Hemataurai Karana amo Keriso Badinaia
1 Baibel ese Guba bona Tanobada edia Lohia Badana Iehova, ia gwauraia hemataurai bada Diravana. (Sal. 104:1, NW ) Iesu be hanaihanai ena kara bona hereva amo ena Tamana ia matauraia bona Tamana ena dala ia badinaia. (Ioa. 17:4) “Keriso Badinaia!” Distrik Hebouhebou be nega namona Iesu ita tohotohoa bona Iehova ita hanamoa totona.
2 Tomadiho Lalonai Hemataurai Hahedinaraia: Iehova ese ita totona ia hegaegaelaia lauma aria badana dekenai ita lao karana ese ia hahedinaraia ita be Ia ita matauraia. Hebouhebou be Friday ai ia matamaia dainai, emu gaukara biaguna oi hadibaia unai nega ai do oi gaukara lasi totona, a? Palani oi karaia vadaeni, unai amo ane bona guriguri idia do hamatamaia lasi neganai oi ginidae bona emu helai gabuna oi abia, a? Palani oi karaia vadaeni, dahaka aniani do oi abia lao, unai amo tadikaka bona taihu ida umui hebamo totona, a? Bema seamani ese hebou ia hamatamaia totona ita ia noia eda helai gabudia ita abia, namona be eda herevahereva karana ita hadokoa bona karaharaga eda helai gabudia dekenai ita giroa lou.
3 Iseda kamonai namonamo karana ese ia hahedinaraia ita be iseda guba Tamana Iehova ita matauraia. Iseda hebouhebou ta dekenai ia lao nius torea tauna ta ia gwau: “Hebouhebou dekenai idia lao taudia be mai hemataurai ida hereva idia kamonai namonamo bona edia haheitalai namona be ma haida ese idia itaia neganai do idia moale.” Bona ma ia gwau, “natudia momo be . . . , idia kamonai namonamo bona edia Buka Helaga idia kehoa bona siri idia itaia danu.” Hebouhebou ena program ia heau noho lalonai, namona be ita herevahereva lasi, mobael amo hereva ita siaia lasi, ita aniani lasi, eiava ita raka loaloa lasi. Namona be natudia be edia tama sina ida idia helai hebou, unai amo edia tama sina ese edia natudia do idia durua program amo namo idia abia totona. (Deu. 31:12; Aon. 29:15) Unai bamona idia karaia neganai, idia hahedinaraia idia be ma haida idia matauraia bona hebouhebou dekenai idia halasia lauma aniani idia laloa bada.
4 Hemataurai Toana: Momo be lagani 2006 ena distrik hebouhebou ena tok ladana, “Hemataurai Hahedinaraia Nega Ibounai” ai idia kamonai hadibaia herevadia idia laloa bada. Unai tok ese ia hahedinaraia, namona be Dirava ena hesiai taudia idia hekwarahi edia dabua bona toana amo hemataurai karana idia hahedinaraia. Inai lagani ai unai bamona ita karaia danu be namo. Iseda toana amo ita hahedinaraia Iehova ita lalokau henia bona Ia ese ita be iena Witnes taudia ai ia halaoa hahenamona ita laloa bada. Namona be nega ibounai iseda toana bona iseda dabua be “Dirava idia matauraia” taudia edia bamona.—1 Tim. 2:9, 10.
5 Hebouhebou sibona dekenai hemataurai karana ita hahedinaraia, a? Namona be ita laloatao, unai dina toi lalonai hebouhebou gabuna dekenai ita lao bona hebouhebou gabuna ita rakatania neganai, momo be iseda lapel kadi do idia itaia. Iseda toana be taunimanima ma haida amo ia idau be namo. Unai dainai, hebouhebou murinai ita laga-ani neganai, namona be iseda toana bona eda dabua be Keristani hebouhebou dekenai idia lao taudia edia dabua bona toana bamona. Ita laga-ani negadiai ita karaia dabua idia goeva be namo. Unai amo taunimanima vairanai Iehova do ita hanamoa! Bema iseda toana amo ita hahedinaraia ita be Iehova ena hesiai taudia, unai ese Iehova ia hamoalea bada.
6 Anina Namona Ia Havaraia: Iseda hebouhebou ai hemataurai karana ita hahedinaraia neganai, unai ese dala ia kehoa ma haida ita haroro henia bona ita idia itaia taudia be ita do idia hanamoa. Hebouhebou ta ia ore murinai, tau ta ia gwau: “Ai ese inai bamona kara namo taudia be guna ai itaia lasi. Umui be Dirava ia ura ita kara dalana ai umui kara.” Hemataurai karana ita hahedinaraia neganai, ita ta ta dekenai lalokau ita hahedinaraia bona Iehova ita hanamoa diba. (1 Pet. 2:12) Danu, unai ese ia hahedinaraia ita be Dirava ita gari henia bona iseda Tamana Iehova ese ita ia hadibaia karana ena hahenamo ita laloa bada. (Heb. 12:28) Inai lagani ena “Keriso Badinaia!” Distrik Hebouhebou ia mai noho dainai, namona be hemataurai karadia ita hahedinaraia.
