Iehova Ena Hairai Gwauraia Hedinarai
1 Salamo torea tauna ia gwau: “Tanobada dekenai noho taudia ibounai e, Lohiabada dekenai ane do umui abia. . . . Lohiabada ena hairaina be bese idauidau ibounai dekenai, do umui gwauraia hedinarai. Iena kara badadia be idia ibounai dekenai do umui hadibaia.” Iehova ese ia karaia vadaeni gaudia, ia karaia noho gaudia, bona gabeai do ia karaia gaudia ita laloa dobu neganai, iseda kudouna ese ita ia veria ena hairai ita gwauraia hedinarai totona!—Sal. 96:1, 3.
2 Iseda Haroro Gaukara Lalonai: Iehova ena Witnes taudia be Dirava ena ladana idia abia, bona unai ladana be tanobada ibounai dekenai idia gwauraia be hahenamo ta. (Mal. 1:11) To Kerisendom ena dubu gunalaia taudia edia kara be idau, Dirava ena ladana be edia Baibel amo idia kokia! Dirava ena ladana be taunimanima dekenai ita hadibaia be gau badana, badina mai abidadama ida unai ladana idia boiboi henia taudia be kahirakahira do ia vara hisihisi badana amo do idia roho mauri. (Roma 10:13-15) Danu, Dirava ena ladana hahelagaia karana ese tanobada ai, guba ai, bona taunimanima huanai maino do ia havaraia. Dirava ena gaukara ibounai be ena ladana dainai do idia vara momokani.
3 “Lohiabada be mai ena ladana badana, inai ladana badana do ita abia isi noho be namo.” To taunimanima ese ‘Lohiabada ena ladana badana idia abia isi’ totona, iena kara momokani idia diba be namo. (Sal. 96:4, 8) To, haida idia gwau Dirava ia noho lasi. (Sal. 14:1) Haida idia gwau ia be siahu lasi eiava taunimanima dekenai idia vara gaudia ia laloa bada lasi. Iehova ita hanamoa dalana be, kudou maoro taudia ita durua iseda Havaraia Tauna, ena ura, bona ena kara dekenai diba maoromaoro idia abia totona.
4 Iseda Kara Amo: Dirava ena taravatu ita badinaia karana amo ia ita hanamoa. Iseda kara namo be taunimanima ese do idia itaia. (1 Pet. 2:12) Hegeregere, iseda dabua ena toana namona dainai haida ese ita do idia hanamoa, bona unai ese dala ia kehoa Baibel ena hakaua herevadia ita badinaia ena namo idauidau ita herevalaia. (1 Tim. 2:9, 10) Haida ese ‘iseda kara namodia idia itaia bona iseda guba Tamana idia hanamoa’ neganai, ita moale bada!—Mat. 5:16.
5 Namona be dina ta ta ai iseda hereva bona kara amo, iseda hairai Diravana ita hanamoa. Unai dainai ‘Lohiabada dekenai ane do ita abia. Iena ladana do ita abia isi! Ia ese ita ia hamauria vadaeni! Dina ibounai lalonai inai sivarai namona, be taunimanima dekenai do ita gwauraia.’—Sal. 96:2.