Hesiai Hebou ese Ita Ia Durua Gaukara Namodia Ibounai Ita Karaia Totona
1 Hesiai Hebou idia karaia ena badina be ita ia hagoadaia bona ita ia durua iseda haroro bona hahediba gaukaradia do ita goadalaia totona. (2 Tim. 3:17) To, hebou totona bema ita hegaegae lasi, eiava ita kamonai herevadia ita badinadia lasi, namo bada do ita davaria lasi.
2 Hebou totona oi hegaegae guna neganai, unai ese oi ia durua hebou dekenai do oi kamonai henia herevadia oi lalodia namonamo totona. Do idia gaukaralaia bukadia edia hereva oi riviulaidia, bona hebou dekenai unai buka oi mailaidia, bena hereva idia henia taudia be buka ena hereva idia gwauraia neganai oi itaia diba bona oi haere diba. Oi hakala namonamo, bona noutbuk dekenai hereva oi torea, gabeai oi itadia diba totona.
3 Kongregesen gunalaia tauna be hebou dekenai do idia henia hereva idauidau ia stadilaia namonamo. Mai dibadia elda bona hesiai taudia dekenai hereva ia henidia idia hegaegaelaidia totona. (om-MO rau 70) Kongregesen haida edia elda bona hesiai taudia be momo lasi neganai, hereva be mai dibadia tadikaka haida dekenai idia henia diba idia karaia totona. (km-E [Aust.] 11/76, Henanadai) Hereva do idia henia taudia ta ta iboudiai idia hegaegae namonamo be gau badana, hereva idia henia neganai, hereva idia haidaua lasi, bona edia nega do idia hanaia lasi.
4 Hebou ena hereva ginigunana be kongregesen ena hadibaia herevadia idia gwauraia. Unai kahana ia naria tadikakana be kongregesen gunalaia tauna do ia nanadaia dahaka hereva do ia gwauraia hedinarai totona. Reana leta haida Society amo ia duahia eiava pura vairai ena haroro gaukara ia gwauraia eiava tadikaka bona taihu ia hamaorodia edia hua ena ripoti idia atodia. Reana ita ia hadibaia kongregesen lalonai haida idia gorere bona ita vadivadi henidia be namo, eiava gabeai kongregesen ia hegaegae dahaka dahaka do ia karaia totona do ia kikilaia diba. Namona be oi kamonai namonamo, bena ia gwauraia herevadia oi badinaia diba.
5 Hebou dekenai bema hereva henia tauna be henanadai do ia gwauraia, hegaegae totona namona be hereva ibounai oi duahia bona Baibel siri iboudiai oi duahidia. Idia torea heduru herevadia be edena bamona do oi hahedinaraia, bona haida hagoadadia totona haere amo dahaka hereva do oi gwauraia diba, oi laloa namonamo guna. Hadibaia herevana ita badinaia ena namo hahedinaraia totona, reana ekspiriens maragina ta oi gwauraia diba.
6 Haheitalai do idia karaia neganai, namona be sibona oi atoa unai haheitalai dekenai, bona oi laloa dahaka do oi hereva diba. Taunimanima edia lalona veria herevadia bona dahaka idia karaia ruma tauna ena hereva ia laloa namonamo totona oi itaia namonamo. Mani oi laloa, guna ta ese unai bamona oi ia hereva henia neganai, oi haere henia herevana be dahaka, bona haheitalai idia karaia neganai, idia hahedinaraia gaudia be haroro dekenai oi do ia durua diba dalana oi laloa.
7 Bema tadikaka eiava taihu be haheitalai do idia karaia eiava hereva henia tauna ese do ia henanadai henidia, gau badana be idia hegaegae namonamo guna. Idia ta ta iboudiai be platfom dekenai idia noho neganai, dahaka do idia hereva eiava dahaka do idia karaia idia diba namonamo be gau badana. Bema idia hegaegae lasi, helai taudia do idia durudia eiava hagoadadia lasi. Haida idia hegaegae guna bona Gima Kohorona Stadi murinai, vaira Hesiai Hebou dekenai do idia henia hereva idia karaia toho, unai neganai idia be platfom dekenai idia karaia toho diba bona maikrafon naria taudia idia diba dahaka idia ura gaukaralaia.
8 Nega haida kongregesen durua herevana ta eiava Gima Kohorona ena sivarai ta do idia gwauraia. Oi hakala namonamo, emu lalona ibounai ida sisiba oi abia dae, bona oi badinaia toho.
9 Ita ura ita “hegaegae gaukara namodia ibounai do [ita] karaia totona.” (2 Tim. 2:21) Hesiai Hebou be Iehova ena heduru karana ta, ita ia durua gaukara namodia ita karaia totona. Bema hanaihanai unai hebou dekenai ita lao bona mai iseda lalona ibounai ida ita hekwarahi ita kamonai henia herevadia ita badinadia totona, unai ese ita ia durua bena ‘iseda hesiai gaukara ibounai ita karaia namonamo diba.’—2 Tim. 4:5.
[Questions]
1. Hesiai Hebou idia karaia ena badina be dahaka?
2. Dahaka ese ita ia durua Hesiai Hebou ena hahediba herevadia ita hakala henia namonamo totona?
3. (a) Hesiai Hebou dekenai daidia be hereva idia henia diba? (b) Hereva henia taudia iboudiai be dahaka idia naria namonamo?
4. Hebou ena hereva ginigunana dekenai dahaka hadibaia hereva idia gwauraia hedinarai diba?
5. Edena dala idauidau amo helai taudia be idia hegaegae diba haere do idia henia totona?
6. Haheitalai ita itaia neganai dahaka ita laloa be namo?
7. Dahaka dainai haheitalai idia hegaegaelaidia namonamo be gau badana?
8. Platfom amo sisiba idia henia neganai, dahaka gau toi do ita karaia be namo?
9. Hesiai Hebou be edena dala amo ita ia durua diba ‘iseda hesiai gaukara ibounai ita karaia namonamo diba’ totona?