Lau Hegeregere Lau Haroro Totona, A?
1. Bema ita laloa ita hegeregere lasi ita haroro totona, dahaka dainai unai lalohadai kererena ita dadaraia be namo?
1 Nega ta, oi be unai bamona henanadai oi henia, a? Oi laloa momo lasi! Oi gwau lasi sikuli namona idia lao taudia o aonega taudia sibona be hegeregere idia haroro totona. Baibel ia gwau, aposetolo taudia haida be “sikuli bada lasi bona aonega bada lasi taudia.” To idia be mai edia lalona ibounai ida Iesu ena haheitalai idia tohotohoa dainai, sivarai namona harorolaia gaukarana idia karaia namonamo.—Kara 4:13; 1 Pet. 2:21.
2. Iesu ena hadibaia daladia haida be dahaka?
2 Iesu Ena Hadibaia Dalana: Iena hadibaia herevadia be taunimanima ese idia badinaia bona lalopararalaia diba. Ia gaukaralaia henanadai, haheitalai, bona auka lasi hamatamaia herevadia ese kamonai taudia edia lalona idia veria. (Mat. 6:26) Ia be taunimanima edia namo ia laloa bada. (Mat. 14:14) Ma danu, ia be mai gari lasi ida bona mai siahu ida ia hereva, ia diba Iehova ese ia oda henia bona siahu ia henia ena gaukara ia karaia totona.—Luka 4:18.
3. Iehova be edena dala ai ita ia durua haroro gaukara ita karaia namonamo totona?
3 Iehova be Ita Ia Durua: Iseda Hadibaia Tauna Hereadaena be ena Hereva bona orea amo ita ia durua, sivarai namona harorolaia gaukarana ita karaia namonamo totona. (Isa. 54:13) Iehova ese Baibel ai Iesu ena hadibaia dalana ia torea dainai, ita ese unai ita stadilaia bona tohotohoa diba. Iehova ese ita dekenai lauma helaga ia henia bona kongrigeisen heboudia amo ita ia hadibaia. (Ioa. 14:26) Danu, Iehova be idia manada pablisa taudia amo ita ia durua diba haroro gaukara ita karaia namonamo totona.
4. Dahaka dainai ita gwau diba ita hegeregere ma haida dekenai sivarai namona ita harorolaia totona?
4 Dala idauidau ai ‘Dirava sibona ese aonega ita dekenai ia henia’ dainai, ita be hegeregere ita haroro totona. (2 Kor. 3:5) Momokani, bema Iehova dekenai ita tabekau bona ena lalokau dainai ia henia gaudia ibounai ita gaukaralaia namonamo, ita be do ‘ita hegeregere momokani, bona ita noho hegaegae gaukara namodia ibounai ita karaia totona.’—2 Tim. 3:17, NW.