Iehova Ena Aria Totona Oi Hegaegae Vadaeni, A?
1. Aria totona dahaka gaudia idia hegaegaelaia?
1 Aria ta karaia totona taunimanima be gau momo idia hegaegaelaia. Aniani idia hoia, idia nadua bona taunimanima idia ubua. Taunimanima dekenai aniani do idia henia dalana danu idia hegaegaelaia. Danu, aria idia karaia gabuna idia abia hegaegae. Bema unai aria totona idia boiria taudia be gabu daudau amo do idia mai, vadaeni do idia mai totona idia hegaegae danu be namo. Ena be unai aria totona idia hekwarahi bada, to ruma bese, varavara bona turadia ida unai aniani namona idia ania hebou neganai, idia moale bada. Kahirakahira, tanobada hegegemadai Iehova ena Witnes taudia hutuma be “Gima Noho!” Distrik Hebouhebou dekenai do idia lao. Hebouhebou dekenai do idia henia tok idauidau, inteviu, haheitalai bona drama idia hegaegaelaia vadaeni. Ita ibounai idia boiria unai aria dekenai ita lao totona. Hebouhebou dekenai ita lao bona goada ita abia totona, namona be ita ta ta ita hegaegae danu.—Aon. 21:5.
2. Iseda aria ena dina ta ta dekenai ita lao totona, dahaka ita karaia be namo?
2 Oi Hegaegae Dalana: Oi hegaegae vadaeni unai aria ena dina ta ta dekenai oi lao totona, a? Namona be emu moni gaukara ena bosi oi hadibaia oi be hebouhebou ena dina toi dekenai do oi lao. Hebouhebou oi lao totona emu lao dalana bona noho gabuna oi hegaegaelaia vadaeni, a? Elda taudia ese buruka, gorere bona heduru idia ura taudia ma haida totona, hebouhebou dekenai idia lao dalana idia hegaegaelaia be namo.—Ier. 23:4; Gal. 6:10.
3. Dahaka ese ita do ia durua dina ta ta ena program ita kamonai namonamo totona?
3 Oi hegaegae hebouhebou ena dina toi dekenai oi ginidae haraga bona helai gabuna oi abia totona. Hebouhebou ia do matamaia lasi neganai, miniti haida lalonai idia printaia program oi duahia. Unai amo emu lalona oi hegaegaelaia idia henia hereva namodia oi kamonai namonamo totona. (Esr. 7:10) Seamani ese miusiki do idia hamatamaia ia herevalaia neganai, emu helai gabuna dekenai oi helai bona kehoa anena bona guriguri totona oi hegaegae.
4. Edena dala ai iseda ruma bese taudia be program amo namo idia abia diba?
4 Bema hebouhebou dekenai ruma bese idia helai hebou, tama sina ese natudia do idia durua program idia kamonai henia namonamo totona. (Deu. 31:12) Siri idia gwauraia neganai, ita ibounai ese Baibel ita kehoa be namo. Point badadia sibona oi torea, unai amo hereva do oi kamonai namonamo diba. Gabeai, unai point badadia ese oi do idia durua hebouhebou ena tok oi laloatao totona. Namona be program lalonai ita herevahereva kava lasi eiava loaloa kava lasi. Bema oi be mai emu mobael fon, namo lasi oi bona ma haida edia kamonai karana ia hadikaia. Dina ta ta murinai oi ura henia point badadia be ma haida ida oi kikilaia diba.
5. Hebouhebou dekenai dahaka hahenamo ita abia? Bona edena dala ai unai hahenamo ita moalelaia diba?
5 Distrik hebouhebou ai, ita be tadikaka taihu ida hebamo namona ita moalelaia diba—tanobada taudia be unai bamona lasi. (Sal. 133:1-3; Mar. 10:29, 30) Dina tubua ai oi badinai idia helai taudia oi hedavari henia bona idia ida oi herevahereva be namo. Unai bamona oi karaia diba bema oi ese hebouhebou dekenai aniani sisina oi abia lao, bona sitoa dekenai oi lao lasi aniani bona loliwota oi hoia totona. Namona be dina tubua ai tadikaka taihu ida umui hagoadaia heheni.—Roma 1:11, 12.
6. Hebouhebou dekenai edena bamona dabua do ita hahedokilaia?
6 Dabua: Iehova ese Israela taudia dekenai oda ia henia edia dabua ena kona dekenai herahera gaudia do idia atoa bona varo bulu be unai herahera ataiai do idia turia. (Num. 15:37-41) Unai ese idia ia hadibaia Iehova ese edia bese ia abia hidi Ia idia tomadiho henia totona. Hari, hebouhebou ai ita karaia hemataurai dabua ese ia hahedinaraia ita be tanobada amo ita idau. Hebouhebou dinadia ta ta murinai, sitoa o maketi dekenai ita lao neganai, ita idia itaia taudia dekenai unai be haroro dalana namona. Unai dainai, namona be oi laloa namonamo guna edena dabua do oi hahedokilaia totona.
