Hesiai Hebou Karaia Dalana

Inai Iseda Basileia Gaukara bona gabeai gaudia dekenai, Hesiai Hebou ena sediual ai gau haida do idia idau sisina. May 2009 ena Iseda Basileia Gaukara ena kahana ta ladana, “Hesiai Hebou Hegaegaelaia Dalana” be idia haidaua sisina, bona henunai idia noho herevadia ese unai idia hahedinaraia.

◼ Tok: Tadikaka ese inai kahana be tok ta bamona do ia karaia, to henanadai bona haere bamona ia karaia lasi. Gau badana be tadikaka ese kongrigeisen do ia durua bada gaudia ia hahedinaraia be namo.

◼ Henanadai Bona Haere: Tadikaka ese inai kahana be Gima Kohorona Stadi bamona do ia karaia, hamatamaia bona hadokoa herevana idia kwadogi, bona paragraf ta ta dekenai henanadai ia gwauraia be namo. Tadikaka ia hereva momo lasi be namo. Bema nega ia hegeregere, siri badadia duahia be namo. Bema Iseda Basileia Gaukara ia gwau paragraf ita duahia be namo, vadaeni ita duahia, to bema ia gwau ita duahia lasi, vadaeni ita duahia lasi.

◼ Tok Bona Henanadai Haida: Tadikaka ese inai kahana be tok ta bamona do ia karaia, to henanadai haida ia henia diba helai taudia idia haere totona.

◼ Haheitalai Bona Inteviu: Tadikaka ese haheitalai kahana ia karaia neganai, gau badana be haheitalai ia karaia. Namona be haheitalai do idia karaia namonamo bona edia mauri sivaraina ia namo pablisa ia abia hidi, bona bema mai dalana, nega bada lalonai haheitalai idia hegaegaelaia o tohoa hebou. Pablisa matamatadia o idia manada lasi pablisa ese gaukara karaia dalana idia haheitalaia be maoro lasi. Unai bamona taudia be ruma tauna ena kahana idia karaia diba. To, bema tadikaka ia laloa unai taudia be platfom ai idia hedinarai momo lasi dainai ia ura gaukaralaidia, vadaeni unai be maoro lasi. Namona be haheitalai idia karaia pablisa taudia idia gini namonamo bona helai taudia ese edia vairana idia itaia diba. Namona be ia inteviu henia taudia be idia helai lasi to platfom ai idia gini bona idia hereva. Haheitalai bona inteviu tohoa guna be namo. Bema hebou ena taim ia hanaia gwauraia, tadikaka ese ena tok ia hakwadogia be namo, unai amo nega ia hegeregere haheitalai o inteviu ia karaia totona. Bema hesiai tauna ta ia ura pablisa ta ia gaukaralaia, elda orea ena kodineita o elda ma ta ia itaia guna be namo.

Bema tok badana ta henia dalana be Iseda Basileia Gaukara ese ia gwauraia, vadaeni unai hadibaia herevadia hegeregerena ita karaia be gau badana. Tadikaka ese ataiai ai gwauraia dalanai Hesiai Hebou idia karaia neganai, gau ibounai ‘do idia karaia namonamo bona dala maorona ai do idia karaia.’​​—1 Kor. 14:​40, NW.