Natudia Durua Haroro Dekenai Idia Goada Idia Lao Totona
1 Keristani tama sina be mai edia maduna badana edia natudia idia do maragi neganai, idia dekenai haroro dalana idia hadibaia totona. Dala idauidau ai unai idia karaia diba. Ena be natudia haida be duahiduahi karana idia do diba matamaia lasi, to Baibel siri ta be sibona edia lalohadai amo idia gwauraia diba. Unai ese kamonai taudia edia lalona ia hamarerea diba. Maragidia idia tubu neganai, haroro gaukara idia habadaia diba. Umui tama sina e, edena dala ai emu natudia umui durudia diba haroro gaukara idia karaia totona? Reana henunai idia torea herevana ese umui do ia durua.
2 Hanamoa herevana oi gwauraia murinai, reana oi gwau:
◼ “Lauegu natuna mero, [ena ladana], ia ura oi dekenai inai mai anina bada sirina ia duahia.” Bena emu natuna do ia gwau: “Salamo lalonai ia noho siri ta ese lau dekenai Dirava ena ladana ia hadibaia. [Natuna ese Salamo 83:18 ia duahia eiava ia gwauraia.] Inai magasin be Iehova Dirava ese ita totona do ia karaia gauna ia herevalaia. Ia namo oi ida lau rakatania?” Bena dokonai, tama eiava sina ese tanobada ibounai gaukarana ita durua dalana ia herevalaia.
3 Eiava oi gwau diba:
◼ “Namo. Lau be egu natuna kekeni, [ena ladana], lau hadibaia noho, iseda komiuniti ai idia noho taudia ia laloa bada totona. Ia ura oi dekenai Baibel siri ta ia duahia.” Bena natuna do ia gwau: “Lau ura taunimanima lau durua dalana ta be, idia dekenai Baibel ena helaro nega vaira totona lau gwauraia. [Natuna ese Apokalupo 21:4 ia duahia eiava ia gwauraia.] Inai magasin ese Dirava ena Basileia be ita totona do ia karaia gaudia ia herevalaia. Lau laloa inai magasin ena hereva do oi moalelaia.”
4 Hanaihanai auka lasi hamatamaia herevadia gaukaralaia karana ese natudia do ia durua, mai gari lasi ida Basileia ena sivarai idia harorolaia totona. Nega oi atoa idia oi hadibaia loulou idia hereva namonamo totona bona edia gado regena ena bada ia hegeregere be namo. Maragidia danu ita hegaegae namonamo guna bona mai momokani ida idia ita hanamoa karana ese do ia durudia edia abidadama idia gwauraia hedinarai totona.
5 Unai bamona hagoadaia herevadia dainai, matamata momo be bapatiso lasi pablisa ai idia lao. Ita itaia iseda natudia ese Keristani haroro gaukara idia goadalaia neganai, ita moale!—Sal. 148:12, 13.