7. Edena dala ai hebouhebou gabuna kahirakahira idia noho taudia ita haroro henia diba?
7 Ma Haida Ita Haroro Henidia: Ita hegaegae namonamo neganai, hebouhebou gabuna kahirakahira idia noho taudia ita haroro henia diba. Tadikaka ta bona iena adavana be aniani rumana ta dekenai idia lao bona tadikaka ese gaukara tauna ia nanadaia: “Inai bamona lapel kadi idia atoa taudia ma haida oi itaia, a?” Unai gaukara tauna ia gwau: ‘Oibe, haida lau itaia bona lau laloa dahaka dainai unai kadi idia atoa?’ Unai ese dala ia kehoa tadikaka ese unai tauna ia haroro henia bona ia boiria hebouhebou dekenai ia lao totona.
8. Edena dala ai hebouhebou ena aria dekenai ita ia Boiria Tauna, Iehova, ita tanikiu henia diba?
8 Ena be tadikaka ese tok idia henia, inteviu bona haheitalai idia karaia, to iseda guba Tamana, Iehova be mai lalokau ida unai aria ia hegaegaelaia. (Isa. 65:13, 14) Unai dainai, hebouhebou ena aria ena dina ta ta ai ita lao bona aniani namodia ita moalelaia neganai, ita be aria ia karaia Tauna dekenai iseda tanikiu karana ita hahedinaraia unai. Hebouhebou oi lao totona gau ibounai oi hegaegaelaia vadaeni, a?
[Box on page 4]
Distrik Hebouhebou Hadibaia Herevadia
◼ Nega: Dina toi lalonai program be 9:00 a.m. ai do ia matamaia. Namona be miusiki ia matamaia neganai, ita ibounai be iseda helai gabuna dekenai ita helai vadaeni, unai amo program be mai hemataurai ida ita matamaia diba. Friday program be 4:15 p.m. ai do ia ore, Saturday be 4:40 p.m. ai do ia ore, bona Sunday be 3:40 p.m. ai do ia ore.
◼ Motuka Atoa Gabuna: Hebouhebou gabudia dekenai motuka atoa gabudia idia noho, davana be lasi. Namona be motuka idia taria tadikaka ese hebouhebou ena lapel kadi idia atoa, motuka atoa gabuna idia abia totona. Motuka atoa gabudia haida be maragi dainai, mani emui kara atendan taudia edia hereva umui kamonai.
◼ Helai Gabudia: Oi ida motuka tamona ai umui guia taudia eiava ruma tamona ai umui noho taudia edia namba hegeregerena sibona, helai gaudia umui abia be namo.
◼ Dina Tubua Aniani: Mani emu kara, dina tubua ena aniani umui abia lao. Namo lasi hebouhebou gabuna oi rakatania bona sitoa dekenai oi lao aniani oi hoia totona. Helai gauna henunai oi atoa diba eski maragina oi gaukaralaia. Hebouhebou gabuna dekenai, eski badadia bona galasi gaudia be taravatu.
◼ Kontribusen: Iseda tanikiu karana ita hahedinaraia diba bema Kingdom Hall eiava hebouhebou gabuna ai, Tanobada Ibounai Gaukarana ena kontribusen ita henia. Hebouhebou gabuna dekenai idia henia seke be “International Bible Students Association” eiava “IBSA” ena ladana dekenai idia torea diba.
◼ Aksiden: Bema hebouhebou gabunai ta ia gorere dikadika eiava bero ta ia abia, mani atendan tauna ta oi hadibaia haraga. Ia ese Medikol Heduru Dipatmen do ia hadibaia bona unai tadikaka ese gorere tauna idia sekea diba bona heduru do idia henia. Bema ia dika momokani, vadaeni unai tadikaka be ambalans do idia rini henia.
◼ Noho Gabudia: (1) Bema mahuta gabudia oi ura oi abia, emu kongrigeisen be Ruma Dipatmen amo fom ia abia neganai, karaharaga seketere oi hadibaia. (2) Daiutu momo oi noia kava lasi, to do idia noho taudia edia namba hegeregerena sibona oi noia, bona oi gwauraia taudia sibona be emu daiutu dekenai idia noho be namo, momo herea be taravatu. (3) Bema emu noho gabuna oi haidaua, Ruma Dipatmen oi hadibaia haraga be namo. (4) Daiutu lalonai aniani umui nadua lasi. (5) Bema tadikaka edia ruma ai oi noho, edia heabidae karana oi matauraia, bona oi abia hidi dinadia sibona oi noho be namo. Aniani ena davana, nanadu bona ruma gaukara haida dekenai ruma taudia oi durua be namo. (6) Emu noho gabuna idia henia bona oi noho ela bona oi rakatania neganai, namona be Keristani kara namodia oi hahedinaraia.