Emui Natudia Umui Hadibaia Iehova Idia Hanamoa Totona
1 Salamo 148:12, 13 be memero bona kekeni ia hagoadaia, “[Iehova] ena ladana do idia hanamoa bada!” Unai bamona memero bona kekeni edia sivarai be Baibel dekenai idia noho. Hegeregere, “mero Samuela ese Lohiabada ena hesiai gaukara ia karaia.” (1 Sam. 2:18) Israela “kekeni maragina ta” be Namana ena adavana ia hamaoroa, Iehova ena peroveta tauna be Namana ena lepera gorere ia kokia diba. (2 Kin. 5:1-3) Iesu be dubu helaga lalonai hoa karadia ia karaia neganai, “memero bona kekeni” be idia boiboi: “ ‘Hosana, Davida ena natuna ita hanamoa!’ ” (Mat. 21:15) Edena dala ai tama sina be edia natudia idia hadibaia diba Iehova idia hanamoa totona?
2 Kara: Israela ai, tama ese Iehova idia lalokau henia bona edia kudouna ibounai ida Iehova ena taravatu idia badinaia guna be namo, bena gabeai, edia natudia dekenai hereva momokani idia hadibaia diba. (Deu. 6:5-9) Bema oi danu be haroro gaukara ena namo oi kikilaia bona pura ta ta ai unai gaukara oi karaia, emu natudia be haroro gaukara do idia laloa bada bona moalelaia danu.
3 Taihu ta ia gwau: “Lau tubu daekau lalonai, lau bona egu ruma bese taudia be Saturday bona Sunday iboudiai ai haroro. Lau itaia diba, egu tama sina be haroro gaukara idia moalelaia bada. Unai dainai lau bada neganai, haroro gaukara lau moalelaia bada danu.” Unai taihu ena mauri lagani be 7 neganai, ia be bapatiso lasi pablisa ai ia lao, bona lagani 32 mai kahana lalonai ful-taim hesiai gaukara ia karaia.
4 Hadibaia Noho: Haroro gaukara ai emui natudia umui durua. Reana iduara ai idia pidipidi diba, ruma tauna dekenai pepapepa ta idia henia, eiava Baibel ena siri idia duahia. Unai amo edia moale do ia bada, bona Basileia harorolaia gaukarana dekenai do idia manada. Idia bada neganai, edia haroro gaukara idia habadaia be namo. Unai dainai, idia umui hadibaia noho, bona edia hesiai gaukara do idia habadaia daladia umui laloa.
5 Bema oi itaia emu natuna ia hegeregere bapatiso lasi pablisa ai ia lao bona ia danu ia ura, vadaeni maoromaoro elda taudia oi hadibaia. Badina natuna be pablisa ai ia lao neganai, do ia laloparara ia sibona ese Iehova ia hanamoa be namo. Laloatao, bema natuna ena diba be hegeregere, vadaeni bapatiso lasi pablisa ai ia lao diba—idia bapatiso lo taudia idia diba gaudia ibounai ia diba guna be namo lasi. To emu natuna be Baibel ena hahediba herevadia, auka lasi herevadia unai, ia lalopararalaia, a? Baibel ena taravatu ia badinaia, a? Ia ura haroro gaukara ia karaia bona ia ura Iehova ena Witnes tauna ta ai ia lao, a? Bema oibe, vadaeni elda taudia ese do idia hereva henia eiava do idia itaia ia be bapatiso lasi pablisa ai ia lao diba eiava lasi.—Iehova Ena Ura Ia Karaia Orea bukana ena rau 79-81 itaia.
6 Natuna oi hadibaia mai kudouna ibounai ida Iehova ia hanamoa totona be mai ena hekwarahi. To, tama sina idia moale bada bema edia natudia be Iehova idia hesiai henia noho. Danu, Iehova ia moale bema natudia be Iena kara badadia idia harorolaia.
[Study Questions]
1. Memero kekeni ese Iehova idia hanamoa diba, a?
2. Dahaka dainai tama sina edia kara be mai anina bada edia natudia dekenai?
3. Tama sina edia kara ese edena dala ai taihu ta ia durua?
4. Edena dala ai tama sina ese edia natudia idia hadibaia noho?
5. Edena dala ai natuna ta be bapatiso lasi pablisa ai ia lao diba?
6. Dahaka dainai tama sina ese edia natudia idia hadibaia be mai anina bada?