[Study Questions]
1. Edena dala ai hebouhebou ena sinado ese ita ia durua hemataurai karana ita hahedinaraia totona?
2. Edena dala ai iseda hegaegae karana amo ita hahedinaraia Iehova ita matauraia?
3. Edena dala ai iseda kamonai namonamo karana amo ita hahedinaraia iseda tomadiho ita matauraia?
4. Dahaka dainai hebouhebou lalonai hemataurai toana ita hahedinaraia be namo?
5. Laga-ani negadiai edena dala ai hemataurai karadia ita hahedinaraia noho diba?
6. Hemataurai karana ita hahedinaraia neganai, dahaka anina namona ia vara diba?
[Box on page 6]
Distrik Hebouhebou Hadibaia Herevadia
◼ Nega: Dina toi lalonai program be 9:superscription0 a.m. ai do ia matamaia. Miusiki ia matamaia neganai, ita ibounai be iseda helai gabuna dekenai ita helai vadaeni, unai amo program ia matamaia namonamo diba. Friday program be 4:superscription5 p.m. ai do ia ore, Saturday be 4:20 p.m. ai do ia ore, bona Sunday be 3:45 p.m. ai do ia ore.
◼ Motuka Atoa Gabuna: Hebouhebou gabudia dekenai motuka atoa gabudia idia noho, davana be lasi. Namona be motuka taria tadikaka ese hebouhebou ena lapel kadi idia atoa, motuka atoa gabuna idia abia totona. Motuka atoa gabudia haida be maragi dainai, mani emui kara atendan taudia edia hereva umui kamonai.
◼ Helai Gaudia: Oi ida motuka tamona ai umui guia taudia eiava ruma tamona ai umui noho taudia edia namba hegeregerena sibona, helai gaudia umui makaia be namo.
◼ Dina Tubua Aniani: Mani emu kara, emu dina tubu ena aniani oi abia lao, namo lasi laga-ani negana lalonai hebouhebou gabuna oi rakatania, sitoa ai aniani oi hoia totona. Helai gauna henunai oi atoa diba eski oi gaukaralaia. Hebouhebou gabuna dekenai, pikiniki ai ita gaukaralaia eski badadia, galasi gaudia, bona kekero muramura be taravatu.
◼ Kontribusen: Distrik hebouhebou hegaegaelaia totona, moni bada idia negea. Iseda tanikiu karana ita hahedinaraia diba bema Kingdom Hall eiava hebouhebou gabuna ai, Tanobada Ibounai Gaukarana ena kontribusen ita henia. Hebouhebou gabuna dekenai idia henia seke be “International Bible Students Association” eiava “IBSA” dekenai idia siaia be namo.
◼ Aksiden: Bema hebouhebou gabunai ta ia gorere dikadika eiava gau ta ese ia utua, mani atendan tauna ta oi hadibaia haraga, bena ia be Medikol Heduru Dipatmen do ia hadibaia, unai amo unai dipatmen idia naria taudia ese idia sekea diba bona heduru do idia henia. Bema ia dika momokani, vadaeni unai dipatmen be ambalans do idia ringi henia.
◼ Rekodia: Rekodi gaudia be Assembly Hall ena paua eiava saun gabudia dekenai umui gwadaia kau lasi, bona ma haida edia kamonai karana ia hadikaia lasi dalanai umui gaukaralaia be namo.
◼ Noho Gabudia: (1) Bema mahuta gabudia oi ura oi abia, emu kongrigeisen be Ruma Dipatmen amo fom ia abia neganai, karaharaga seketere oi hadibaia. (2) Daiutu momo oi noia kava lasi, to do idia noho taudia edia namba hegeregerena sibona oi noia, bona daiutu ai do idia noho taudia sibona be emui daiutu dekenai idia noho be namo. (3) Bema emu noho gabuna oi haidaua, Ruma Dipatmen oi hadibaia haraga be namo. (4) Aniani idia nadua lasi daiutu lalonai aniani umui nadua lasi. (5) Bema tadikaka edia ruma ai oi noho, edia heabidae karana oi matauraia, anina be oi abia hidi dinadia hegeregerena oi noho be namo. Aniani ena davana, nanadu bona ruma gaukara haida dekenai ruma tauna oi durua be namo. (6) Hebouhebou gabuna dekenai emu noho gabuna idia henia bona oi noho ela bona emu noho gabuna oi rakatania negadiai, Keristani kara namodia oi hahedinaraia be namo.