Stadi Gima Kohorona Ena Toana Matamata!
Stadi Gima Kohorona ena toana matamatana be namo herea bona oi do ia durua Iehova ena Hereva momokani oi stadilaia totona.—Sal. 1:2; 119:97.
Lagani foa gunanai, ai ese Gima Kohorona rua ai halasia matamaia. Ta be pablik totona bona ta be stadi gauna, ita—Iehova ena Witnes taudia bona kongrigeisen heboudia dekenai idia mai Baibel stiuden totona.
Lagani momo lalodiai Iehova ia hesiai henia tadikaka ta be stadi magasin ia herevalaia, ia gwau: “Stadi magasin matamatana lau duahia neganai, ia be namo herea bona egu kudouna ia hamarerea. Baibel ena hereva dobudia ia hahedinaraia namonamo bona lau laloparara dainai, lau ura henia. Unai magasin matamatana dainai umui lau tanikiu henia.” Tadikaka ma ta ia gwau: “Hora momo lalonai stadi Gima Kohorona be egu Baibel ida lau stadilaia bona lau moalelaia bada.” Ai diba oi danu be unai bamona oi laloa.
Ita diba nao gado Gima Kohorona be lagani 1879 ai idia halasia matamaia. Bona Iehova ena lauma helaga ese unai gaukara ia hanamoa dainai, unai nega amo ema bona hari ai printaia noho. (Sek. 4:6) Lagani 133 lalodiai, magasin ena vairana kahana be nega momo ai haidaua. Lagani 2012 ena stadi Gima Kohorona ena vairana kahana ai laulau ai atoa. Unai laulau ta ta ese ita do idia durua, Iehova ese ita ia henia Basileia harorolaia gaukarana ita laloa bada totona. (Kara 28:23) Rau 2 ai unai laulau ia hedinarai lou bona hereva kwadogina ese laulau ia herevalaia. Do idia hedinarai laulau idauidau ese ita do idia hadibaia, Iehova ena Witnes taudia be “tanobada ibounai dekenai” sivarai namona idia harorolaia noho.—Mat. 24:14.
Dahaka gau ma haida ai haidaua? Riviu mauana be stadi ta ta ena matamanai ia hedinarai. Unai amo stadi herevana oi hegaegaelaia neganai, oi do ia durua point badadia oi laloatao totona. Vaia, kongrigeisen Gima Kohorona stadi dokonai ita karaia bamona, stadi naria tauna ese riviu maua do ia gaukaralaia. Do oi itaia rau edia saidi kahanai sipeisi be bada bona rau bona paragraf edia namba idia hedinarai namonamo.
Inai magasin ena kahana matamata ta be “Orea Ena Histori.” Unai kahana ese Iehova ena orea lalonai idia vara mai anina bada gaudia do ia herevalaia. Danu, inai hereva kwarana “Mai Ura ida Sibona Idia Henia” henunai, tadikaka taihu edia sivarai do idia hedinarai. Pablisa momo lasi gabudiai idia haroro bona edia ekspiriens namodia do ia hahedinaraia.
Ai ura inai stadi Gima Kohorona be mai moale ida emu Baibel ida oi stadilaia.
Inai Magasin Karaia Taudia
[Picture on page 3]
1879
[Picture on page 3]
1895
[Picture on page 3]
1931
[Picture on page 3]
1950
[Picture on page 3]
1974
[Picture on page 3]
2008