‘Lauegu Murinai Do Umui Mai’
1 Nega momo taunimanima idia ura sibodia idia hamoalea, to idia moale lasi. Iesu ia hahedinaraia moale korikori ita davaria totona, namona be sibona eda ura ita dadaraia bona ma haida ita durua. (Kara 20:35) Ia gwau: “Bema tau ta ia ura lauegu murinai ia raka, ia sibona kopina ena namo do ia laloa lasi, . . . bona lauegu murinai do ia mai.” (Mareko 8:34) Unai ena anina be dina ta ta ai sibona eda ura do ita tahua lasi, to nega ibounai Iehova ena ura ita karaia.—Roma 14:8; 15:3.
2 Aposetolo Paulo ena haheitalai mani ita laloa. Ia ura ‘Keriso ia diba momokani’ dainai, sibona ena ura gaudia ia dadaraia bona Basileia gaukara ia karaia goadagoada. (Fili. 3:7, 8) Ma ia gwau, “lau be mai moale danu egu kohu do lau haorea,” ma haida lau durua totona. (2 Kor. 12:15) Unai dainai, namona be sibona ita nanadaia: ‘Egu nega, goada, diba bona kohu be edena bamona lau gaukaralaia? Lau be sibona egu ura lau tahua momo, eiava dala lau tahua Iehova hamoalea karadia lau karaia totona, a?’
3 Dala Idauidau ai Heduru Ita Henia: Lagani ta ta ai, Dirava ena hesiai taudia be hora bilioni momo lalonai, Basileia ena sivarai namona be taunimanima momo dekenai idia harorolaia. Kongrigeisen lalonai, matamata bona buruka taudia ese gaukara idauidau idia karaia ma haida idia durua totona. Danu, tadikaka ese sekit bona distrik hebouhebou ena gaukara idauidau bona tomadiho rumadia hanamoa bona haginia gaukarana dekenai heduru idia henia. Bona Hospital Liesen Komiti dekenai idia gaukara tadikaka ese mai lalokau ida ma haida idia durua. Dala idauidau ai tadikaka ese sibodia edia ura idia dadaraia bona ma haida idia durua dainai, unai be hahenamo badana eda Keristani tadikaka oreana dekenai!—Sal. 110:3.
4 Nega dikadia idia vara neganai, unai be nega namona ma haida ita durua totona. To, bema ita itaia eda tadikaka be heduru idia abia be namo, dala ita tahua idia ita durudia bona hagoadaia totona. (Aon. 17:17) Iseda nega bona goada ita gaukaralaia ma haida ita durua bona Basileia gaukara ita karaia goadagoada neganai, ita be Iesu ena haheitalai ita tohotohoa unai. (Fili. 2:5-8) Namona be ita hekwarahi unai bamona ita karaia noho totona.