Dirava ena lohia henunai, havaraia gaudia ibounai be mai lalotamona bona maino ida idia noho

Dahaka Dainai Dirava Ena Basileia Ia Mai be Namo?

Tau bona hahine ginigunana be tanobada ai idia noho neganai, iseda Havaraia Tauna, iena ladana be Iehova, be edia Lohia Tauna tamona. Iehova be mai lalokau ida ia lohia. Ia be gabu hairaina ia karaia—Eden umana ai—taunimanima idia noholaia totona. Bona idia dekenai aniani momo ia henia. Danu, mai anina bada gaukara ia henidia. (Genese 1:28, 29; 2:8, 15) Taunimanima be mai maino ida idia noho diba bema Dirava ena lohia dalana idia badinaia.

Heva ese Adamu dekenai ia henia taravatu au huahua ia dogoatao. — Tau bona hahine ginigunana ese edia Lohia Tauna, Dirava idia gwau-edeede henia

Baibel ese ia hahedinaraia gwau-edeede aneru ta, gabeai idia gwauraia Satani Diabolo, ese Dirava ena lohia dalana ia hepapahuahulaia. Ia gwau, taunimanima be do idia moale bema Dirava ena hakaua dalana bona lohia henunai idia noho lasi. Madi, iseda tama sina ginigunana, Adamu bona Heva, ese Satani idia badinaia bona Dirava idia gwau-edeede henia.—Genese 3:1-6; Apokalupo 12:9.

Adamu bona Heva ese edia Lohia Tauna, Dirava idia dadaraia dainai, idia ese edia noho gabuna, Paradaiso bona mauri hanaihanai helarona idia haboioa. (Genese 3:17-19) Edia abia hidi ese gabeai idia havaraia natudia dekenai dika ia havaraia. Baibel ia gwau Adamu ena kara dika dainai, “kara dika be tanobada dekenai ia vareai, bona kara dika ese mase ia mailaia.” (Roma 5:12) Kara dika ese dika ma ta ia havaraia: “Taunimanima haida ese ma haida idia biagua noho, bona idia hisihisi henidia noho.” (Hadibaia Tauna 8:9) Anina be, taunimanima be sibodia idia biagua neganai, hekwakwanai momo be do idia vara.

TAUNIMANIMA EDIA LOHIA DALANA IA MATAMAIA

Nimiroda be mai hekokoroku ida ia gini. Ia murinai, taunimanima be kohoro ta idia haginia noho. — Nimiroda ese Iehova ia gwau-edeede henia

Baibel ese ia gwauraia lohia tauna ginigunana be Nimiroda. Iehova ena lohia siahuna ia gwau-edeede henia. Nimiroda ena nega amo, lohia taudia be dala kererena ai edia siahu idia gaukaralaia. Lagani 3,000 gunanai, King Solomona ia gwau: “Egu matana dekena amo . . . lau itaia. Haida ese idia dagedage henidia taudia idia tai noho, bona tau ta ese ia durudia lasi, . . unai dagedage taudia be mai edia siahu danu.”—Hadibaia Tauna 4:1.

Hari inai negai, taunimanima edia lohia dalana be unai hegeregerena. Lagani 2009 ai, United Nation ena buka ta ia gwau: “Taunimanima edia lohia dalana dikana dainai iseda gabu ai hekwakwanai momo idia vara.”

KARA TA DO IA VARA NEGANA!

Taunimanima idia ura lohia taudia namodia bona gavamani namodia. Bona iseda Havaraia Tauna be unai ia gwauhamatalaia!

Laulau idauidau: Taunimanima edia lohia dalana ese ia havaraia gaudia. 1. Asia hahine ta be dala mirona dekenai ia helai bona ena natuna ia tai noho ia rosia. 2. Ia gorere buruka tauna ta be hospital ena bedi dekenai ia hekure noho. 3. Tuari taudia be tuari gabuna ai edia ipidi idia hapoua. 4. Protest taudia be mai badu ida idia boiboi bona flag idia abia hisi noho. 5. Hahine ta bona ena natuna kekeni be edia ruma murimuri ai idia gini bona idia itaia edia iduara ena galasi ia makohia. 6. Siti ta be faktori ena kwalahu bona paua ena varo amo ia honu. — Ena be taunimanima be mai edia gavamani namodia danu to idia kwalimu lasi taunimanima edia hekwakwanai badadia idia hamaoromaoroa totona

Dirava ese Basileia, eiava gavamani ta do ia haginia, unai Basileia ese lohia taudia ibounai edia gabu do ia abia bona “ia sibona do ia noho ela bona hanaihanai.” (Daniela 2:44) Taunimanima milioni momo ese unai Basileia totona idia guriguri noho. (Mataio 6:9, 10) To, Dirava sibona ese unai gavamani do ia lohia lasi. Ia ese guna taunimanima bamona ia noho tauna ta ia abia hidi vadaeni, Lohia Tauna ai ia lao totona. Dirava ese daika ia abia hidi?