Hanaihanai Ita be Haroro Taudia
1. Iesu ese Samaria hahine ia haroro henia karana amo dahaka ita dibaia?
1 Iesu be hora momo lalonai ia raka dainai, ia hesiku bona ia ranu mase. Ena hahediba taudia be aniani hoia totona idia lao neganai, Iesu be ranu guri ta badinai ia helai, ia laga-ani totona. Iesu be Samaria dekenai haroro totona ia lao lasi; to ia be Iudea amo ia mai bona Samaria amo Galilea dekenai ia hanaia lao haroro gaukara ia karaia totona. To, unai nega ia gaukaralaia Samaria hahinena ia haroro henia totona. (Ioa. 4:5-14) Dahaka dainai? Iesu be nega ibounai “hereva momokani tauna, bona Dirava ena hereva ia gwauraia maoromaoro tauna.” (Apok. 3:14) Iesu bamona hanaihanai ita haroro neganai, ita hahedinaraia ita be Iehova ena Witnes taudia.—1 Pet. 2:21.
2. Edena bamona ita hegaegae diba nega bona gabu idauidau ai ita haroro totona?
2 Oi Hegaegae: Nega bona gabu idauidau ai ita haroro totona, buka, magasin bona pepapepa ita abia loaloa be namo. Pablisa momo ese pepapepa idia abia hegaegae bona sitoa ai, sevis steiseni ai idia gaukara taudia, bona dina ta ta ai idia davaria taudia ma haida dekenai idia hariharilaia. (Had. 11:6) Gabu ma haida dekenai ia loaloa momo taihu ta be inai bamona ia karaia: Baibel maragina ta bona Baibel Hadibaia bukana be ena baege dekenai ia udaia, bona ia badinai idia helai taudia ia hereva henia toho.
3. Edena dala ai haroro dalana ita hamatamaia diba?
3 Haroro Dalana Hamatamaia: Nega bona gabu idauidau ai ita haroro neganai, namona be Baibel ena hereva ita gwauraia haraga lasi. Iesu be Samaria hahinena dekenai maoromaoro ia hahedinaraia lasi ia be Mesia. To ia amo ranu ia noia, bena unai hahine be ia daradara bona ia henanadai neganai, unai ese dala ia kehoa Iesu ese ia haroro henia totona. (Ioa. 4:7-9) Taihu ta be ma haida ese idia nanadaia dahaka dainai dina helagadia ia moalelaia lasi neganai, ia be Iesu ena haheitalai ia badinaia dainai haroro dalana ia kehoa. Maoromaoro ia hahedinaraia lasi ia be Iehova ena Witnes hahinena ta dainai unai bamona moale karadia ai ia vareai lasi, to ia gwau, “Lau be abia hidi lau karaia vadaeni unai bamona dina do lau moalelaidia lasi.” Bena ia hereva henia tauna be taihu ena haere ena badina ia henanadailaia neganai, unai ese dala ia kehoa taihu ese ia haroro henia totona.
4. Dahaka dainai Mataio 28:18-20 ena hereva ese oi ia hagoadaia?
4 Ena be Iesu ese tanobada ai ena haroro gaukara ia hagugurua vadaeni, to ia be tanobada hegegemadai ita karaia haroro gaukarana ia laloa bada. (Mat. 28:18-20) Unai dainai, namona be Iesu ia karaia bamona ita danu be ita noho hegaegae taunimanima edia vairanai eda abidadama ita gwauraia hedinarai totona.—Heb. 10:23.