Ruma Bese ida Iehova Tomadiho Henia
1 Baibel negadiai, ruma bese be gau momo idia karaia hebou. Dina ta ta ai gaukara idauidau idia karaia hebou bona Iehova idia tomadiho henia hebou. (Lev. 10:12-14; Deu. 31:12) Hari inai negai, gabu momo ai ruma bese be nega momo idia gaukara hebou lasi. To, Keristani taudia idia laloparara tomadiho karadia lalonai ruma bese ida idia gaukara hebou be mai anina bada. Ruma bese ese Iehova idia tomadiho henia hebou neganai, ruma bese ia Havaraia Tauna ia moale bada!
2 Haroro Hebou: Haroro hebou karana ese ruma bese ia hatamonaia. Unai dainai, haroro gaukara totona tadikaka bona taihu ia bamoa elda ese nega ia atoa danu, ena adavana bona natudia ida ia haroro hebou totona. (1 Tim. 3:4, 5) Ena be loaloa naria taudia idia bisi bada, to nega idia atoa edia adavadia ida idia haroro hebou totona.
3 Tama sina be natudia ida idia gaukara hebou karana amo, edia natudia idia durua haroro taudia namodia ai idia lao totona. Tama sina ese haroro gaukara idia moalelaia neganai, natudia be unai idia itaia diba. Bona danu, Iehova bona ma haida dekenai idia hahedinaraia lalokauna be natudia ese do idia itaia. (Deu. 6:5-7) Ena be natudia idia tubu daekau noho, to tama sina be idia ida idia haroro hebou be namo, unai amo natudia do idia laloatao noho unai gaukara be mai anina bada. Headava tau bona hahine mai edia natuna memero toi—edia mauri lagani be 15 ia lao 21 huanai—be hanaihanai haroro gaukara dekenai idia gaukara hebou. Tamana ia gwau: “Hanaihanai emai natudia dekenai gau namona ta ai hadibaia. Bona unai ese ai ia hamoalea bada bona ta ta ai hagoadaia heheni.”
4 Hegaegae Hebou: Ruma bese momo idia davaria haroro gaukara totona hegaegae hebou be mai ena namo. Natudia ese ruma bese lalonai ma haida ida hamatamaia herevadia idia hegaegaelaia hebou eiava ruma tauna ena kahana idia tohoa neganai, unai idia moalelaia bada. Ruma bese haida be edia famili stadi murinai miniti haida idia atoa haroro gaukara totona idia hegaegae.
5 Iseda ruma bese ida mai anina bada hesiai gaukaradia lalonai ita gaukara hebou neganai, do ita moale bada. Bona ruma bese ida ita haroro hebou bona lou henia bona Baibel stadi ita karaia hebou ese moale ia havaraia! Unai dainai, emu ruma bese ida Iehova umui tomadiho henia hebou neganai, mai moale ida do oi gwau: “Lau, bona lauegu famili taudia, ai ese Lohiabada sibona ena hesiai gaukara do ai karaia.”—Ios. 24:15.