia gaukara goadagoada iena Keristani tadikaka ia durudia totona. (Kara 14:19-21) Unai hegeregerena, iseda tadikaka be metau idia davaria neganai, ita ura idia ita durua. Baibel ia hahedinaraia, elda taudia sibona lasi, to ita ibounai ese ma haida ita lalodia be namo. (Roma 15:1, 2) Inai lalokau sisibana, “umui ta ta dekenai goada do umui henia, bona durua do umui henia” ita badinaia daladia rua mani ita itaia.—1 Tes. 5:11.
2 Ma Haida Edia Dabu Gaudia Laloa: Baibel ia gwau, Doreka be “kara namona bona bogahisihisi kara dekenai ia goada.” (Kara 9:36, 39) Doreka ese ogogami taudia ia lalodia bona ia durudia. Ita dekenai haheitalai namona ia hahedinaraia! Reana oi kamonai, buruka ta be motuka amo hebou dekenai idia abia lao be namo. Eiava painia ta be bamoa tauna lasi ia ida unai wiki ena adorahi ai idia gaukara hebou totona. Bema oi diba ta be unai bamona, bona heduru oi henia, oi durua tauna be do ia moale bada!
3 Lauma Gaudia Herevalaia: Iseda hereva amo ma haida ita hagoadaia diba. (Efe. 4:29) Lagani momo elda gaukara ia karaia tadikaka ta, ia gwau: “Bema oi ura haida oi hagoadaia, lauma gaudia oi herevalaia. Unai bamona herevahereva oi hamatamaia totona, reana oi henanadai diba, ‘Edena dala ai hereva momokani oi dibaia?’ ” Namona be oi hahedinaraia emu kongrigeisen lalonai idia noho matamata taudia oi laloa bada. Idia lalomanoka bona idia hemarai taudia oi hereva henia. (Aon. 12:25) Namo lasi tadikaka ida tanobada ena moale karadia idauidau umui herevalaia dainai, lauma gaudia umui herevalaia lasi.—Roma 1:11, 12.
4 Ma haida oi hagoadaia totona dahaka oi gwauraia diba? Vanegai emu Baibel duahiduahi bona stadi amo, Iehova dekenai emu lalokau ia habadaia hakaua herevana ta oi davaria, a? Pablik tok eiava Gima Kohorona stadi lalonai oi kamonai herevana ta ese emu lalona ia hamarerea, a? Eiava ekspiriens namona ta ese emu abidadama ia hagoadaia, a? Bema unai lauma gaudia oi lalodiatao, hanaihanai ma haida ida oi kiki neganai, hagoadaia gaudia do oi herevalaia.—Aon. 2:1; Luka 6:45.
5 Ma haida ita durua bona iseda malana ita gaukaralaia namonamo neganai, do ita hagoadaia heheni.—Aon. 12:18.