Distrik Hebouhebou—Mai Moale ida Iehova Tomadiho Henia Negana
1 Iosepa, Maria, edia natudia, bona ma haida be hanaihanai Ierusalema dekenai idia lao, lagani ta ta ai idia karaia aria idauidau totona. Unai negadiai, idia bona ma haida be dina ta ta ai idia karaia gaudia idia laloa bada lasi, to Iehova tomadiho henia karana idia laloa bada. Unai aria dekenai idia ese Iehova ena kara namodia bona ena taravatu idia laloa bona herevalaia. Hari lagani ena distrik hebouhebou danu be nega namona, mai moale ida Iehova ita tomadiho henia totona.
2 Hegaegae be mai Anina Bada: Iesu ena ruma bese be Nasareta amo Ierusalema dekenai idia lao bona giroa lou ena lata be 200 kilomita. Ena be ita diba lasi Iesu ena tadina be hida, to Iosepa bona Maria idia hegaegae be mai anina bada. Oi be edena dala ai oi hegaegae dina toi ena distrik hebouhebou oi lao henia totona? Reana emu moni gaukara amo oi holide, eiava emu bosi o emu natuna ena tisa oi hadibaia. Edeseniai do umui mahuta ena palani umui karaia vadaeni, a? Emu kongrigeisen ai ma ta oi durua diba hebouhebou dekenai oi abia lao totona, a?—1 Ioa. 3:17, 18.
3 Ta Ta Ita Hagoadaia: Aria negadiai, Iuda taudia be edia tadikaka bona taihu idia bamoa bona ta ta idia hagoadaia. Reana Iesu ena ruma bese idia moale, badina nega daudau idia itaia lasi turadia ida idia hebou lou. Danu, idia moale badina Iuda taudia huanai turana matamatadia bona Iuda tomadiho idia badinaia taudia idia davaria—idia haida be Ierusalema ai idia noho o ma haida be unuseniai idia loaloa.
4 Hesiai tauna mai ena kamonai bona mai ena kara maoromaoro ese distrik hebouhebou idia hegaegaelaia ena badina ta be, tok ita kamonai sibona lasi, to ta ta ita hagoadaia totona. (Heb. 10:24, 25) Unai dainai, palani oi karaia dina ta ta ai hebouhebou gabuna dekenai oi ginidae haraga bona ma haida bamoa karana oi moalelaia totona. Badina seamani ese hamatamaia miusiki do ia gwauraia neganai, unai ese ita do ia hadibaia eda helai gabunai ita helai totona. Tadikaka ese ita idia hagoadaia dina tubua ena aniani ita abia lao totona, unai amo hebouhebou gabunai idia noho taudia ida ita hedavari bona ita herevahereva totona. Unai dainai, namo lasi hebouhebou gabuna oi rakatania bona sitoa dekenai oi lao aniani oi hoia totona. Iehova ese iseda tadikaka taihu be harihari gaudia bamona ia henia, unai dainai idia ita bamoa karana ita laloa maragi lasi.—Mika 2:12
5 Iehova Dibaia Negana: Iesu be ia maragi negana amo, aria ibounai ia lao henia, unai amo ena guba Tamana ia dibaia. (Luka 2:41-49) Dahaka ese ita bona eda ruma bese do ia durua hebouhebou ena tok amo namo ita abia totona? Tadikaka ese tok idia henia neganai, oi raka loaloa kava lasi to oi helai namonamo bona oi herevahereva kava lasi. Oi naria namonamo—emu mobael telefon o unai bamona gaudia amo haida edia kamonai karana oi hadikaia garina. Tok ia henia tadikaka oi itaia, bona nouti haida oi torea. Emu ruma bese ida gabu tamona ai umui helai hebou, bona umui itaia emui natudia idia kamonai. Hanuaboi ai, nega umui atoa tok ai umui moalelaia point umui herevalaia hebou totona.
