Henanadai Mauana

◼ Ita diba lasi tauna ta be Internet amo ita hereva henia ena dika be dahaka?

Internet amo taunimanima idia herevahereva bona idia hetura heheni diba. Momo be Internet dekenai edia ladana, adres, laulau bona gau ma haida idia atoa diba. Unai amo taunimanima ma haida be unai taudia idia tore henia diba. Matamata taudia momo dekenai unai kara be ia bada. Bona kongrigeisen lalonai idia noho matamata taudia haida be Internet amo taunimanima ma haida, sibona idia gwauraia Iehova ena Witnes taudia, idia tore henia.

Internet lalonai ita dibaia tauna ese ena kara, ena hetura karana Iehova ida, o ena lalohadai ia gwauraia neganai, ita ia koia diba. (Sal. 26:4) Sibona ia gwauraia Iehova ena Witnes tauna be reana Witnes lasi tauna, orea amo idia atoa siri tauna, eiava aposteit tauna. (Gal. 2:4) Natu maragidia ida matabodaga karadia idia karaia taudia momo be Internet amo natu maragidia idia koia diba.

Ena be ita laloa Internet amo ita hereva henia tauna be kongrigeisen lalonai haheitalai namona, to unai bamona dala amo idia ida ita herevahereva neganai, lalohadai dikadia herevalaia totona be do ia auka lasi. Unai ia vara diba badina Internet amo ta idia hereva henia neganai, edia lalohadai idauidau idia gwauraia totona do idia hemarai lasi. Reana matamata taudia idia laloa unai bamona hehuni dalanai idia herevahereva neganai, ma haida, hegeregere edia tama sina o elda taudia be do idia diba lasi. Madi, Keristani ruma bese lalonai matamata taudia momo be unai bamona kara dainai idia moru bona hereva mirodia gwauraia karana idia manadalaia. (Efe. 5:​3, 4; Kol. 3:8) Ma haida be sibona edia matabodaga laulaudia idia atoa, ladana idauna idia gaukaralaia, o mahuta hebou karadia ia hahedinaraia miusiki laulaudia idia atoa.

Unai dainai, natudia ese kompiuta idia gaukaralaia dalana be tama sina ese idia itaia be namo. (Aon. 29:15) Bona ita diba lasi tauna ta be iseda ruma dekenai ita abia dae o iseda natudia ida ia hebamo neganai, unai ese dika do ia havaraia. Unai hegeregerena, ita eiava iseda natudia be Internet amo ta ita tura henia karana ese dika ia havaraia diba, ena be idia koikoi idia gwau idia be Iehova ena Witnes taudia.​​—Aon. 22:3.