6 Dabua Bona Tauanina Ena Toana: Iesu ena ruma bese o Iuda taudia edia dabua ena kona dekenai herahera gaudia idia atoa bona varo bulu be unai herahera ataiai idia turia. Unai dainai, idau tano amo idia raka mai bisinesi taudia be Iuda taudia edia toana idia diba. (Num. 15:37-41) Ena be ita be spesel dabua ta ita karaia lasi, to mai manau bona hemataurai ida dabua namodia ita atoa dainai, taunimanima idia diba ita be Iehova ena Witnes taudia. Hebouhebou gabuna ita lao o giroa neganai, o hebouhebou gabunai ita noho neganai, o dina ta ta ai hebouhebou idia ore bona ita loaloa negadiai, namona be iseda tauanina bona dabua edia toana idia namo. Herevana program murinai dabua ita senisia, to mai manau bona hemataurai ida dabua namodia ita atoa bona eda hebouhebou ena lapel kadi ita atoa. Unai dala amo do ita hahedinaraia ita be Witnes lasi taudia amo ita idau, bona ita idia itaia taudia ese ita do idia matauraia.
7 Volantia Gaukara Ita Durua be Namo: Hebouhebou ia heau namonamo totona, momo ese volantia gaukara idia karaia be namo. Oi ura volantia gaukara oi karaia, a? (Sal. 110:3) Hebouhebou dekenai ita karaia gaukaradia be hesiai gaukara helagadia, bona unai ese Dirava ena ladana idia abia isi. Hebouhebou gabuna ena biaguna ta be volantia taudia ese gabu idia hagoevaia karana ia itaia neganai, ia gwau: “Iniseniai umui karaia hebou namona dainai, lau ura umui lau tanikiu henia. Nega momo lau kamonai, Iehova ena Witnes taudia be idau momokani, badina nega momo edia hebouhebou gabuna idia rakatania neganai gabu ia goeva momokani—guna bamona lasi. Umui bona emui orea ese inai gabu umui hagoevaia namo herea ma haida ese idia gaukaralaia totona, bona emui grup taudia edia kara be namo herea momokani, ai dibaia taudia ma haida umui hereaia.”
8 Nega Namona Ita Haroro Totona: Hebouhebou gabunai, Witnes lasi taudia momo ese iseda dabua bona tauanina ena toana namona bona lapel kadi do idia itaia neganai do idia henanadai—unai be nega namona hebouhebou ita herevalaia totona. Ena mauri lagani 4 merona ta be aniani gabuna ta dekenai ia lao neganai, hebouhebou ai idia halasia buka matamata ia abia lao danu. Ia ese unuseniai ia gaukara hahine ta dekenai ia hahedinaraia. Unai ese dala ia kehoa dainai, iena tama sina ese unai hahine be hebouhebou dekenai idia boiria mai.
9 Aria negadia be moale negadia dainai, idia ura Iehova idia dibaia Iuda taudia idia ura bada unai aria dekenai idia lao. (Deu. 16:15) Iesu ena ruma bese be mai moale ida gau momo idia rakatania, unai aria dekenai idia lao bona namo idia abia totona. Ita ese distrik hebouhebou ita laloa bada danu be namo, bona ita gwau diba unai be iseda lalokau guba Tamana ena harihari gauna. (Iam. 1:17) Mai moale ida Iehova tomadiho henia negana ia kahirakahira dainai, hari be nega namona ita hegaegae totona!
[Study Questions]
1. Edena dala ai Israela taudia edia aria negadia be iseda distrik hebouhebou negadia bamona?
2. Edena dala ai ita hegaegae distrik hebouhebou ita lao henia totona?
3. Edena dala ai Israela ena aria negadia be nega namona ma haida idia hagoadaia totona?
4. Edena dala ai ita hahedinaraia ita be tadikaka taihu bamoa karana ita laloa bada?
5. Dahaka ese ita do ia durua program ita moalelaia totona?
6. Dabua bona tauanina ena toana dekenai, dahaka ita laloatao be namo?
7. Dahaka dainai hebouhebou dekenai volantia gaukarana ita karaia be namo?
8. Edena dala ai hebouhebou gabunai ita haroro diba?
9. Iesu ena ruma bese ese Iehova ena aria idia moalelaia hegeregerena, edena dala ai idia ita tohotohoa diba?